كەيىنگى جىلدارى سولتۇستىك قازاقستان وبلىسىندا سپورت سالاسىنا جان-جاقتى كوڭىل ءبولىنىپ كەلەدى. سونىڭ ناتيجەسىندە وڭىردە كوپتەگەن سپورتتىق نىساندار بوي كوتەرىپ, سالاماتتى ءومىر سالتىن قالاعان جۇرتتىڭ يگىلىگىنە جۇمىس ىستەي باستادى. وبلىس سپورتشىلارىنىڭ دا حالىقارالىق, ەل ىشىندەگى جارىستاردا كورسەتىپ جۇرگەن ناتيجەلەرى دە اۋىز تولتىرىپ ايتارلىقتاي.
وبلىستىق دەنە شىنىقتىرۋ جانە سپورت باسقارماسىنىڭ باسشىسى رۋسلان ەسەنالينمەن اڭگىمە بارىسىندا بۇعان كوزىمىز انىق جەتتى.
– رۋسلان باقىتتى ۇلى, بۇگىندە ءوڭىر تۇرعىندارىنىڭ ۇشتەن بىرىنە جۋىعى بۇقارالىق سپورت تۇرلەرىمەن اينالىساتىن كورىنەدى. بۇل دەڭگەيگە قالاي جەتتىڭىزدەر؟
– پرەزيدەنتىمىز 2020 جىلعا دەيىن قازاقستان حالقىنىڭ 30 پايىزى بۇقارالىق سپورتقا تارتىلۋى ءتيىس دەگەن مىندەت قويدى. ءبىز بۇل مەجەنى ەڭسەرۋ جولىندا تياناقتى تۇردە جۇمىس ىستەپ جاتىرمىز. سوڭعى جىلدارى ماتەريالدىق-تەحنيكالىق بازا, كادرلىق الەۋەت الدەقايدا نىعايدى. جاڭا سپورت نىساندارى كوپتەپ بوي كوتەردى. قالپىنا كەلتىرىلگەندەرى دە جەتكىلىكتى. وبلىستا 1994 جىلى 9 بالالار مەن جاسوسپىرىمدەر سپورت مەكتەبى (بجسم), 1403 سپورت عيماراتى بولسا, قازىر ولاردىڭ سانى, سايكەسىنشە 26-عا جانە 2816-عا جەتتى.
وسىدان ەكى جىل بۇرىن ارنايى باعدارلاما ءتۇزىلىپ, اۋداندار مەن ەلدى مەكەندەردىڭ جاعدايىنا باسا نازار اۋدارىلدى. بەسكول, جاركەن, نوۆويشيم ەلدى مەكەندەرىندە كوپبەيىندى دەنە شىنىقتىرۋ-ساۋىقتىرۋ كەشەندەرى, ءجۇزۋ باسسەيندەرى سالىندى. جۋىردا جاڭاجول, نوۆونيكولسكوە اۋىلدارىندا, سەرگەەۆكا كەنتىندە جاڭا ۇلگىدەگى سپورت عيماراتتارى پايدالانۋعا بەرىلدى. سوڭعى ەكى جىلدا عانا 393 حوككەي كورتى سالىندى. مەملەكەت-جەكەمەنشىك ارىپتەستىك ۇلكەن قولداۋ كورسەتىپ وتىر. ەسىل, ايىرتاۋ, اقجار اۋداندارىندا دەمەۋشىلەردىڭ كومەگىمەن جابىق مۇز ايدىندارى تۇرعىزىلدى. بەسكول كەنتىندە, وبلىس ورتالىعىندا گيمناستيكا جانە وليمپيالىق سپورت تۇرلەرىنە ارنالعان الاڭدار وسى زامان ۇلگىسىمەن جابدىقتالدى. 46 فۋتبول الاڭى جاڭارتىلدى. وتكەن عاسىردىڭ 70-جىلدارىنان بەرى قىزمەت كورسەتىپ كەلە جاتسا دا, ەش جوندەۋ كورمەگەن «قاراساي باتىر» ستاديونى قالپىنا كەلتىرىلدى. «نەپتۋن» اكۆاپاركىندە ءجۇزۋ باسسەينى, جاتتىعۋ الاڭى, سپورت زالدارى جۇمىس ىستەيدى.
– وبلىس ورتالىعىندا ا.ۆينوكۋروۆ اتىنداعى سپورت سارايىنىڭ جۇرتشىلىق يگىلىگىنە بەرىلۋىن باستى وقيعانىڭ بىرىنە جاتقىزۋعا بولاتىن شىعار؟
– ارينە. كەشەننىڭ اشىلۋىن ۇلكەن-كىشىنىڭ تاعاتسىزدانا كۇتكەنى راس. ونىڭ قۇرىلىسىنا 3 ميلليارد تەڭگە مولشەرىندە قارجى جۇمسالدى. مۇندا سپورتتىڭ 12 تۇرىمەن ەركىن اينالىسۋعا بولادى. جابىق مۇز ايدىنى, جەڭىل اتلەتيكا مانەجى, ۆەلوترەك الاڭدارى ورنالاسقان. ەندى ونىڭ جانىنان امبەباپ تەننيس ورتالىعىن اشۋ جوسپارلانعان.
