توعىز جىل بۇرىن اتى قويىلعان كىتاپحاناعا تولقۇجات ەندى بەرىلدى

ءبىر قىزىعى, كەڭەس وكىمەتى كەزىندە ا.گايدار اتىن يەمدەنگەن بۇل كىتاپحاناعا حامزا ەسەنجانوۆتىڭ ەسىمى جازۋشىنىڭ 100 جىلدىعى قارساڭىندا, ياعني 2008 جىلى بەرىلگەن بولاتىن. سودان بەرى ءتۇرلى جيىنداردا, ءتىپتى ءباسپاسوز بەتىندە «حامزا كىتاپحاناسى» اتالعانىمەن, كىتاپ ورداسىنىڭ «كۋالىگى» وسى كەزگە دەيىن وزگەرمەگەن ەكەن. جاقىندا عانا ۇكىمەتتىڭ №827 قاۋلىسىنا سايكەس وبلىستىق بالالار جانە جاسوسپىرىمدەر كوممۋنالدى مەملەكەتتىك مەكەمەسى «باتىس قازاقستان وبلىسىنىڭ مادەنيەت, ارحيۆتەر جانە قۇجاتتاما باسقارماسى, حامزا ەسەن­جانوۆ اتىنداعى وبلىستىق بالالار جانە جاس­وسپىرىمدەر كىتاپحاناسى» بولىپ وزگەرتىلدى. كىتاپحانا ۇجىمى بۇل اتاۋلى كۇندى سالتاناتتى جيىنمەن اتاپ ءوتتى. ءومىرىنىڭ 20 جىلىن ايداۋدا وتكىزگەن قايسار جازۋشى تۋرالى ەستەلىكتەر ايتىلدى. ماحامبەت اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتتەرى «اق جايىق» تريلوگياسىنان ساحنالىق كورىنىستەر قويدى. پاتشالى رەسەي جانە كەڭەس بيلىگى كەزىندە وتارلىق ورىستاندىرۋ ورتالىعىنىڭ ءبىرى بولعان ورال قالاسىندا وزگەرىس كۇتىپ تۇرعان اتاۋلار ءالى كوپ. وبلىس ورتالىعىنىڭ ىرگەسىندەگى ەلدى­مەكەندەر تۇتاسىمەن وزگە تىلدە شۇلدىرلەپ تۇر. قازبەك قۇتتىمۇرات ۇلى, «ەگەمەن قازاقستان» ورال