جيىندا الدىمەن مينيستر ارىستانبەك مۇحامەدي ۇلى مادەنيەت, سپورت پەن ونەر سالاسىندا اتقارىلىپ جاتقان جۇمىستار تۋرالى بايانداما جاسادى. ول الماتىدا ءححVىىى بۇكىلالەمدىك قىسقى ۋنيۆەرسيادانىڭ ءساتتى وتكەنىن, وعان ەلىمىزدىڭ جاقسى دايىندالعانىن, جارىسقا قاتىسقان شەتەلدىڭ وكىلدەرى ويىندارعا جوعارى باعاسىن بەرگەنىن ايتىپ, ستۋدەنتتەر دوداسىنىڭ ارقاسىندا كوپتەگەن سپورت نىساندارىنىڭ سالىنعانىن اتاپ ءوتتى. وسى ورايدا ول ەلباسى نۇرسۇلتان نازارباەۆتىڭ قازاقستان حالقىنا جولداۋىنداعى تاپسىرماسى بويىنشا بۇقارالىق سپورتقا باسا نازار اۋدارىلىپ وتىرعانىن, بىلتىر الماتىدا عانا ەمەس, ەلىمىزدىڭ باسقا وڭىرلەرىندە دە سپورتتى دامىتۋعا قولدا بار مۇمكىندىكتىڭ ءبارى جاسالعانىن ايتتى.
– مىسالى, – دەدى ول, – قازىر ەلىمىزدە 11 000 سپورت نىسانى بار. سوڭعى ەكى جىلدا قوسىمشا قارجىلاندىرۋ مەن مەملەكەتتىك-جەكە سەرىكتەستىك ارقىلى 18 دەنەشىنىقتىرۋ-ساۋىقتىرۋ كەشەنى اشىلدى. 450 بالالار مەن جاستاردىڭ سپورت مەكەمەسى, ءمۇمكىندىگى شەكتەۋلى جاندارعا ارنالعان 12 سپورت كلۋبى, 569 بالالار مەن جاسوسپىرىمدەر مەكتەبى جۇمىس ىستەۋدە. سالاماتتى ءومىر سالتىن ناسيحاتتاۋ اياسىندا ەلىمىزدە جىل سايىن 40 000-نان اسا سپورتتىق شارا وتكىزىلەدى. وعان كەم دەگەندە 5 ميلليون ادام قاتىسادى. ال 125 جوعارى وقۋ ورىندارىندا 180 000 ستۋدەنت-جاستار سپورتپەن اينالىسىپ كەلەدى.
وتىرىستا مينيستر وسىلاي دەي كەلىپ, الداعى ۋاقىتتا دا حالىقتىڭ جاپپاي سپورتپەن اينالىسۋىنا بارلىق جاعدايدىڭ جاسالاتىنىن مالىمدەدى. سونىمەن بىرگە, ول كاسىپقوي سپورتشىلاردىڭ بىلتىرعى جارىستارىنا توقتالىپ, وعان كوڭىلى تولاتىنىن جەتكىزدى. ا.مۇحامەدي ۇلى ريو-دە-جانەيرو قالاسىندا وتكەن جازعى وليمپيالىق ويىنداردا قازاقستان سپورتشىلارىنىڭ 3 التىن, 3 كۇمىس جانە 11 قولا مەدال جەڭىپ الۋىن ءۇلكەن جەتىستىك سانايتىنىن, ويتكەنى, 207 ەلدىڭ وكىلدەرى قاتىسقان الامان دودادا سولاردىڭ الدىنا شىعىپ, جالپىكوماندالىق ەسەپتە 23-ورىندى يەلەنۋى سپورتتاعى جەڭىستەرىمىزدىڭ ءبىرى دەپ باعالايتىنىن ايتتى. سول سياقتى ول وتانداستارىمىزدىڭ پاراليمپيداداعى جەڭىستەرى تۋرالى دا ايتا كەلىپ, ەلىمىز تاريحىندا مۇمكىندىگى شەكتەۋلى جاندار اراسىندا العاش رەت پاراليمپيادانىڭ التىن مەدالىن جەڭىپ العانىن اتاپ ءوتتى.
وسىدان كەيىن ول مينيسترلىكتىڭ سپورتقا قاتىستى بيىلعا جوسپارلاعان جۇمىستارىن حابارلادى. ۆەدومستۆو باسشىسى اۋەلى سپورت تۇرلەرىن قارجىلاندىرۋدا ادىلەتسىزدىكتىڭ بولىپ جاتقانىن, مىسالى جەرگىلىكتى جەردە فۋتبولعا قىرۋار قاراجات بولىنسە, ۇلتتىق سپورتقا, باسقا دا سپورت تۇرلەرىنە ازعانتاي عانا اقشا بەرىلەتىنىن ەسكەرتتى. وسىعان بايلانىستى مينيسترلىك قارجىلاندىرۋداعى تەپە-تەڭدىكتى ساقتاۋ ءۇشىن «دەنە شىنىقتىرۋ جانە سپورت تۋرالى» زاڭ جوباسىنا وزگەرتۋلەر ەنگىزگەنىن, وندا سپورت تۇرلەرى بويىنشا قاراجاتتى قايتا قاراۋ ماسەلەسى قاراستىرىلعانىن ايتتى.
