بۇدان بۇرىن بولعان كەلىسسوزدەر راۋندىندا بۇۇ باس حاتشىسىنىڭ سيريا جونىندەگى ارنايى ۋاكىلى قاتىسۋشىلارعا ماسەلەنى رەتتەۋدىڭ نەگىزگى قاعيداتتارىن قامتىعان 12 تارماقتان تۇراتىن قۇجات ۇسىنعان. ونىڭ ىشىندە ەلدىڭ اۋماقتىق تۇتاستىعى مەن تاۋەلسىزدىگىن ساقتاۋ, سونداي-اق, بيلىك قۇرىلىمىنىڭ دەموكراتيالىق فورماسىن قامتاماسىز ەتۋ پرينتسيپتەرى دە ايتىلعان.
الايدا, ساراپشىلاردىڭ ايتۋىنا قاراعاندا, ۇسىنىلعان پرينتسيپتەر نەگىزىنەن بۇۇ قك 2254 رەزوليۋتسياسىنىڭ تالاپتارىن قايتالاپ, ساياسي رەتتەۋدىڭ ناقتى ماسەلەلەرىن شەشۋدى كورسەتپەگەن. ماسەلەنىڭ ءمانىسى مىنادا: مۇنداي فورمادا ولار قاتىسۋشىلاردىڭ ەشقايسىسىنىڭ دا نارازىلىعىن تۋدىرمايدى, ويتكەنى, تاراپتاردىڭ ارقايسىسى ونى وزدەرىنشە قابىلدايدى.
كەلىسسوزدەردەن كەيىن بولعان قورىتىندى ءباسپاسوز ءماسليحاتىندا بۇۇ-نىڭ سيريا جونىندەگى ارنايى ۋاكىلى ستاففان دە ميستۋرا شاقىرىلعاندار بارلىق 4 سەبەتتى بۇۇ ۇسىنعان ءادىسنامانى قولدانا وتىرىپ, بىزبەن بىرگە تياناقتى تالقىلادى, دەپ مالىمدەدى. «ولار مۇنى جوققا شىعارادى. ال مەن سىزدەرگە ولاردىڭ ءبارى دە پروتسەسكە بەلسەندى قاتىستى دەپ ايتا الامىن. ءبىز نەگىزىنەن ناقتى ماسەلەلەردى تالقىلادىق... بەينەلەپ ايتقاندا, پويىز ورنىنان جىلجىدى, بىراق ءجۇرىسى باياۋ», دەدى ول.
بۇۇ ارنايى ۋاكىلىنىڭ سوزدەرىن سيريا ۇكىمەتى دەلەگاتسياسىنىڭ باسشىسى باشار ءدجاافاريدىڭ مالىمدەمەسى دە قۇپتايدى. ول جەنەۆاداعى كەلىسسوزدەردىڭ بەسىنشى راۋندى پروگرەسكە قول جەتكىزبەسە دە كەلىسسوزدەر پروتسەسىنىڭ ءوزى توقتاماي, جالعاسا بەرەتىنىن اتاپ ءوتتى.
كەلىسسوزدەردىڭ كەزەكتى راۋندىنا قاتىسۋشىلاردىڭ كوبى سيريا كيكىلجىڭىن رەتتەۋدە استانا پروتسەسىنىڭ ماڭىزدى ءرول اتقارعانىنا باسا نازار اۋدارعانىن ايتا كەتۋ كەرەك. بايقاۋشىلار استانا پروتسەسى سيريالىق كيكىلجىڭدى رەتتەۋدە قاتىسۋشى-تاراپتار ءۇشىن وتكىر ماسەلەلەر مەن ۇساق تەتىكتەردى تالقىلاۋدا قوسىمشا تۇعىرناما بولعاندىعىن, ءسويتىپ, ولار جەنەۆا كەزدەسۋىندەگى پىكىرسايىستار مەن ىمىرالارعا دايىندالىپ كەلگەندىگىن اتاپ ءوتۋدە.
