17-18 اقپاندا الماتى قالاسىندا اتالعان فەدەراتسيانىڭ اتقارۋشى كوميتەتىنىڭ بيۋرو وتىرىسى ءوتتى. جيىندا كۇرەس تۇرلەرىنەن قازاقستان رەسپۋبليكاسى ۇلتتىق قۇراما كوماندالارىنىڭ باس جاتتىقتىرۋشىلارىن تاعايىنداۋ جانە باسقا دا ماسەلەلەر قارالدى.
قازاقستان رەسپۋبليكاسى گرەك-ريم, ەركىن جانە ايەلدەر كۇرەسى فەدەراتسياسىنىڭ جالپى ماسەلەلەر بويىنشا ۆيتسە-پرەزيدەنتى, فەدەراتسيا اتقارۋشى كوميتەتى بيۋروسىنىڭ توراعاسى دانيار ابۋلعازيننىڭ باسشىلىعىمەن وتكەن وتىرىستا ەل كۇرەسىنە بايلانىستى بىرقاتار ماڭىزدى شەشىمدەر قابىلداندى. سونداي-اق, ۇلتتىق قۇرامالاردىڭ باس جاتتىقتىرۋشىلارى تاڭات ساعىندىقوۆ (گرەك-ريم كۇرەسى), اسقار ابدىراشەۆ (ەركىن كۇرەس, اعا باپكەر), قايرات ساعاديەۆ (ايەلدەر كۇرەسى, باس باپكەر) وتكەن وليمپيالىق تورتجىلدىق تسيكلدەگى اتقارىلعان جۇمىستار جايلى قورىتىندى باياندامالار جاسادى.
وتىرىستا قازاقستان رەسپۋبليكاسى گرەك-ريم كۇرەسى ۇلتتىق قۇراما كومانداسىنىڭ باس جاتتىقتىرۋشىسىن تاعايىنداۋ ماسەلەسى بويىنشا فەدەراتسيانىڭ گرەك-ريم كۇرەسى جونىندەگى ۆيتسە-پرەزيدەنتى داۋلەت تۇرلىحانوۆ ءسوز الىپ, اتالعان قىزمەتكە نۇرىم دۇيسەنوۆتى تاعايىنداۋدى ۇسىندى.
نۇرىم ساپار ۇلى دۇيسەنوۆ 2014 جىلعا دەيىن گرەك-ريم كۇرەسىنەن جاستار قۇراماسىنىڭ اعا جاتتىقتىرۋشى قىزمەتىن اتقارعان, ونىڭ باپكەرلىك مول تاجىريبەسى جانە بالۋاندار اراسىنداعى بەدەلى دە جوعارى. سونىمەن قاتار, داۋلەت تۇرلىحانوۆ ۇلتتىق قۇرامانىڭ باپكەرلەر شتابىنا سەرىك جۇماشەۆتى قر ۇقك اعا جاتتىقتىرۋشىسى, باقتيار بايسەيىتوۆ پەن گەورگي تسۋرتسۋميانى قر ۇقك جاتتىقتىرۋشىلارى, مەيىرحان راحمەتوۆتى قر گرەك-ريم كۇرەسىنەن مەملەكەتتىك جاتتىقتىرۋشىسى رەتىندە ەنگىزۋدى ۇسىندى. اتالعان شەشىمدەردى اتقارۋشى كوميتەت بيۋروسى ماقۇلداپ, بەكىتتى.
قازاقستان رەسپۋبليكاسى ەركىن كۇرەستەن ۇلتتىق قۇراما كوماندانىڭ باس جاتتىقتىرۋشىسىن تاعايىنداۋ ماسەلەسى بويىنشا فەدەراتسيانىڭ ەركىن كۇرەس جونىندەگى ۆيتسە-پرەزيدەنتى ە. قوجاسباي ءسوز الىپ, اتالعان قىزمەتكە اسەت سەرىكباەۆتى تاعايىنداۋدى ۇسىنعان بولاتىن.
اسەت حاميت ۇلى سەرىكباەۆ ۇلتتىق قۇرامانىڭ مەملەكەتتىك جاتتىقتىرۋشىسى بولىپ جۇمىس ىستەگەن, بالۋان رەتىندە 2007 جىلعى ازيا چەمپيوناتىندا كۇمىس جۇلدەگەر اتانعان. سونداي-اق, ەرلان قوجاسباي ەركىن كۇرەستەن ۇلتتىق قۇرامانىڭ باپكەرلەر شتابىنا مارات ەردەنوۆتى قر ۇقك اعا جاتتىقتىرۋشىسى, اسلان بايعۇلوۆتى قر ۇقك جاتتىقتىرۋشىسى, مەيىربەك يۋسۋپوۆتى جاتتىقتىرۋشى-كەڭەسشى, داستان قاناتقانوۆتى قر ەركىن كۇرەستەن مەملەكەتتىك جاتتىقتىرۋشىسى رەتىندە ەنگىزۋدى ۇسىندى. اتالعان ۇسىنىستاردى اتقارۋشى كوميتەت بيۋروسى ماقۇلداپ, بەكىتتى.
ايەلدەر كۇرەسىنەن قازاقستان رەسپۋبليكاسى ۇلتتىق قۇراما كومانداسىنىڭ اتالعان كەزەڭدەگى ناتيجەلەرىنە سايكەس, بيۋرو جاتتىقتىرۋشىلار قۇرامىن وزگەرىسسىز قالدىرۋ جونىندە شەشىم قابىلدادى.
ەندى ساناۋلى كۇندەردەن كەيىن 25 اقپان مەن 1 ناۋرىز ارالىعىندا شىمكەنتتە كۇرەس تۇرلەرىنەن قازاقستان چەمپيوناتى وتەدى. ەلىمىزدىڭ بارلىق ايماعىنان جينالاتىن بالۋاندار باسەكەسىنەن كەيىن ۇلتتىق قۇراما جاساقتالادى. چەمپيوناتتا ۇزدىك ناتيجە كورسەتكەن سپورتشىلار حالىقارالىق جارىستاردا ەل نامىسىن قورعايتىن بولادى.
قايرات ءابىلدينوۆ