جوعارعى سوت توراعاسى قايرات ءمامي جولداۋدى ورىنداۋ جانە بيلىك تارماقتارىنىڭ اراسىنداعى وكىلەتتىكتەردى قايتا ءبولۋ رەفورماسىن جۇرگىزۋ بويىنشا سۋديالار كورپۋسىنىڭ الدىندا تۇرعان مىندەتتەردى ىسكە اسىرۋ باعىتىنداعى جوعارعى سوتتىڭ جۇمىسى تۋرالى حاباردار ەتتى, دەپ جازادى ۆەدومستۆانىڭ ءباسپاسوز قىزمەتى.
«مەملەكەت باسشىسىنىڭ كونستيتۋتسيالىق رەفورما مەن جولداۋ شەڭبەرىندەگى باستامالارى ءبىزدىڭ ەلىمىز ءۇشىن ايرىقشا ستراتەگيالىق ماڭىزعا يە. ولار قازاقستان ءۇشىن ىشكى جانە سىرتقى سىن-قاتەرلەردى انىقتاپ, ولاردى ەڭسەرۋدىڭ جولدارىن تابۋعا مۇمكىندىك بەرەدى. جالپى العاندا, وسى رەفورمالار مەملەكەتىمىزدى ودان ءارى دامىتىپ, الەمنىڭ دامىعان 30 ەلىنىڭ قاتارىنا قوسىلۋىن قامتاماسىز ەتۋى ءتيىس», - دەدى جوعارعى سوت توراعاسى.
اتالعان باستامالاردىڭ تابىستى ىسكە اسۋى, نەگىزىنەن, قوعامنىڭ ونى دۇرىس قابىلداۋى مەن قولداۋىنا, قويىلعان بارلىق مىندەتتەردىڭ تۇپكى ءمانىن ۇعىنۋىنا بايلانىستى ەكەندىگى اتاپ ءوتىلدى. «وسى رەتتە عىلىم سالاسىنىڭ وكىلدەرى مەن پروفەسسور-وقىتۋشىلار قاۋىمداستىعىنىڭ اتقاراتىن ءرولى زور. ءدال وسى عىلىمي-اعارتۋشىلىق ورتادا, سىزدەردىڭ ءپرينتسيپتى پىكىرلەرىڭىز, ءتىپتى سىني ويلارىڭىز ورتاعا سالىنىپ, ورىندى شەشىمدەر قابىلدانىپ, مەملەكەتتىك رەفورمالاردى جۇزەگە اسىرۋدىڭ جولدارى قاراستىرىلۋى قاجەت. بۇگىنگى كونفەرەنتسيانىڭ پراكتيكالىق ماڭىزى دا وسىندا», - دەدى ق.ءمامي.
كونفەرەنتسياعا قاتىسۋشىلار كونستيتۋتسيانى وزگەرتۋ بويىنشا زاڭ جوباسىنا سوت جۇيەسى ەنگىزگەن ۇسىنىستار تۋرالى حاباردار بولدى. ۇسىنىستار سۋديالارعا قاتىستى تالاپتاردى ءتيىستى كونستيتۋتسيالىق زاڭعا اۋىستىرۋ جانە جوعارى سوت ورگانىنىڭ ءۇش ساتىلى سوت جۇيەسىنە كوشۋى جانە وعان كاسساتسيالىق ساتى مارتەبەسىنىڭ بەرىلۋى ەسكەرىلە وتىرىپ, جوعارعى سوتتىڭ مارتەبەسى تۋرالى اتا زاڭنىڭ 79 جانە 81-باپتارىنا قاتىستى. تۇزەتۋلەردىڭ ءۇشىنشى بولىگى سوت باقىلاۋىن كۇشەيتۋ ماسەلەلەرىمەن بايلانىستى.
سوت جۇيەسىنىڭ بارلىق باستامالارى قولداۋ تاپقانى جانە مەملەكەت باسشىسىنا تالقىلاۋ ءۇشىن ۇسىنىلعان زاڭ جوباسىنا ەنگىزىلگەنى ايتىلدى. «جۇمىس توبىنىڭ مۇشەسى بولعاندىقتان, ماعان زاڭگەرلەر قاۋىمى دا جۇگىنۋدە. ولار سوتتار جۇمىسىنان بولەك وزدەرىنىڭ سىندارلى ءارى بارىنشا دايەكتى ۇسىنىستارىن ەنگىزۋدە. سولاردىڭ قاتارىندا زاڭنامالىق پروتسەس, ۇكىمەت مۇشەلەرىنىڭ ەسەپتىلىگى, كونستيتۋتسيالىق كەڭەستىڭ وكىلەتتىگى مەن وزگە دە ماسەلەلەر بويىنشا ۇسىنىستار بار», - دەدى جوعارعى سوت توراعاسى.
ق.ءمامي مەملەكەتتىك بيلىك تارماقتارى اراسىنداعى وكىلەتتىكتەردى قايتا ءبولۋدىڭ ەكىنشى كەزەڭىنىڭ شەڭبەرىندە كونستيتۋتسيالىق زاڭدار مەن وزگە دە زاڭناماعا ەنگىزىلەتىن وزگەرىستەر مەن تولىقتىرۋلار قارالاتىنىن اتاپ ءوتتى. وسى ورايدا جوعارعى سوت ۇلت جوسپارىن ىسكە اسىرۋ اياسىنداعى زاڭنامانى ودان ءارى جەتىلدىرۋ, سونداي-اق ەكونوميكالىق ىنتىماقتاستىق جانە دامۋ ۇيىمىنىڭ ۇسىنىمدارىن ورىنداۋعا بايلانىستى شارالاردى ۇسىندى.
