قازاقستاندىق ءانشى ديماش قۇدايبەرگەنگە قولداۋ كورسەتىپ وتىرعان BGTalent پروديۋسەرلىك ورتالىعىنىڭ نەگىزىن قالاۋشى ءارى باس ديرەكتورى نيە سينيۋان sohu.com-عا بەرگەن سۇحباتىندا ديماش تۋرالى پىكىر ءبولىستى, دەپ حابارلادى قازاقپارات.
سۇحبات بارىسىندا ول «I am a singer» بايقاۋىنىڭ بەسىنشى كەزەڭىندە ديماشقا نە ءۇشىن «Uptown Funk» ءانىن بەرگەنى تۋرالى ايتتى.
«جانكۇيەرلەردىڭ كوبىسى ديماشتىڭ بەسىنشى كەزەڭدەگى ءانى ونىڭ التىنشى ورىنعا سىرعىپ كەتۋىنە سەبەپ بولدى, بۇل ءان ديماشقا كەلمەيدى دەپ جاتىر. ديماش جاس ءارى تالانتتى ءانشى ەكەنىن ءبارى مويىندادى. مەنىڭشە, ول وسى باسەكەنىڭ شەڭبەرىندە تەك جەڭىس ءۇشىن ءان شىرقاپ, ءوز مۇمكىندىگىن شەكتەپ قويماۋى كەرەك. «I am a singer» بايقاۋى قىتايعا عانا ەمەس شىعىس ازيانىڭ كوپتەگەن ەلدەرىندە تانىمال. ديماش وسى ساحنادان ءوزىنىڭ مۋزىكاداعى مۇمكىندىگىن ودان ارى قاراي كەڭەيتە بەرۋى ءتيىس. سوندىقتان وزىنە ۇناعان ءاندى تاڭداپ, ونەردەگى جاڭا باعىتتارىن دا اشىپ كورۋگە تىرىستىق», - دەدى نيە سينيۋان .
ونىڭ ايتۋىنا قاراعاندا, پروديۋسەرلىك ورتالىق ديماش ارقىلى قىتايلىق كورەرمەندەر مەن جاستاردىڭ مۋزىكاعا جانە جۇلدىزدارعا دەگەن تۇسىنىگىن وزگەرتۋگە تىرىسقان. ديماشتىڭ وزگەشە ءستيلى قىتايلىق جاستاردى تەك بەت-الپەتكە كوڭىل بولەتىن كورەيالىق مۋزىكا مادەنيەتىنەن الىستاتۋعا سەپتىگىن تيگىزگەن.
«جىل سوڭىنا دەيىن ديماشتىڭ جەكە ءان البومى جارىق كورەدى. ودان كەيىن جەكەلەگەن ايماقتاردا جەكە كونتسەرتتەر ۇيىمداستىرۋدى جوسپارلاپ وتىرمىز. ءارى قارايعى دامۋ بارىسى قازاقستانداعى وقۋىن اياقتاپ, اعىلشىن تىلىمەن فرانتسۋز تىلدەرى دەڭگەيىن جوعارىلاتقاننان كەيىن جاسالادى», – دەدى نيە سينيۋان.