بۇكىلالەمدىك بوكس سەرياسىنىڭ (WSB) جاڭا ماۋسىمىندا "استانا ارلانس" كلۋبى تالدىقورعان قالاسىندا "وزبەك تايگەرس" كومانداسىمەن كۇش سىناسىپ, جالپى ەسەپتە 4:1 ەسەبىمەن جەڭىسكە جەتتى.
كەزدەسۋدىڭ ءبىرىنشى جەكپە-جەگى 52 كيلو سالماقتا «استانا ارلانستىڭ» كاپيتانى ولجاس ساتتىباەۆ پەن وزبەك بوكسشىسى ابرورجان كوديروۆ اراسىندا ءوتتى. بۇل سىندا قازاقستاندىق شەبەردىڭ مەرەيى ۇستەم بولدى. ودان كەيىن 60 كيلو سالماقتا ونەر كورسەتكەن زاكىر سافيۋللين ريو-2016 وليمپياداسىنىڭ قولا جۇلدەگەرى مۋرودجون احماداليەۆتى تىزە بۇكتىردى.
قىزىقتى جەكپە-جەكتىڭ ءبىرى 69 كيلو سالماقتا بولدى. بۇل سىندا قازاقستاندىق اسلانبەك شىمبەرگەنوۆ وليمپيا ويىندارىنىڭ (ريو-2016) كۇمىس ءجۇلدەگەرى شاحرام گياسوۆتى ۇپاي سانىمەن ۇتىپ قانا قويماي, جالپى ەسەپتە كومانداسىنا جەڭىس سىيلادى.
بۇدان كەيىن 81 كيلو سالماق دارەجەسىندە رينگكە شىققان نۇرداۋلەت جارمانوۆ ريو وليمپياداسىنىڭ كۇمىس ءجۇلدەگەرى بەكتەمىر مەليكۋزيەۆتەن ۇتىلىپ قالدى. ال سوڭعى, 91 كيلو سالماقتا ونەر كورسەتكەن قامشىبەك قوڭقاباەۆ پەن وزبەكستاندىق باحودير جالولوۆ اراسىنداعى جەكپە-جەك «استانا ارلانس» وكىلىنىڭ پايداسىنا شەشىلدى.
سونىمەن «استانا ارلانس» كلۋبى WSB ماۋسىمىندا وسىمەن ەكىنشى جەڭىسىنە قول جەتكىزدى. بۇدان بۇرىن ولار رەسەيلىك Patriot Boxing Team كلۋبىنان باسىم تۇسكەن بولاتىن.
ءمادينا اسىلبەك,
جۋرناليست
استانا