جوعارعى سوت توراعاسى جولداۋدا كوزدەلگەن باسىمدىقتار بارلىق سوتتار ءۇشىن جۇمىستىڭ ماڭىزدى باعىتتارى بولىپ تابىلاتىندىعىن ايتتى. «سوت جۇيەسى قۇقىق ۇستەمدىگى مەن بارشانىڭ زاڭ الدىنداعى تەڭدىگىن قامتاماسىز ەتە وتىرىپ, جولداۋدى تابىستى ىسكە اسىرۋدىڭ ماڭىزدى بۋىنى بولىپ تابىلادى. وسى ورايدا سوتتار سوت جۇيەسىنە ءتان باعىتتار بويىنشا عانا ەمەس, ءوز قۇزىرەتى شەڭبەرىندە بارلىق باسىم باعىتتار بويىنشا بەلسەندى جۇمىس ىستەۋدە», - دەدى ق.ءمامي.
سوت تورەلىگىن جۇزەگە اسىرۋ بويىنشا كۇندەلىكتى جۇمىس سۋديالارعا نەعۇرلىم ءجيى كەزەدەسەتىن الەۋمەتتىك-ەكونوميكالىق ماسەلەلەردىڭ قىسقاشا ءتىزىمىن تۇراقتى تۇردە ايقىنداپ, ولار بويىنشا ءوز شەشىمدەرىن ۇسىنۋعا مۇمكىندىك بەرەدى. سولاردىڭ قاتارىندا جەكە مەنشىكتى قورعاۋ, شەتەلدىك ينۆەستيتسيالاردى تارتۋ, بۇقارالىق كاسىپكەرلىكتى قولداۋ, سالىق-بيۋدجەت ساياساتىن جاقسارتۋ, بيۋدجەتتى وڭتايلى قولدانۋ سالالارى اتالدى.
جوعارعى سوت جولداۋدىڭ باسىمدىقتارى بويىنشا سوت پراكتيكاسىنا قورىتۋ جۇرگىزۋ, زاڭنامانى قايتا تەكسەرىستەن وتكىزۋ جانە ءتيىستى ورگاندارعا كەشەندى ۇسىنىستار ازىرلەۋ بويىنشا جۇمىستى باستاپ كەتتى.
قارجىلىق سەكتوردى «قايتا جۇكتەۋ» بولىگىندە كوللەكتورلىق قىزمەت تۋرالى زاڭ جوباسى بويىنشا جانە بانكتەرگە ارنايى تالاپ-ارىزداردىڭ ەسكىرۋ مەرزىمىنە قاتىستى بىرقاتار تۇزەتۋلەر ۇسىنىلدى.
اكىمشىلىك جانە قىلمىستىق زاڭنامانى ىزگىلەندىرۋ ماسەلەسىنە ءجىتى نازار اۋدارىلۋدا. قوعامدىق قاۋىپتىلىگى تومەن ەكونوميكالىق قىلمىس قۇرامدارىن قىلمىسسىزداندىرۋ ماسەلەلەرىن پىسىقتاۋ باستالدى.
جوعارى سوت ورگانىنىڭ باستامالارى – قازىرگى قوعامداعى سوت جۇيەسى ءرولىنىڭ ناقتى كورىنىسى. «وسى ورايدا سوتتار دا ەلمەن بىرگە دامۋ ۇستىندە جانە الداعى جاڭعىرۋعا بارىنشا ءازىر» - دەدى ق.ءمامي جانە كونفەرەنتسيانىڭ قورىتىندىسى بويىنشا ازىرلەنەتىن ۇسىنىمدار مەملەكەت باسشىسى ۇسىنعان رەفورمالاردى ساپالى ىسكە اسىرۋ ءۇشىن بارىنشا پايدالى بولادى دەگەن سەنىم ءبىلدىردى.
كونفەرەنتسيانىڭ كۇن تارتىبىنە سايكەس وعان قاتىسۋشىلار ءۇش سەكتسيا شەڭبەرىندە مەملەكەت باسشىسىنىڭ قازاقستان حالقىنا جولداۋى تۇرعىسىنان تاۋەلسىز قازاقستان رەسپۋبليكاسىنىڭ كونستيتۋتسيالىق-قۇقىقتىق دامۋ ماسەلەلەرىن, جاڭعىرۋ كەزەڭىندەگى ەلىمىزدىڭ سىرتقى ساياساتىنىڭ باسىمدىقتارى مەن ەكونوميكالىق ءوسىمنىڭ جاڭا مودەلىندەگى ءبىلىم بەرۋ ماسەلەلەرىن تالقىلادى.
كونفەرەنتسياعا قاتىسۋشىلار مەملەكەت باسشىسى تالقىلاۋعا ۇسىنعان كونستيتۋتسياعا تۇزەتۋلەر ەنگىزۋدى كوزدەيتىن زاڭ جوباسىنا جوعارى باعا بەردى. جۇمىس توبىنىڭ قاراۋىنا جولداناتىن بىرقاتار ۇسىنىستار ايتىلدى.