قاڭتار ايىنىڭ سوڭىنداعى جاعداي بويىنشا, ۇلتتىق بانك اينالىمنان 2,1 ترلن. تەڭگەنى شىعاردى, دەپ حابارلايدى قازاقپارات.
«2017 جىلدىڭ قاڭتارىنان, قارجى مينيسترلىگى قارجى نارىعىنىڭ قاتىسۋشىلارى اراسىندا مەملەكەتتىك باعالى قاعازداردى ورنالاستىرا باستادى. 2015 جىلدىڭ قازان ايىنان العاش رەت قارجى مينيسترلىگى بارلىق قاتىسۋشىلار ءۇشىن قارجى نارىعىنداعى جاعدايعا ساي كەلەتىن مەملەكەتتىك باعالى قاعازداردى شىعاردى. سوڭعى كەزدە ينفلياتسيامەن سايكەس كەلەتىن مەملەكەتتىك باعالى قاعازدار تەك بىرىڭعاي جيناقتاۋشى زەينەتاقى قورى ءۇشىن شىعارىلىپ كەلگەن بولاتىن. 2017 جىلدىڭ 1,5 ايىندا 144,4 ملرد. تەڭگە شىعارىلدى», - دەدى ۇلتتىق بانك باسشىسى دانيار اقىشەۆ بريفينگ بارىسىندا.
ول سونىمەن قاتار 2016 جىلدىڭ سوڭىندا رەتتەۋشى ورگان مەملەكەتتىك باعالى قاعازداردى 5 جىلعا دەيىنگى مەرزىمگە بەرە باستاعاندىعىن ەسكە سالدى, بۇل ءوز كەزەگىندە قارجى مينيسترلىگىنە ورتامەرزىمدى قارىز قاراجاتتىڭ قۇنىنا قاتىستى باعىت بەردى.
جالپى, قاڭتار ايىنىڭ سوڭىنداعى جاعداي بويىنشا, ۇلتتىق بانك اينالىمنان 2,1 ترلن. تەڭگەنى شىعاردى. قىسقامەرزىمدى نوتالاردىڭ اينالىمداعى كولەمى 2,8 ترلن تەڭگەگە جەتتى.
اقشالاي نارىقتىڭ ستاۆكالارى بەكىتىلگەن ءدالىزدىڭ شەڭبەرىندە قالۋدا. 2017 جىلدىڭ 17 اقپانىندا رەپو بىرمەزگىلدى وپەراتسيالارىنىڭ ستاۆكاسى 11,11%-دى قۇرادى.
«وسىلايشا, ۇلتتىق بانك ينفلياتسيا بويىنشا ماقساتتار مەن ماكروەكونوميكالىق تۇراقتىلىق اراسىنداعى تەپە-تەڭدىكتى ساقتاۋدا, بۇل تۇپتەپ كەلگەندە, ەكونوميكالىق وسىمگە وڭ اسەرىن بەرەدى. 2016 جىلدىڭ سوڭىنداعى جانە 2017 جىلدىڭ قاڭتارىنداعى ەكونوميكالىق بەلسەندىلىك ءبىرشاما ارتتى», - دەيدى ۇلتتىق بانك باسشىسى.