الماتى وبلىسىندا قوي شارۋاشىلىعىن دامىتۋ جانە قوي تۇقىمىن اسىلداندىرۋ ماسەلەسىنە ارنالعان سەمينار كەڭەس ءوتتى, دەپ حابارلادى وبلىس اكىمىنىڭ ءباسپاسوز قىزمەتى.
جيىندا بايانداما جاساعان قوي شارۋاشىلىعى بويىنشا رەسپۋبليكالىق پالاتانىڭ توراعاسى تىنىشباي دوسىمبەكوۆتىڭ ايتۋىنشا پالاتا مۇشەلىگىندەگى عالىمدار بىرلەسىپ قوي شارۋاشىلىعىن دامىتۋدىڭ كەشەندى باعدارلاماسى ازىرلەنگەن. وسى باعدارلامادا بەلگىلەنگەن الدىڭعى كەزەكتەگى ماسەلەلەر جايلى بايانداماشى كەڭىنەن اڭگىمەلەدى. پالاتا توراعاسى ەڭ الدىمەن باسەكەگە قابىلەتتى بىرتەكتى تاۋار قالىپتاستىرۋ قاجەتتىگىن ايتتى. بۇل تاۋار حالىقارالىق ستاندارتتارعا جانە ەكسپورتتالاتىن ەلدىڭ ستاندارتىنا ساي بولۋى كەرەك. بۇل ورايدا جوعارى ونىمدىلىگىن, ءوز قۇنىنىڭ تومەن بولۋىن, ءتيىستى تاۋارلىق كەلبەتى بولۋىن قامتاماسىز ەتۋ قاجەت.
جۇمىستىڭ نەگىزگى مىندەتتەرىن ايقىنداعان بايانداماشى ولارعا قول جەتكىزۋ جولدارى, كورسەتىلەتىن مەملەكەتتىك قولداۋلار, قوي تۇقىمىن اسىلداندىرۋدىڭ ساتىلاي قادامدارى, ەكسپورتقا شىعارۋ جانە باسقا دا ماسەلەلەرگە توقتالدى. وسىنداي مازمۇنداعى بارلىق ماسەلەلەر بويىنشا رەسپۋبليكالىق پالاتا قوي وسىرۋشىلەرگە بارلىق قاجەتتى كومەكتى كورسەتپەك.
سەميناردا ۇلتتىق عىلىم اكادەمياسىنىڭ كوررەسپوندەنت مۇشەسى, اۋىل شارۋاشىلىعى عىلىمدارىنىڭ دوكتورى, پالاتالار كەڭەسىنىڭ مۇشەسى تولەۋحان سادىقۇلوۆ, اۋىل شارۋاشىلىعى عىلىمدارىنىڭ دوكتورى, پروفەسسور ماماي پرمانشاەۆ, «جەتىسۋ» ايماقتىق اسسوتسياتسياسىنىڭ توراعاسى كەڭەسحان ابدىلدەنوۆ قاتىسىپ, قوي شارۋاشىلىعىن دامىتۋدىڭ عىلىممەن بايلانىسىنىڭ ماڭىزى جايلى اڭگىمەلەدى.
وبلىستاعى شارۋا قوجالىقتارىنىڭ باسشىلارى, قوي وسىرۋشىلەر كەزدەسۋ بارىسىندا عالىمدار مەن ساراپشىلاردان ۇساق مال ءوسىرۋدىڭ زامانۋي تاسىلدەرىن عانا ەستىپ قانا قويعان جوق, سونىمەن قاتار وزدەرىن تولعاندىراتىن ساۋالدارىنا تياناقتى جاۋاپ تا الدى.
كەزدەسۋگە قاتىسۋشىلار مۇنداي كونسترۋكتيۆتى ديالوگ العا قويعان مىندەتتەردى ءتيىمدى شەشۋگە كومەكتەسەتىنىن, قوي وسىرۋدە ايتۋلى جەتىستىكتەرگە جەتۋ جولىندا وبلىس فەرمەرلەرى دە ءوز ۇلەستەرىن قوساتىندىعىن ايتتى.