سيريا جونىندەگى استاناداعى كەزدەسۋ – داعدارىستى بەيبىت جولمەن رەتتەۋدىڭ جولدارىن تابۋعا جاعداي جاسادى دەگەندى ۆاشينگتوندا سارسەنبى كۇنى اياقتالعان «دايش» تەرروريستىك توبىنا قارسى كۇرەسۋ جونىندەگى حالىقارالىق كواليتسياعا مۇشە ەلدەردىڭ ديپلوماتيالىق ۆەدومستۆولارى باسشىلارى كەزدەسۋىنىڭ قورىتىندىسىندا دا ايتىلدى. «ءبىز استانا كەزدەسۋىنىڭ جەنەۆاداعى بۇۇ شەڭبەرىندەگى كەزدەسۋلەردىڭ جولدارىن انىقتاۋعا ۇلەس قوسقانىن مويىندايمىز», دەلىنگەن قۇجاتتا.
تۇركيانىڭ سىرتقى ىستەر ءمينيسترى مەۆليۋت چاۆۋشوگلۋ ءوزىنىڭ سوڭعى سۇحباتىندا استاناداعى سيريا بويىنشا كەلىسسوزدەر جەنەۆانىڭ بالاماسى ەمەس, ءوز الدىنا ميسسيا اتقارعان پىكىرسايىس بولعانىن مالىمدەدى. «ءبىز سيرياداعى ۋاقىتشا ءبىتىمدى قولداۋ ماقساتىمەن استانا كەزدەسۋىن ۇيىمداستىردىق. ءتۇركيا بۇل تۇعىرنامالاردى قولدايدى جانە جەنەۆا مەن استانادا بولاتىن كەلەسى كەزدەسۋلەرگە ءۇمىت ارتادى», دەپ اتاپ ءوتتى م.چاۆۋشوگلۋ مىرزا.
ال جەنەۆاداعى سوڭعى كەلىسسوزدەردىڭ قورىتىندىسىندا ستاففان دە ميستۋرا ءتورت سەبەتكە ەنگەن ماسەلەلەردىڭ قاتارىندا سيريادا جاڭا كونستيتۋتسيا قابىلداۋ, سايلاۋ وتكىزۋ, ۋاقىتشا وكىمەت جانە تەرروريزمگە قارسى كۇرەس قاراستىرىلىپ, ولار تياناقتى تۇردە تالقىلانا باستاعانىن ايتتى. سوندىقتان, استانادا ۋاقىتشا ءبىتىمنىڭ ساقتالۋىن قاراستىراتىن كەزدەسۋدىڭ ماڭىزدى ەكەنىن اتاپ ءوتتى بۇۇ ەميسسارى.
سيريا جونىندەگى استانادا بولاتىن كەزەكتى كەلىسسوزدەر 3 جانە 4 مامىرعا بەلگىلەنگەن. ونىڭ قورىتىندىسى بويىنشا جەنەۆادا بولاتىن التىنشى راۋندتىڭ داتاسىن ستاففان دە ميستۋرا جاريالايتىن بولادى. ول كەلەسى ايدىڭ ورتاسىندا بولادى دەپ كۇتىلۋدە.
جالپى, استانا پروتسەسى سيريا داعدارىسىن رەتتەۋ پروبلەمالارىنىڭ قۇرامداس بولىكتەرىنىڭ ءبىرى بولدى دەپ ايتۋعا بولادى. مۇنى قاتىسۋشى تاراپتاردىڭ بەسىنشى راۋندتى اياقتاعاندا «جەنەۆا-6» مامىر ايىنىڭ ورتاسىندا بولاتىنىن جوسپارلاي وتىرىپ, بىراق ول استانادا جۋىق شامامەن 3-4 مامىردا بولاتىن كەزدەسۋدەن كەيىن عانا بولادى دەپ شەشكەندەرىنەن كورۋگە بولادى.
رۋسلان ءىزىموۆ