فەرمەرلەرگە سۋبسيديا بەرۋ تەتىكتەرى قايتا قارالادى

ۆيتسە-پرەمەر – اۋىل شارۋاشىلىعى ءمينيسترى وقو اۋىل شارۋاشىلىعى كووپەراتيۆتەرىنىڭ جۇمىسىمەن تانىستى, دەپ جازادى اۋىل شارۋاشىلىعى مينيسترلىگىنىڭ رەسمي سايتى.

ۆيتسە-پرەمەر – اۋىل شارۋاشىلىعى ءمينيسترى 72 جقش مەن 10 شارۋا قوجالىقتى بىرىكتىرگەن «ەت اگرو مانكەنت» اۋىل شارۋاشىلىعى كووپەراتيۆىنە باردى. اتالمىش كووپەراتيۆ جىلىنا 7 مىڭ تونناعا جۋىق ەت وندىرەدى. «اوك-ءتىڭ ەل ەكونوميكاسىنىڭ درايۆەرى رەتىندە قالىپتاسۋىندا اۋىل شارۋاشىلىعى كووپەراتيۆتەرىنىڭ ورنى زور. ونىڭ الەۋەتىن پايدالانۋ ارقىلى اۋىلدى كوتەرۋگە بولادى. كووپەراتسيا – اۋىل بولاشاعى», – دەپ اتاپ ءوتتى ا.مىرزاحمەتوۆ. ەلباسى تاپسىرماسىنا سايكەس مەملەكەتتىك قولداۋ شارالارى قايتا قاراستىرىلۋدا. قازىرگى تاڭدا 11 ءتيىمسىز سۋبسيديا ءتۇرى الىپ تاستالىپ, 35 سۋبسيديا ءتۇرىنىڭ نورماتيۆتەرىنە وزگەرىستەر ەنگىزىلۋدە. ناتيجەسىندە, سول بيۋدجەت كولەمى ارقىلى وندىرۋشىلەردىڭ, ونىڭ ىشىندە, ەڭ الدىمەن, ۇساق شارۋاشىلىقتار مەن كووپەراتيۆتەردىڭ مەملەكەتتىك قولداۋ شارالارىمەن قامتىلۋى 7,5 ەسەگە (67 مىڭنان 500 مىڭعا دەيىن) ۇلعايادى. اۋىل شارۋاشىلىعى كووپەراتيۆتەرىن قۇرۋداعى بەلسەندىلىكتى ارتتىرۋ ءۇشىن مينيسترلىك تاراپىنان ءسۇت قابىلداۋ جانە مال بورداقىلاۋ پۋنكتتەرىن العاشقى جارناسىز يەلەنۋ سحەماسى جاسالدى. وعان سايكەس «اۋىل شارۋاشىلىعىن قارجىلاي قولداۋ قورى» اق ارقىلى ليزينگكە بەرۋ قاراستىرىلعان. ياعني, العاشقى جارناعا ينۆەستيتسيالىق سۋبسيديانىڭ جالپى باعاسىنىڭ 50 پايىزىن پايدالانۋ قاراستىرىلۋدا. سونداي-اق, مەملەكەت تاراپىنان كووپەراتيۆتەرگە تاپسىرىلعان 1 ليتر سۇتكە 10 تەڭگە بەرىلمەك. ءىرى قارا مال باسىنا 20 مىڭ تەڭگە جانە ۇساق مالعا 1500 تەڭگە. ايتا كەتەيىك, مەملەكەت باسشىسىنىڭ تاپسىرمالارىن ورىنداۋ ماقساتىندا ەلىمىزدىڭ بارلىق ايماعىندا اۋىل شارۋاشىلىعى كووپەراتيۆتەرىن قۇرۋ بويىنشا ءتۇسىندىرۋ جۇمىستارى جۇرگىزىلدى. بيىل 250 اۋىل شارۋاشىلىعى كووپەراتيۆىن قۇرۋ جوسپارلانۋدا. بۇدان بولەك, اۋىل شارۋاشىلىعى وندىرۋشىلەرى ءۇشىن اقپاراتتىق-كونسۋلتاتيۆتىك تۇرعىدا Fermers.kz سايتى مەن call-ورتالىعى (بارلىق باعىتتاردان قوڭىراۋ شالۋ تەگىن) قىزمەت كورسەتۋدە. جالپىلاي العاندا, وقو اۋماعىندا 2017 جىلعا ارنالعان ءىس-شارالار جوسپارىنا سايكەس 18 اۋىل شارۋاشىلىعى كووپەراتيۆى, 15 ءسۇت قابىلداۋ پۋنكتى, 429 وتباسىلىق مال بورداقىلاۋ الاڭى, 4 مال سويۋ پۋنكتى, 5 جەمىس-كوكەنىس ازىرلەۋ پۋنكتى جانە 75 وتباسىلىق جىلىجاي ازىرلەۋ جوسپارلانۋدا. بۇدان كەيىن, ۆيتسە-پرەمەر «نۇرلى جول» باعدارلاماسى بويىنشا شىمكەنت قالاسى, دوستىق شاعىن اۋدانىنداعى 1200 ورىندىق مەكتەپ قۇرىلىسى بارىسىمەن تانىستى.