كەشە جاپونيانىڭ ساپپورو قالاسىندا VIII قىسقى ازيا ويىندارى سالتاناتتى تۇردە اشىلىپ, اق قار, كوك مۇز ۇستىندەگى الاماننىڭ الاۋى جاعىلدى. «ساپپورو-دوۋم» ستاديونىندا وتكەن دۋماندى شەرۋدە قازاقستاننىڭ كوك تۋىن شاڭعىشى, ەلىمىزدىڭ بەس دۇركىن چەمپيونى ەردوس احماديەۆ ۇستاپ شىقتى.
سارى قۇرلىقتىڭ قىستاعى باستى سايىسىندا قازاقستاننىڭ نامىسىن 116 سپورتشى قورعايتىن بولادى. جالپى, اق ازيادا دوداسىندا 31 ەلدىڭ اتىنان كەلەتىن اتلەتتەر سپورتتىڭ 11 ءتۇرى بويىنشا 64 مەدال جيىنتىعى ءۇشىن كۇش سىناسادى.
ساپپورو ساپارىنا قازاقستان دەلەگاتسياسىن باستاپ بارعان قازاقستان رەسپۋبليكاسى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆتىڭ ايتۋىنشا, ءبىزدىڭ سپورتشىلار بۇل ويىندارعا كەي سپورت تۇرلەرى بويىنشا ەكىنشى قۇراممەن اتتانعان. ونىڭ سەبەبى, ءبىزدىڭ كوشباسشى سپورتشىلارىمىز ءدال وسى ۋاقىت ارالىعىندا بىرقاتار سپورت تۇرلەرى بويىنشا وتەتىن الەم چەمپيوناتتارى مەن الەم كۋبوگى كەزەڭدەرىندە ونەر كورسەتەدى ەكەن.
سوعان قاراماستان, قۇراما ساپىندا مانەرلەپ سىرعاناۋشىلار دەنيس تەن, ەليزابەت تۇرسىنباەۆا, كونكيمەن جۇگىرۋشىلەر رومان كرەچ, دەنيس كۋزين, ەكاتەرينا ايدوۆا, دميتري بابەنكو, فريستايل-موگۋلشى دميتري رەيحارد, بياتلونشىلار الينا رايكوۆا, گالينا ۆيشنەۆسكايا, شاڭعىشى نيكولاي چەبوتكو, شورت-ترەكشى ايدار بەكجانوۆ, شاڭعىمەن تۇعىردان سەكىرۋشى مارات جاپاروۆ سىندى تاجىريبەلى سپورتشىلار بار.
ەسكە سالار بولساق, 2011 جىلى استانا مەن الماتىدا وتكەن VII قىسقى ازيا ويىندارىندا قازاقستان قۇراما كومانداسى جالپى سانى 32 مەدال الىپ, كوماندالار اراسىنداعى باسەكەدە ءبىرىنشى ورىنعا يە بولعان-تىن. ال 19-26 اقپان ارالىعىندا ساپپورودا وتەتىن سارى قۇرلىقتىڭ بۇل باستى سايىسىندا ءبىزدىڭ سپورتشىلارىمىزدىڭ الدىنا ۇزدىك ۇشتىكتىڭ ىشىندە بولۋ مىندەتى قويىلعان.
قايرات ءابىلدينوۆ,
«ەگەمەن قازاقستان»