كەلىمبەتوۆ «Jumore» كومپانياسىنىڭ پرەزيدەنتىمەن كەزدەستى.

بۇگىن «استانا» حالىقارالىق قارجى ورتالىعىنىڭ (احقو) باسقارۋشىسى قايرات كەلىمبەتوۆ «Jumore» كومپانياسىنىڭ پرەزيدەنتى لۋ حۋنسيانمەن كەزدەستى. «Jumore» كومپانياسى الەمدەگى ەڭ بەلدى ترانسشەكارالىق ەلەكتروندىق پلاتفورماسى بار كومپانيا. احقو ءۇشىن قىتايلىق ارىپتەستەردىڭ قارجى تەحنولوگيالارى مەن قارجى قۇرالدارى بويىنشا تاجىربيەسى ماڭىزدى. كومپانيا الەمنىڭ 130-دان استام ەلدەرىمەن, ونىڭ ىشىندە G20 ەلدەرى جانە «جىبەك جولىنىڭ ەكونوميكالىق بەلدىگى» بويىنداعى مەملەكەتتەرمەن ىنتىماقتاسا جۇمىس ىستەيدى. «استانادا قۇرىلعان حالىقارالىق قارجى ورتالىعىنا جاڭا قارجىلىق تەحنولوگيالار مەن وسى ايماقتا جۇمىس ىستەيتىن ينۆەستورلاردى تارتۋ وتە ماڭىزدى»,-دەدى ق.كەلىمبەتوۆ. «Jumore» كومپانياسى پرەزيدەنتى لۋ حۋنسياننىڭ ايتۋىنشا, كومپانياعا جىبەك جولىندا ورنالاسقان ەلدەردىڭ نارىعى قىزىقتى. «قارجى تەحنولوگيالارى نارىعىنداعى ءبىلىم مەن تاجىربيەلەردى الماسۋعا ءبىز مۇددەلىمىز»,-دەدى «Jumore» باسشىسى. احقو مەن «Jumore» ەكى ورتالىقتىڭ 2016 جىلى قول قويعان مەموراندۋمى اياسىندا بىرلەسىپ جۇمىس ىستەيدى.