ارگەنتينانىڭ پۋنتا-تومبو تۇبەگىن پينگۆيندەر قالاسى دەپ ەسەپتەيدى. قىركۇيەك پەن ناۋرىز ارالىعىندا بۇل جەردە ولار بۇرىن-سوڭدى بولماعان مولشەردە جينالادى. ال بيىل اتالعان تۇبەككە جينالعان قۇستاردىڭ سانى رەكوردتى دەڭگەيگە جەتىپتى. بۇل تۋرالى nat-geo.ru حابارلادى.
ماگەللان پينگۆينى – بويى 50-80 سم. وزگەلەرى سياقتى بۇلاردىڭ دا وتباسى ەركەك جانە ۇرعاشىدان تۇرادى. ءبىر قىزىعى, جىل سايىن تەك ءبىر ۇياعا عانا جۇمىرتقالاۋدى ءجون كورەدى. وسى ءۇشىن ولار مىڭداعان شاقىرىمدى ارتقا قالدىرىپ, پۋنتا-تومبو قورىعىنا ءجۇزىپ كەلەدى. جۇمىرتقاسىن 40 كۇندە باسىپ شىعارادى. جەر بەتىندە شامامەن ولاردىڭ 1,8 ملن جۇبى بار.
مالىمەتتەرگە سايكەس, بۇل مەكەن پينگۆيندەردىڭ جۇمىرتقالاۋى ءۇشىن وتە ىڭعايلى ورىنداردىڭ ءبىرى بولىپ ەسەپتەلەدى. سەبەبى, سۋى بالىققا تولى ءارى قاۋىپ كەلتىرەرلىك جىرتقىشتارى دا وتە از.
بيىل پۋنتا-تومبوعا شامامەن 1 ميلليون ماگەللان پينگۆينى كەلدى. بۇعان دەيىن ءدال وسىنداي كولەمدە ەشقاشان كەلمەگەن. سەبەبى, وتكەن عاسىردىڭ باسىندا ولار جويىلىپ كەتۋدىڭ الدىندا بولعان. عالىمداردىڭ ايتۋىنشا, ولار كليماتتىڭ وزگەرۋىنەن سونداي-اق, بالىقتىڭ كوپتىگىنەن وسىندا تارتىلعان.