سولتۇستىك قازاقستان وبلىسىنىڭ ىشكى ىستەر دەپارتامەنتىندە سۋ تاسقىنىنا قارسى ءىس-شارالار بويىنشا جينالىس ءوتتى, دەپ حابارلايدى قازاقپارات
ءىىد جەدەل جوسپارلاۋ باسقارماسىنىڭ باستىعى ەربول بەكتۇروۆتىڭ ايتۋىنشا, سۋ تاسقىنىن الدىن الