سابىر راقىموۆ تۋرالى كوركەم فيلم ءتۇسىرۋ كەرەك

«قۇرمەتتى باقىتجان ءابدىر­ ۇلى! ەلباسى ن.ءا.نازارباەۆتىڭ جاستاردى وتانسۇيگىشتىككە, پات­ريوتيزمگە تاربيەلەۋ تۋرالى بەرگەن تاپسىرمالارى شەڭبەرىندە وتان ءۇشىن جانىن قيىپ, ەرلىك كورسەتكەن باتىرلارىمىزدىڭ ءومىر جولىن دارىپتەپ, ەلگە پاش ەتۋ وتە ماڭىزدى. وسىنداي, عۇمىرى ەرلىككە تولى, ءومىرى جاستارعا ۇلگى بولاتىن قازاقتىڭ اياۋلى پەرزەنتى, ۇلى وتان سوعىسىندا قايتالانباس ەرلىك كورسەتكەن, سوعىستىڭ باسىنان اياعىنا دەيىن مايداننىڭ الدىڭعى شەبىندە ءجۇرىپ ەرلىكپەن قازا تاپقان, ەسىمى ەلدىڭ ماڭگى ەسىندە ساقتالاتىن باتىرلارىمىزدىڭ ءبىرى – كەڭەس وداعىنىڭ باتىرى, ورتا ازيادان شىققان تۇڭعىش گەنەرال − سابىر راقىموۆ. بالالىق شاعى قيىندىقپەن وتسە دە, بۇكىل عۇمىرىن وتان قورعاۋعا ارناعان سابىر راقىموۆ نەبارى 43 جاس ءومىر سۇرسە  دە ۇلى وتان سوعىسىندا ءۇش بىردەي ات­قىشتار ديۆيزياسىن باسقاردى, مايدانداعى كورسەتكەن ەرلىكتەرى ءۇشىن ءتورت رەت جاۋىنگەرلىك  قىزىل تۋ وردەنىمەن, جوعارى دەڭگەيدەگى اسكەري باسشىلارعا بەرىلەتىن ءىى دارەجەلى سۋۆوروۆ جانە كۋتۋزوۆ وردەندەرىمەن ماراپاتتالعان. گەنەرال رەتىندە شتابتا وتىرماي, اسكەرلەرمەن بىرگە تەك قانا مايدان شەبىندە جۇرگەن سابىر راقىموۆ 1945 جىلى, جەڭىسكە نەبارى 1,5 اي قالعاندا پولشانىڭ دانتسيگ قالاسى ءۇشىن بولعان شايقاستا ەرلىكپەن قازا تاپتى. بويىنداعى جىگەرلىگى مەن قايسارلىعى, باتىلدىعى مەن تا­بان­دىلىعى ءۇشىن «تەمىر گە­­نە­­رال» اتانعان سابىر را­قىموۆتىڭ ەسىمىن ەل ەسىندە ماڭ­گى­لىك قال­دىرۋ, ەرلىگىن دارىپ­تەۋ, ونەگەسىن جاستارعا ۇلگى ەتۋ قا­زىرگى ۇرپاق­تىڭ مىن­دە­تى دەپ ەسەپتەيمىن. سوندىقتان, قۇرمەتتى باقىت­جان ءابدىر ۇلى, عۇمىرى ەرلىككە تولى سابىر راقىموۆ تۋرالى كوركەم فيلم ءتۇسىرۋدى قۇزىر­لى ورگاندارعا تاپسىرىپ, 2018 جىلعى رەسپۋبليكالىق بيۋدجەتتە ءتيىستى قاراجاتتى قاراستىرۋعا ىقپال ەتۋىڭىزدى سۇرايمىن».