مۇنداي كەلىسىمگە وبلىس اكىمىنىڭ ورىنباسارى ەربول سادىر مەن «نوۆوپەك» جشس-ءنىڭ باسقارۋشى ديرەكتورى ايدار جاقىپوۆپەن بولعان ەكى جاقتى مەموراندۋم اياسىندا قول جەتكىزىلدى.
ەڭبەك كۇشى ايتارلىقتاي ارتىق وڭتۇستىكتەن جۇمىس قولىنىڭ تاپشىلىعى سەزىلەتىن اقمولا وبلىسىنا تۇرعىنداردى قونىستاندىرۋ ماقساتىندا جاسالعان مەموراندۋم اياسىندا زاۋىت باسشىسى ايدار جاقىپوۆ وبلىستان باراتىن 300-گە جۋىق ازاماتتى جۇمىسپەن قامتىپ, باسپانا ماسەلەسىن شەشۋگە كومەكتەسەتىنىن اتاپ ءوتتى.
ەستەرىڭىزگە سالساق, وتكەن اپتادا اقمولا وبلىسىنىڭ اكىمى مالىك مۋرزالين وڭتۇستىك قازاقستان وبلىسىنا جاساعان ساپارى اياسىندا پوليەتيلەن قاپتارىن شىعاراتىن «نوۆوپەك» زاۋىتى مەن باسقا دا وندىرىستىك كاسىپورىنداردا جۇمىس كۇشىنىڭ تاپشىلىعى بايقالاتىنىن اتاپ وتكەن بولاتىن. وسىنىڭ نەگىزىندە شىمكەنت پەن كوكشەتاۋ قالاسى اراسىنداعى بايلانىستى نىعايتۋ ماقساتىندا بىرقاتار كومپانيالار مەن وڭتۇستىكتەگى مەملەكەتتىك مەكەمەلەر اراسىندا ەكى جاقتى كەلىسىمدەر جاسالدى. ماسەلەن, «شىمكەنت» اكك ۇق مەن «ەسىل» اكك ۇق اراسىنداعى ىنتىماقتاستىقتى كۇشەيتۋ تۋرالى جانە «ENKI»جشس مەن وقو قۇرىلىس باسقارماسى ءوزارا مەموراندۋم ءتۇزدى. كەلىسىمدەر ەكى وبلىس اراسىنداعى قارجىلىق دامۋ مەن ىنتىماقتاستىق بايلانىستى كۇشەيتۋگە باعىتتالعان.
«نوۆوپەك» كومپانياسىنىڭ نەگىزى 2003 جىلى قالانعان, پوليمەرلىك قاپتاما نارىعىندا كوپجىلدىق كوشباسشى. زاۋىت اۆستريا, يتاليا, تۇركيا جانە تايۆان ەلدەرىنىڭ زاماناۋي قۇرال-جابدىقتارىمەن جابدىقتالعان. اۋماعى 45 مىڭ شارشى مەتردى قۇرايتىن كەشەن 600 ادامدى جۇمىسپەن قامتۋعا مۇمكىندىگى بار. بۇگىندە ءوندىرىس ورنى ايىنا 8 ملن دانا ءونىم شىعارادى.