كەزدەسۋ بارىسىندا وتاندىق ديپلومات م.اۋنعا قازاقستان پرەزيدەنتى ن.ءا.نازارباەۆتىڭ ءىلتيپاتىن جەتكىزىپ, قازاقستانداعى قازىرگى الەۋمەتتىك-ەكونوميكالىق جاعداي, سونداي-اق ەلىمىزدىڭ اۋقىمدى حالىقارالىق باستامالارى جونىندە حاباردار ەتتى. سونداي-اق, ا.بەردىباي ليۆان پرەزيدەنتىنىڭ الداعى 10-11 قىركۇيەكتە استانادا وتەتىن يسلام ىنتىماقتاستىعى ۇيىمىنىڭ ءبىلىم جانە تەحنولوگيالار جونىندەگى ءبىرىنشى سامميتىنە قاتىساتىنىنا سەنىم ءبىلدىرىپ, قازاقستان-ليۆان قارىم-قاتىناستارىن نىعايتۋ جانە ىلگەرىلەتۋ بويىنشا جۇمىس جۇرگىزەتىنىن مالىمدەدى. ليۆان پرەزيدەنتى دوستىق جانە ءوزارا سەنىمگە نەگىزدەلگەن بايلانىستاردى دامىتۋعا باعىتتالعان بارلىق باستامالاردى قولدايتىنىن قۋاتتادى. ەلشى ا.بەردىبايدىڭ بەيرۋت قالاسىنا جاساعان ساپارى شەڭبەرىندە ليۆاننىڭ سىرتقى ىستەر ءمينيسترى دجۋبران باسيل مەن ءسىم-ءنىڭ باس حاتشىسى شاربەل ۋاحبەمەن كەزدەسۋلەر ءوتتى. سۇحبات اياسىندا تاراپتار ليۆان پرەزيدەنتىنىڭ يىۇ عىلىم جانە تەحنولوگيالار سامميتىنە قاتىسۋ, ەكى ەلدىڭ سىرتقى ىستەر مينيسترلىكتەرى اراسىندا ساياسي كونسۋلتاتسيالار وتكىزۋ, ەكىجاقتى قاتىناستاردىڭ شارتتىق-قۇقىقتىق بازاسىن كەڭەيتۋ, مۇددەلى مينيسترلىكتەر مەن ۆەدومستۆولار اراسىندا ءوزارا ساپارلار ۇيىمداستىرۋ مۇمكىندىكتەرى جونىندە پىكىر الماستى.
بەيرۋت قالاسىندا قازاقستاننىڭ يوردانياداعى ەلشىسى ازامات بەردىباي ليۆان رەسپۋبليكاسىنىڭ پرەزيدەنتى ميشەل اۋنعا ليۆاندا ەلشى قىزمەتىن قوسا اتقارۋشى رەتىندە سەنىم گراموتاسىن تاپسىردى, دەپ حابارلادى قازاقستان سىرتقى ىستەر مينيسترلىگىنىڭ ءباسپاسوز قىزمەتى.