ءال-فارابي اتىنداعى قازۇۋ-دە باس پروكۋرور جاقىپ اسانوۆ ستۋدەنتتەرمەن جانە ۇستازدارمەن كەزدەستى. ول ستۋدەنتتىك شاعى وسى قارا شاڭىراقتا وتكەنىن ايتتى, دەپ حابارلادى باس پروكۋراتۋرانىڭ ءباسپاسوز قىزمەتى.
كەزدەسۋدە باس پروكۋرور جاڭا جۇمىسقا كىرىسكەندە كادر تاڭداۋ ماسەلەسىنە باسا نازار اۋدارعانىن جەتكىزدى. «جاستار اراسىندا
ساۋالداما جۇرگىزدىك. ستۋدەنتتەردىڭ 95 پايىزى تانىسىڭ, اعاڭ, كوكەڭ بولماسا پروكۋراتۋراعا تۇرۋ ءمۇمكىن ەمەس دەپ جاۋاپ بەرگەن. وسى كوزقاراستى ءبىز وزگەرتتىك. قازىر ەش تانىسسىز, بايلانىسسىز ءبىزگە جۇمىسقا تۇرۋعا بولادى. ەكى كونكۋرس ءوتتى. 2 مىڭ كانديداتتىڭ ىشىنەن تەك 126-سى جۇمىسقا قابىلداندى. ونىڭ 21-ءى, ياعني ءاربىر التىنشىسى – وسى ۋنيۆەرسيتەتتىڭ تۇلەگى. سوندىقتان ءسىزدەردى قۇتتىقتايمىن», دەپ جينالعانداردىڭ كوڭىلىن كوتەرىپ تاستادى.
بۇعان قوسا, ج.اسانوۆ جاستارمەن تاۋەلسىزدىكتىڭ جەتىستىكتەرى تۇرعىسىنداعى ويىمەن ءبولىستى. ەگەمەندىكتىڭ قادىرى, شەكارا ءمارتەبەسى جانە استانانىڭ قارقىنداپ دامۋى جاستاردىڭ قولىنداعى باستى بايلىق ەكەنىن شەگەلەپ ايتتى. قۇرعاق ءسوز بولماسىن دەپ ادامداردىڭ ءومىر ءسۇرۋ دەڭگەيىن 90-شى جىلدارمەن سالىستىرىپ بەردى.
كەزدەسۋدە ەلباسى جولداۋىندا كورسەتىلگەن باستى باعىتتار دا ءسوز بولدى. ءبۇگىنگى كۇنى قوعامدا تالقىعا ءتۇسىپ جاتقان كونستيتۋتسيانىڭ 26-بابىنا قاتىستى ويىن دا ءبىلدىردى. باس پروكۋرور بۇل وزگەرىستەردىڭ جەردى ساتۋعا ءمۇلدەم قاتىسى جوقتىعىن ەسكەرتتى. ەشقانداي جەر ءوزگەگە بەرىلمەيتىنىن شەگەلەپ ايتقان ج.اسانوۆ جۇرتشىلىقتى قاڭقۋ ءسوزگە ەرمەۋگە شاقىردى. قوعامعا ءىرىتكى سالۋعا قۇمارلاردىڭ ءارەكەتىنە جول بەرىلمەيتىنىن اتاپ كورسەتتى.