اقوردانىڭ ءباسپاسوز قىزمەتى فەيسبۋكتاعى پاراقشاسىندا 2007 جىلعى كونستيتۋتسيالىق رەفورماعا قاتىستى فوتوسۋرەتتەردى جاريالادى. «وسىدان 10 جىل بۇرىن ەلىمىزدە تۋرا قازىرگىدەي كونستيتۋتسيالىق-قۇقىقتىق رەفورما قىزۋ تالقىلانعان بولاتىن. 2007 جىلعى 20 اقپاندا «كونستيتۋتسياعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەۋ جونىندەگى جۇمىس توبىنىڭ ءبىرىنشى وتىرىسى ءوتتى. زاڭنىڭ ءوزى 2007 جىلعى 21 مامىردا قابىلداندى. ءتيىستى كونستيتۋتسيالىق وزگەرىستەرگە دايىندىق الدىندا دەموكراتيالىق رەفورمالار باعدارلاماسىن ازىرلەۋ جانە ناقتىلاۋ جونىندەگى مەملەكەتتىك كوميسسيا اۋقىمدى جۇمىس جۇرگىزگەن ەدى. ونىڭ قورىتىندى وتىرىسى 2007 جىلعى 19 اقپاندا وتكەن بولاتىن.
وسىلايشا, سول جىلى اتا زاڭىمىزعا ەلەۋلى وزگەرىستەر مەن تولىقتىرۋلار ەنگىزىلدى. نەگىزىنەن كونستيتۋتسيانىڭ پرەزيدەنت پەن پارلامەنتكە قاتىستى بولىمدەرى وزگەرىسكە ۇشىرادى. ماسەلەن, ءماجىلىستى جاساقتاۋدىڭ جاڭا تەتىگى ۇسىنىلدى, قازاقستان حالقى اسسامبلەياسىنىڭ كونستيتۋتسيالىق مارتەبەسى بەكىتىلدى جانە ت.ب. مۇراعاتتاعى وسى تاريحي وقيعالاردى جاڭعىرتاتىن فوتوسۋرەتتەردى فەيسبۋك پايدالانۋشىلارى نازارىنا ۇسىنىپ وتىرمىز», دەلىنگەن جازبادا.