وتاندىق فارماتسەۆتيكا جانە مەديتسينالىق ءوندىرىستىڭ نەگىزىن قالاعان قوعام قايراتكەرى سەرىك سۇلتانوۆ 58 جاسىندا ومىردەن وزدى, دەپ جازادى palata.kz.
سەرىك ەگەل ۇلى سۇلتانوۆ 1959 جىلى 9 قازاندا پاۆلودار وبلىسى پانفيلوۆ اۋىلىندا دۇنيەگە كەلگەن. 1980 جىلى پاۆلودار پەداگوگيكالىق ينستيتۋتىن «ماتەماتيكا» ماماندىعى بويىنشا تامامداعان. ەڭبەك جولىن ورتا مەكتەپتە جانە ەرتىس اۋداندىق بلكجو حاتشىلىعىنان باستاعان, ودان كەيىن پاۆلودار وبلىستىق بلكجو كوميتەتىنىڭ ءبولىم مەڭگەرۋشىسى قىزمەتىن اتقاردى.
1990–1998 جىلدارى – «مەد-پوليمەر» اق باس ديرەكتورى, 1998 جىلدان باستاپ دارىلىك زاتتار ساراپتاماسى ۇلتتىق ورتالىعىنىڭ" «ءدارى-دارمەك» رمكك باس ديرەكتورى قىزمەتىن اتقارعان. 2002-2003 جىلدارى قازاقستان رەسپۋبليكاسى دەنساۋلىق ساقتاۋ مينيسترلىگى فارماتسيا, فارماتسەۆتيكالىق جانە مەديتسينالىق ونەركاسىپ كوميتەتىنىڭ توراعاسى بولدى.
2004 جىلدان باستاپ «قازاقستاننىڭ فارممەديندۋسترياسى» فارماتسەۆتيكالىق جانە مەديتسينالىق ءونىم وندىرۋشىلەرى قاۋىمداستىعىنىڭ باسشىسى جانە «مەديتسينالىق تەحنيكا جەتكىزۋشىلەرىنىڭ قاۋىمداستىعى» زتب توراعاسى, سونىمەن قاتار «اتامەكەن» قر ۇلتتىق كاسىپكەرلەر پالاتاسى تورالقاسى فارماتسەۆتيكا, مەديتسينا ونەركاسىبى مەن مەديتسينالىق قىزمەتتەر كوميتەتىنىڭ مۇشەسى بولعان.
سونداي-اق, 2007 جىلدان باستاپ قازاقستان رەسپۋبليكاسى پرەزيدەنتى جانىنداعى كاسىپكەرلەر كەڭەسىنىڭ مۇشەلىگىندە, ال 2008 جىلدان قازاقستان رەسپۋبلكاسىنىڭ كاسىپكەرلىك ماسەلەلەرى جونىندەگى اگەنتتىگىنىڭ ساراپشىلار كەڭەسىنىڭ قۇرامىندا جانە «ۇلتتىق مەديتسينالىق حولدينگ» اق ديرەكتورلار كەڭەسىنىڭ مۇشەسى بولدى
«اتامەكەن» قر ۇلتتىق كاسىپكەرلەر پالاتاسى سەرىك سۇلتانوۆتىڭ دۇنيەدەن وتۋىنە بايلانىستى مارقۇمنىڭ وتباسى مەن تۋعان-تۋىستارىنا قايعىرىپ كوڭىل ايتادى.
قارالى جيىن 2017 جىلى 21 اقپاندا ساعات 9-30-دا ۇلتتىق عىلىمي كارديوحيرۋرگيا ورتالىعىندا وتەدى. مەكەن-جايى: استانا قالاسى, تۇران داڭعىلى, 38.