ءار مەملەكەت ءوزىنىڭ دامۋ كەزەڭدەرىندە ءتۇرلى وزگەرىستەردى باسىنان وتكەرەدى. قازاقستان دا وسىنداي وزگەرىستەردەن تىس قالعان جوق. كەزىندە كەڭەس وداعىنىڭ قۇرامىندا بولعان قازاقستان بۇگىندە دۇنيە جۇزىندەگى تانىمال مەملەكەتتەردىڭ بىرىنە اينالدى. ءتيىمدى قۇرىلعان پرەزيدەنتتىك باسقارۋ فورماسىنىڭ ارقاسىندا ساياسي, الەۋمەتتىك-ەكونوميكالىق, ساۋدا جانە مادەني-گۋمانيتارلىق سالالاردا تاڭعالارلىق تابىستارعا قول جەتكىزدى. قازاقستانداعى تۇراقتىلىق پەن كوپۆەكتورلى ساياسات ەل ەكونوميكاسىنا 200 ميلليارد اقش دوللارىنان استام قارجى تارتۋدىڭ كەپىلى بولدى.
بۇگىنگى تاڭدا قازاقستان ەلى سەنىمدى ساياسي جانە ساۋدا ءارىپتەسى رەتىندە ايماقتىق جانە حالىقارالىق ۇيىمداردىڭ قۇرمەتتى مۇشەسى بولىپ تابىلادى. بۇۇ-عا 1992 جىلى مۇشەلىككە قابىلدانعاننان بەرگى ارالىقتا قازاقستان ۇنەمى جاھاندىق دەڭگەيدە باستاماشىلىق تانىتىپ, قانداي دا ءبىر حالىقارالىق داۋلار مەن قاقتىعىستاردى بەيبىت جولمەن رەتتەۋگە اتسالىسىپ كەلەدى. اتاپ ايتار بولساق, يراننىڭ يادرولىق باعدارلاماسىن شەشۋ بويىنشا كەلىسىمدەرگە, سونداي-اق ەكى مارتە بولىپ وتكەن سيرياداعى ماسەلەلەرگە قاتىستى تاراپتاردىڭ كەزدەسۋىنە كەلىسسوز الاڭىن ۇسىندى.
تەرەڭ ويلاستىرىلعان مەملەكەتتىك بيلىك جۇيەسىنىڭ ارقاسىندا ەل ءوزىنىڭ ىشكى دامۋىندا دا وراسان زور تابىستارعا قول جەتكىزدى. ازاماتتىق قوعام ينستيتۋتتارى, مەملەكەتتىك ورگانداردىڭ ساپالى جۇمىسى قالىپتاستى.
قازاقستان پرەزيدەنتىنىڭ ەلدىڭ بيلىك تارماقتارى اراسىندا وكىلەتتىكتەردى قايتا ءبولۋ تۋرالى شەشىمى قازاقستان حالقىنىڭ ءال-اۋقاتىن ارتتىرۋعا باعىتتالعان جولدىڭ زاڭدى جالعاسى بولىپ تابىلادى. ەندىگى ۋاقىتتا ەل پارلامەنتىنىڭ ءرولى مەن ورنىن ايتارلىقتاي كۇشەيتۋ, ۇكىمەتتىڭ وكىلەتتىگىن كەڭەيتۋ قاراستىرىلىپ وتىر. مەملەكەت باسشىسى بيلىك تارماقتارىنىڭ قارىم-قاتىناسىندا جوعارعى تورەشى رەتىندە ستراتەگيالىق قىزمەتتەردى جۇزەگە اسىرادى. سونىمەن قاتار, پرەزيدەنت نۇرسۇلتان نازارباەۆ سىرتقى ساياساتقا, ۇلتتىق قاۋىپسىزدىككە جانە ەلدىڭ قورعانىس قابىلەتتىلىگىنە باسا نازار اۋداراتىن بولادى.
كونستيتۋتسيالىق رەفورمالار اسا زور ماڭىزعا يە جانە ول دەر كەزىندە ۇسىنىلدى دەپ سانايمىن, سەبەبى, ۇكىمەت پەن پارلامەنتتىڭ ءرولىن كۇشەيتۋ مەن جاۋاپكەرشىلىگىن ارتتىرۋ ەلدىڭ ودان ءارى دامۋى ءۇشىن ءتيىمدى ءارى زاماناۋي باسقارۋ جۇيەسىن قالىپتاستىرۋعا وڭ ىقپال ەتەدى.
ميلانكا كاريچ,
سەربيا رەسپۋبليكاسى پارلامەنتىنىڭ دەپۋتاتى