– قازىر بۇل قۇجات پارلامەنت ءماجىلىسىنىڭ قاراۋىندا. «قۇجات بۇقارالىق سپورتتى دامىتۋعا جاڭا سەرپىن بەرەدى دەپ ويلايمىن. ءبىز وسى ماسەلەنى ءار وبلىستىڭ ەرەكشەلىگىنە بايلانىستى جەرگىلىكتى اتقارۋشى بيلىكپەن, دەپۋتاتتارمەن, قوعام قايراتكەرلەرى جانە سپورتشىلارمەن بىرگە تالقىلايتىن بولامىز. ياعني, ءار وڭىردە جاقسى دامىپ جاتقان سپورت تۇرلەرىن جەكە قاراستىرامىز. بۇل جەڭىل اتلەتيكا نەمەسە باسقا دا سپورت تۇرلەرى بولۋى مۇمكىن. مىسالى, وڭتۇستىك قازاقستان وبلىسىندا ەسكەك ەسۋ سپورتى دامىپ كەلەدى. ۋنيۆەرسيادا كەزىندە فريستايلدان الدابەرگەنوۆا, اراپباەۆا, كارپەك, باعلانوۆ ەسىمدى سپورتشىلار جاقسى ونەر كورسەتتى. ولار وسى ءوڭىردىڭ جاستارى. سوندىقتان ءوڭىردىڭ سپورتتان جەتىستىكتەرى بولسا, ول سپورت ءتۇرىن سارالاۋ تىزىمىنە قوسامىز», – دەدى مينيستر.
ودان ءارى بايانداماشى «لوتورەيا جانە لوتورەيا قىزمەتى تۋرالى» زاڭنىڭ ءمانى مەن ماڭىزى تۋرالى دا ايتا كەتتى. ول اتالعان قۇجاتتىڭ لوتورەيا وپەراتورلارىنىڭ ءار توقسان سايىن بيلەتتەردى ساتۋدان تاپقان تابىستارى مەن سىيلىق قورىنىڭ اراسىنداعى ايىرماشىلىقتىڭ كەم دەگەندە 10 پايىز قاراجاتىن اۋدارىپ وتىرۋىن كوزدەيتىنىن جەتكىزدى.
جيىندا مينيستر مادەنيەت سالاسىندا اتقارىلىپ جاتقان جۇمىستارعا دا توقتالدى. ول قازىر «كينەماتوگرافيا تۋرالى» جانە كينو سالاسىن دامىتۋ تۇجىرىمداماسى بويىنشا جۇمىستاردىڭ ۇكىمەتتىڭ قولداۋىمەن ىسكە اسىپ جاتقانىن, مادەني ساياساتتىڭ تۇجىرىمىنا سايكەس, 2014 جىلدان باستاپ, ەلىمىزدەگى بارلىق شىعارماشىلىق ورىنداردىڭ مادەنيەت مينيسترلىگىنىڭ قاراماعىندا ەكەندىگىن ەسكە سالدى.
ودان كەيىن ا.مۇحامەدي ۇلى ءوز بايانداماسىندا حالىقارالىق مادەني ىنتىماقتاستىقتى دامىتۋ, قازاقستاننىڭ مۋزەي جانە مۋزەي-قورىقتارى قىزمەتى سالاسىن كەڭەيتۋ, مەملەكەت تاريحى مەن مادەنيەتى تۋرالى اۋقىمدى كينو جانە تەلەجوبالاردى جاساۋ جونىندە «ماڭگىلىك ەل» كەشەندى جوسپارىن ىسكە اسىرۋ, 2020 جىلعا دەيىن تۋريستىك سالا تۇجىرىمداماسىنىڭ جاڭا جوباسىن ازىرلەۋ, تاريحي-مادەني ەسكەرتكىشتەردى ساقتاۋ ماسەلەلەرىنە توقتالدى.
وتىرىستىڭ سوڭىندا 2016 جىلدىڭ سپورت سالاسىنداعى ۇزدىك ۇيىمدارى مەن ماماندارى ماراپاتتالدى. اتاپ ايتقاندا, «ۇزدىك سپورتتىق ءوڭىر» اتالىمى استانا قالاسىنىڭ دەنە شىنىقتىرۋ جانە سپورت باسقارماسىنا بەرىلدى. «اۋداندىق ۇزدىك دەنە شىنىقتىرۋ جانە سپورت ءبولىمى» اتالىمى بويىنشا شىعىس قازاقستان وبلىسى اباي اۋدانىنىڭ مادەنيەت, تىلدەردى دامىتۋ, دەنە شىنىقتىرۋ جانە سپورت ءبولىمى جەڭىمپاز اتاندى.
«جىلدىڭ ۇزدىك سپورت فەدەراتسياسى» اتالىمىندا جەڭىمپاز قازاقستاننىڭ بوكس فەدەراتسياسى بولدى. «جىلدىڭ ۇزدىك اۋىل جاتتىقتىرۋشىسى» اتاعىن ءالىمجان سۇلەيمەنوۆ جەڭىپ الدى. قازىر ول الماتى وبلىسىنىڭ دەنە شىنىقتىرۋ جانە سپورت باسقارماسى «دەنە مۇمكىندىگى شەكتەۋلى ادامدارعا ارنالعان سپورت كلۋبى» مكقك-دا جاتتىقتىرۋشى-وقىتۋشى بولىپ جۇمىس ىستەيدى. «دەنە شىنىقتىرۋ جانە سپورت سالاسىنداعى ۇزدىك مامان» اتالىمى بويىنشا سپورتتىق مەديتسينا جانە وڭالتۋ ورتالىعىنىڭ ماسساج جاساۋشىسى ناتاليا ماكسيموۆا ماراپاتتالدى. «سپورتتىڭ اۋىلدىق جەردەگى ۇزدىك نۇسقاۋشى-ادىسكەرى» اتالىمىندا اقتوبە وبلىسى العا اۋدانىنىڭ ءبىلىم ءبولىمىنىڭ ادىسكەر-نۇسقاۋشىسى قازي مۇحامبەتالين ۇزدىك اتاندى.
داستان كەنجالين,
«ەگەمەن قازاقستان»