وبلىسقا بەلگىلى, جوعارى ساناتتى پسيحياتر دارىگەر, وبلىستىق پسيحيكالىق-نەۆرولوگيالىق اۋرۋحانانى كوپ جىل باسقارعان ءراشيدا ساندىباەۆانىڭ ءمايىتى كەشە تۇسكە جاقىن ءوزىنىڭ پاتەرىندە قان-جوسا بولىپ جاتقان جەرىنەن تابىلعان. قىلمىسكەر دارىگەردىڭ دەنەسىنە 30 جەردەن پىشاق ۇرعان.
راشيدا قوجاحمەتقىزىنىڭ ەڭبەك كىتاپشاسىندا قوستاناي وبلىستىق پسيحياتريالىق اۋرۋحاناعا جۇمىسقا قابىلدانعانى تۋرالى ءبىر-اق سويلەم جازىلعان ەكەن. ول وبلىستاعى پسيحياتريالىق قىزمەتكە 36 جىلىن ارنادى. 2005 جىلدان باستاپ اۋرۋحانانى باسقاردى, ۇزاق ۋاقىت وبلىستىق دەنساۋلىق ساقتاۋ باسقارماسىنىڭ شتاتتان تىس باس پسيحياتر دارىگەرى بولدى.
ءبىر-ەكى جىل بۇرىن زەينەتكەرلىككە شىققان سوڭ, دارىگەر سوت-پسيحياتريالىق ساراپتاۋ ورتالىعىندا ىستەدى. ونىڭ تراگەديالىق ءولىمى كاسىبي قىزمەتىمەن بايلانىستى بولۋى مۇمكىن دەگەن دە بولجام بار. قازىر سوتقا دەيىنگى ىزدەستىرۋ, تەرگەۋ امالدارى باستالدى.
ءنازيرا جارىمبەتوۆا
«ەگەمەن قازاقستان»