ءوڭتۇستىككە پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ ەكى كۇندىك جۇمىس ساپارىمەن كەلىپ, وبلىس اكتيۆىمەن جانە جۇرتشىلىقپەن جۇزدەستى. ەلباسى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىنىڭ ۇكىمەت الدىنا قويىپ وتىرعان مىندەتتەرى بويىنشا القالى جيىن وتكىزدى.
ۆيتسە-پرەمەر مەملەكەت باسشىسىنىڭ اۋىل شارۋاشىلىعى مينيسترلىگىنىڭ الدىنا قويىپ وتىرعان مىندەتتەرىنە كەڭىنەن توقتادى.
ونىڭ ايتۋىنشا, سۋبسيديالاردى ءبولۋ قاعيدالارىن قايتا قاراستىرىپ, بىرتىندەپ ءونىمدى ساقتاندىرۋعا كوشۋ, بەس جىل ىشىندە 500 مىڭنان استام جەكە ءۇي شارۋاشىلىقتارى مەن شاعىن فەرمەرلەردى كووپەراتيۆتەرگە تارتۋ ءمىندەتى كۇن ءتارتىبىندە تۇر. سول سياقتى, ءونىمدى وڭدەۋ ساپاسىن جاقسارتىپ, تاۋارلاردى ساقتاۋدىڭ, تاسىمالداۋدىڭ جانە وتكىزۋدىڭ ءتيىمدى جۇيەسىن قۇرۋ, ەڭبەك ونىمدىلىگىن بەلسەندى تۇردە ارتتىرىپ, ءوندىرىس شىعىندارىن تومەندەتۋ, سۋارمالى ەگىس الاڭىن 5 جىل ءىشىندە 40 پايىزعا كەڭەيتىپ, 2 ميلليون گەكتارعا جەتكىزۋ كوزدەلەدى.
– بۇدان بىلاي بەرىلەتىن شاعىن نەسيە كولەمى 18 ميلليون تەڭگەگە دەيىن كوتەرىلدى جانە نەسيەنى قايتارۋ مەرزىمى 5 جىلدان 7 جىلعا دەيىن ۇلعايتىلدى, دەدى اسقار يسابەك ۇلى. ۇكىمەت «اتامەكەن» ۇلتتىق كاسىپكەرلەر پالاتاسىمەن بىرلەسىپ, بيزنەستىڭ شىعىنىن ازايتۋ بويىنشا شارالار قابىلدايتىن بولادى. بۇل اسىرەسە, ەنەرگەتيكا, كولىك جانە لوگيستيكا, سونداي-اق, تۇرعىن ءۇي-كوممۋنالدىق شارۋاشىلىعى سالالارىنداعى قىزمەت كورسەتۋ قۇنىنا قاتىستى. بۇل وڭتۇستىك قازاقستان وبلىسى ءۇشىن ەرەكشە ماڭىزدى. ويتكەنى, مۇندا 18 مىڭنان استام شاعىن جانە ورتا بيزنەس وكىلدەرى بار. سالىستىرمالى تۇردە ايتساق, رەسپۋبليكا بويىنشا جوعارى كورسەتكىشتەردىڭ ءبىرى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى