استانا قالاسىنداعى بالالار ۇيىندە بۇگىندە 117 بالا تاربيەلەنەدى. تاعدىر تاۋقىمەتىمەن ۇلكەن وتباسىندا باستارى قوسىلعان بۇلدىرشىندەردىڭ جاعدايىمەن تانىسۋ ماقساتىندا «ەگەمەن قازاقستان» گازەتىنىڭ قىزمەتكەرلەرى اتالعان ورتالىقتا بولدى. قازاق تىلىنە جەتىك بالاقايلار رەداكتسيا قىزمەتكەرلەرىنە ولەڭ وقىپ, ەرتەگى ايتىپ بەردى. باس باسىلىم باسشىسى دارحان قىدىرالى مەكەمە قىزمەتكەرلەرىنە گازەتتىڭ جاڭا جوبالارى اراسىندا وسكەلەڭ ۇرپاقتىڭ ءتالىم-تاربيەسىنە ەرەكشە كوڭىل ءبولىنىپ وتىرعانىن اڭگىمەلەپ, «ەگەمەن قازاقستان» كىتاپحاناسى» سەرياسىمەن جارىق كورگەن بىرقاتار جيناقتاردى سىيلادى جانە رەداكتسيانىڭ كاسىپوداق ۇيىمى اتىنان سىي-سىياپاتتاردى تابىس ەتتى. كەزدەسۋگە باسىلىمنىڭ سۇلەيمەن مامەت, بەرىك سادىر, دۋمان اناش جانە ورىنباي بالمۇرات سىندى شىعارماشىلىق قىزمەتكەرلەرى قاتىستى.
مەكەمە ديرەكتورىنىڭ ورىنباسارى وكسانا دزيۋبانىڭ ايتۋىنشا, تاربيەلەنۋشىلەر قالاداعى №8 جانە ت.ايبەرگەنوۆ اتىنداعى №16 ورتا مەكتەپتەردە ءبىلىم الادى. سونداي-اق, ورتالىقتىڭ جەكە بالاباقشاسىندا 10 بالا تاربيەلەنۋدە.
"بالالارىمىزدىڭ كوڭىل-كۇيى جاقسى. ويتكەنى, ەلباسىنىڭ, مەملەكەتىمىزدىڭ قامقورلىعىنىڭ ارقاسىندا زامانعا ساي ءبىلىم مەن تاربيە الۋىنا, ونەرلەرىن ۇشتاستىرۋىنا بارلىق جاعداي جاسالىپ وتىر. بي, دومبىرا, كوركەم ونەر جانە سپورت ۇيىرمەلەرى جۇمىس ىستەيدى. ءبىر ۋاق دالادا سىرعاناق, كونكي تەۋىپ وينايدى. سونداي-اق, قالا سىرتىندا «جۇلدىز» اتتى جەكە دەمالىس لاگەرىمىز بار. جاز مەزگىلىندە جانە قىستىگۇنى دەمالىس كۇندەرى بالالار وسى لاگەردە ۋاقىتتارىن ءتيىمدى وتكىزەدى. قىستا شاڭعى تەبۋ, جازدا دوپ ويناۋ سياقتى جارىستار ۇيىمداستىرىلادى," – دەيدى وكسانا ۆلاديميروۆنا.
جالپى, اتالعان مەكەمە قىزمەتكەرلەرى سوڭعى جىلدارى تاربيەلەنۋشىلەر قاتارىنىڭ ازايعانىن ايتادى. بالالار ءۇيى جانىنان وتباسىلىق قولداۋ ورتالىعى اشىلعان. مۇندا ءوزىنىڭ جان جىلۋىن, مەيىرىمىن سىيلاعىسى كەلگەن ازاماتتارعا ەسىك اشىق.
ء"ار بالانىڭ تاربيەسىن جۇرەگىمىزدەن وتكىزەمىز. بالالار ۇيىنەن كەيىنگى ومىرلەرىن دە قاداعالاپ وتىرامىز. وقۋعا ءتۇسۋى, جاتاقحاناعا ورنالاسۋى, كەيىننەن جاقسى جۇمىسقا تۇرۋى, وتباسىن قۇرۋى سىندى ماسەلەلەرىنە قولداۋ كورسەتەمىز," – دەيدى اتالعان ۇجىمدا 20 جىلدان استام ۋاقىت بويى ەڭبەك ەتىپ كەلە جاتقان اعا تاربيەشى باتەش ەسىلباەۆا.
ول بالالار ۇيىنە بۇرىنعى تۇلەكتەردىڭ دە ءجيى ات باسىن بۇرىپ, ءىنى-قارىنداستارىمەن قاۋىشىپ, تاربيەشىلەرىمەن قۋانىشتارى مەن الەۋمەتتىك جاعدايلارىن ءبولىسىپ تۇراتىنىن جەتكىزدى. سولاردىڭ ءبىرى, ل.گۋميلەۆ اتىنداعى ەۇۋ جۋرناليستيكا جانە ساياساتتانۋ فاكۋلتەتىندە ءبىلىم الىپ جاتقان ۆلاديسلاۆ ەسىمدى تاربيەلەنۋشى وقۋىن بيىل تامامداماق. وزگە دە تۇلەكتەر سلاۆا سياقتى ۇشقان ۇياسىن ۇمىتپايدى.
دۋمان اناش, "ەگەمەن قازاقستان"