2016 جىلى 10,5 ملن. شارشى مەتر تۇرعىن ءۇي پايدالانۋعا بەرىلدى. بۇل شامامەن 90 مىڭ تۇرعىندى قامتيدى. بۇل تۋرالى بۇگىن قر يننوۆاتسيالار جانە دامۋ مينيسترلىگىنىڭ القا ماجىلىسىندە اتالعان ۆەدومستۆو باسشىسى جەڭىس قاسىمبەك مالىمدەدى.
ءمينيستردىڭ ايتۋىنشا, 2016 جىلى قۇرىلىس سالاسىنا قۇيىلعان ينۆەستيتسيا كولەمى 830 ملرد. تەڭگەنى قۇرادى. بۇل كورسەتكىش 2015 جىلى 740 ملرد تەڭگە بولعان.
"جۇرگىزىلگەن رەفورمالار ناتيجەسىندە كاسىپكەرلەر ءۇشىن قۇرىلىس جۇرگىزۋگە رۇقسات الۋ مەرزىمى 3 ايدان 1 ايعا دەيىن قىسقاردى. اتالعان كورسەتكىشتەر بويىنشا قازاقستان بۇكىلالەمدىك بانك رەيتينگىسىندە 152 ورىننان 22 ورىنعا كوتەرىلدى. "نۇرلى جەر" تۇرعىن ءۇي قۇرىلىسىنىڭ بىرىڭعاي باعدارلاماسى ازىرلەنىپ, ونىڭ اياسىندا 1,5 ملن. تۇرعىن ءۇي سالىناتىن بولادى. ال, 2017 جىلى 100 مىڭ تۇرعىن ءۇي جوسپارلانىپ وتىر", - دەدى مينيستر.
باعدارلامانىڭ نەگىزگى مىندەتتەرىنىڭ ءبىرى تۇرعىن ءۇي قۇرىلىسىن بيۋدجەتتەن تىس تىكەلەي قارجىلاندىرۋعا اۋىستىرۋ.
"نەگىزگى باسىمدىق جەكە قۇرىلىسشىلاردى ىنتالاندىرۋ ارقىلى نارىقتىق قاتىناستى جانە تۇرعىن ءۇي قۇرىلىس جيناق بانكى جۇيەسىن دامىتۋعا بەرىلمەك. ءسوزىمدى قورىتا كەلە ايتارىم, مەملەكەت باسشىسى قويعان بارلىق مىندەتتەر دەر كەزىندە جانە ساپالى ورىندالاتىن بولادى" - دەدى جەڭىس قاسىمبەك.