"اق جول" پارتياسىنىڭ پارلامەنتتەگى فراكتسيا باسشىسى ازات پەرۋاشەۆ ءوز ۇسىنىسىن ايتتى.
«اق جول» پارتياسى باسشىسى ازات پەرۋاشەۆ زاڭسىز تەكسەرىس جۇرگىزگەن شەنەۋنىكتەردى تەكسەرىستىڭ شىعىنىن وتەۋگە ماجبۇرلەۋ كەرەكتىگىن ايتتى. بۇل ۇسىنىس ۇكىمەتكە باعىتتالعان دەپۋتاتتىق ساۋالدا ايتىلدى.
ازات پەرۋاشەۆ باس پروكۋراتۋرانىڭ قاراعاندىداعى كوشپەلى القا وتىرىسىنان مىسال كەلتىردى. 2015 جىلى وڭىردە جالعان كاسىپكەرلىك بويىنشا 437 ءىس قوزعالعان. سونىڭ ىشىندە سوتقا جەتكەنى تەك 7-ەۋى عانا, ياعني 1,5 پايىز. 2016 جىلى قوزعالعان ىستەر 948-گە وسكەن. ال سونىڭ ىشىندە سوتقا جەتكەنى تەك 6 پايىزى عانا.
«دەمەك, 94-98 پايىز ءىس نەگىزسىز قوزعالادى. نەمەسە كادىمگى پارا بەرۋ ارقىلى شەشىلەدى. ال ەلدەگى 70 مىڭ ققس تولەۋشىلەرىنىڭ 35 مىڭى ءبىر عانا باپ بويىنشا سانكتسياعا ىلىكتى. وسىنى كورە وتىرىپ مەملەكەت كولەڭكەلى بيزنەستىڭ قايدان شىعاتىنىنا باس قاتىرادى", - دەدى دەپۋتات.
ونىڭ ايتۋىنشا, تەكسەرىس كەزىندە قۇجاتتار, مورلەر, بانكتىك جانە بۋحگەلتەرلىك ەسەپشوتتار تاركىلەنىپ, قارجى وپەراتسيالارى توقتاتىلادى. ياعني, بيزنەس توقتاپ قالادى. بيزنەس, ءبىر سوزبەن ايتقاندا, تاقىرعا وتىرادى.
ازات پەرۋاشەۆ نەگىزىنەن كىنالىلەر كاسىپكەرلەر ەمەس, جەمقور شەنەۋنىكتەر ەكەنىن ايتتى. 2014 جىلدىڭ وزىندە عانا جالعان كاسىپكەرلىككە ارالاسقانى ءۇشىن وقو, اقمولا, جامبىل, قوستاناي وبلىستارىنىڭ سالىق ورگاندارىنىڭ 16 جەتەكشىسى جاۋاپقا تارتىلدى.
«دەگەنمەن, ولاردى جاۋاپقا تارتىپ قانا وتىرۋ بيزنەسكە كەلگەن شىعىندى قايتارمايدى", - دەدى دەپۋتات.
"اكىمشىلىك قۇقىق بۇزۋشىلىق كودەكسى مەن قىلمىستىق كودەكس لاۋازىمدى تۇلعالاردىڭ كاسىپكەرلەرگە كەلتىرگەن زيانىن وتەۋدى قاراستىرماعان. كاسىپكەر شىعىندى وتەپ العاننىڭ وزىندە شەنەۋنىكتىڭ جەكە باسىنان ەمەس, مەملەكەتتىك ورگاننان, ياعني بيۋدجەتتەن الادى. ال ول بيۋدجەتتى تولتىراتىن سول كاسىپكەرلەردىڭ وزدەرى. وزىنە كەلگەن شىعىندى قايتارۋ ءۇشىن كاسىپكەر ءوزى تولەگەن سالىقتى الۋى كەرەك پە؟ وندا قىلمىسقا جەكە باسىنىڭ جاۋاپ بەرۋى دەگەن قايدا قالدى؟" - دەدى پەرۋاشەۆ.
ءسوز سوڭىندا دەپۋتات نەگىزسىز تەكسەرىس جۇرگىزىپ كاسىپكەرلەرگە زيان كەتلىرگەن شەنەۋنىكتەردىڭ جەكە باسىن جازالاۋ كەرەكتىگىن ۇسىندى.