«جولدا بالالاردىڭ قاۋىپسىزدىگىن ساقتاۋ» رەسپۋبليكالىق اكتسياسىنىڭ شەڭبەرىندە قوستاناي قالالىق جەرگىلىكتى پوليتسياسى بالالارعا 500 دانا شاعىلدىرا جارقىلدايتىن سالپىنشاق اشەكەي تاراتتى.
وبلىستىق ىشكى ىستەر دەپارتامەنتىنىڭ مالىمەتىنشە, جولدارداعى كولىك اپاتىنان جۇرگىنشى بالالار ءجيى زارداپ شەگەدى. جىل باسىنان بەرى وبلىس ەلدى مەكەندەرىندەگى جولداردا 12 بالانى كولىك قاعىپ كەتكەن. پوليتسەيلەر بالالارعا تاراتقان اشەكەي سالپىنشاقتى ولار كىتاپتارىن سالىپ, ارقالارىنا اسىنىپ الاتىن ريۋكزاگىنە تاعىپ الۋىنا بولادى. ونى تاراتۋعا «گرين» ازاماتتىق اليانسى مەن وبلىستاعى ىسكەر ايەلدەر قاۋىمداستىعىنىڭ فيليالى اتسالىستى.
«جىل باسىنان بەرى بالالاردىڭ قاتىسى بار 17 جول-كولىك وقيعاسى تىركەلگەن, سونىڭ 12-دە جۇرگىنشى بالالاردى كولىك قاققان, ودان 19 ءجاسوسپىرىم جاراقات الدى. 4 جول كولىك اپاتى بالالاردىڭ كىناسىنەن بولعان. جاز ايلارىندا بالالار بوس بولعاندىقتان, كوشەدە ءجيى جۇرەدى, سوندىقتان اتا-انالارعا دا ۇيدە جول ەرەجەسىن ساقتاۋدى ايتىپ وتىرۋدى ەسكەرتىپ كەلەمىز», دەيدى جەرگىلىكتى پوليتسيا باسشىسىنىڭ ورىنباسارى قۇرمەت ماجىكەنوۆ.
پوليتسەيلەردىڭ ايتۋىنا قاراعاندا, جول اپاتىنا نەگىزىنەن كوشەدە جۇگىرەتىن 7-12 جاستاعى بالالار ءجيى ۇشىراپ جاتادى. ويتكەنى بويى كىشكەنتاي بولعاندىقتان جۇرگىزۋشىلەر ولاردىڭ جولعا شىعا كەلگەنىن بايقاماي, تەجەگىشتى ۋاقىتىندا باسىپ ۇلگەرمەي قالادى.
رەسپۋبليكالىق اكتسيا 1 ماۋسىمعا دەيىن سوزىلادى.
ءنازيرا جارىمبەتوۆا «ەگەمەن قازاقستان»