بۇعان قوسارىم, سۋعا ءجۇزۋ, اكروباتيكا, بوكس, ۇلتتىق ويىندار, گيمناستيكا, ات سپورتى, تاعى باسقا سپورت ءتۇلەرى بويىنشا بالالار ءجانە جاسوسپىرىمدەر سپورت مەكتەپتەرىنىڭ فيليالدارى مولايىپ, اۋىلدىق جەرلەردە كەڭىنەن قانات جايا ءتۇستى. جوعارى سپورت شەبەرلىگى مەكتەبى 2009 جىلدان بەرى 15 حالىقارالىق دارەجەگى سپورت شەبەرى مەن 34 سپورت شەبەرىن دايىنداپ شىقتى.
– كاسىبي سپورت كلۋبتارىنىڭ اياق الىسى قالاي؟
– «قىزىلجار سك» فۋتبول كومانداسى ءبىرىنشى ليگا قۇرامىندا ءۇشىنشى ورىندى يەلەنىپ, جانكۇيەرلەرىن قۋانىشقا ءبولەدى. ۆولەيبولشىلارىمىز دا وسال ەمەس. كەزىندە قازاقستان كۋبوگىن جەڭىپ العانىن, ءتورت مارتە ەكىنشى ورىن العانىن ەسكەرسەك, ولاردان ۇلكەن جەڭىستەر كۇتەرىمىز زاڭدى. كىلەڭ جەرگىلىكتى ويىنشىلاردان قۇرالعان «قۋانىش» قىزدار كومانداسىنىڭ اياق الىسى قۋانتادى. ازيا ويىندارىنىڭ جۇلدەگەرى ميحايل دەدوۆ جاتتىقتىراتىن باسكەتبولشىلارىمىز جوعارى ليگادا جاقسى ويىن ورنەگىن كورسەتىپ ءجۇر. 2015 جىلى قۇرىلعان «قۇلاگەر» حوككەي كلۋبى تۋرالى ءسوز ەرەكشە. سول جىلى قولا مەدالدى قانجىعاعا بايلاسا, بىلتىر ەل كۋبوگىن جەڭىپ الدى. «Vino4ever SKO» ۆەلوشاباندوزدار كلۋبىنىڭ اتاعى شەت ەلگە دە جاقسى تانىس. قازىر ازيالىق كوماندالار اراسىندا رەيتينگ بويىنشا الدىڭعى ورىندا تۇر. «ءۇمىت» مۇگەدەكتەر كلۋبىنىڭ سەرگەي حارلاموۆ, ەلەنا مازۋرەنكو, قايرات قانافين, ۆلاديمير ەرمان سەكىلدى بەلدى مۇشەلەرى پاراليمپيالىق ويىندارعا قاتىسىپ ءجۇر.
– وليمپيادا چەمپيونى الەكساندر ۆينوكۋروۆ سەكىلدى وبلىستىڭ, ەلىمىزدىڭ نامىسىن ابىرويمەن قورعاپ جۇرگەن ايبىندى سپورتشىلارىمىز كىمدەر؟
– بىلتىر برازيليادا وتكەن بايراقتى باسەكەگە 6 جەرلەسىمىز قاتىستى. ولاردىڭ اراسىنان بوكستان داريعا شاكىموۆا, وبلىسىمىزدىڭ تۋماسى, ەركىن كۇرەس شەبەرى ەلميرا سىزدىقوۆا قولا جۇلدەگە يە بولدى. تاۋەلسىزدىگىمىزدىڭ 25 جىلدىعى ارالىعىندا وليمپيالىق ويىندارعا قاتىسقان نۇرىم ءدۇيسەنوۆ, رومان مەلەشين, ۆاديم شاقشاقباەۆ, ۆلاديسلاۆ پولياكوۆ, باقتيار قوجاتاەۆ, مارگاريتا مۇقاشەۆا, ەكاتەرينا ەكتوۆا, دميتري بابەنكو, تاعى باسقالارىنىڭ ەسىمدەرى قۇرمەتپەن اتالادى. الەكساندردىڭ ءىزباسارى الەكسەي لۋتسەنكو وتكەن جىلى «تۋر حاينانيا» حالىقارالىق جارىسىندا الدىنا جان سالمادى.
بۇعان جەرلەسىمىز, كاسىپقوي بوكسشى جانات جاقيانوۆتىڭ جاقىندا WBA /Super/ جانە IBO تۇجىرىمدارى بويىنشا جەڭىل سالماقتا الەم چەمپيونى اتانعانىن ايتساق, تابىسىمىزدىڭ ەسەلەنە تۇسەرى انىق. ياعني, بۇگىنگى كۇندە سولتۇستىك ءوڭىردىڭ سپورتىندا ۇلكەن سەرپىلىس بار دەپ سەنىممەن ايتۋعا بولادى.
– اڭگىمەڭىزگە راحمەت.
اڭگىمەلەسكەن
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى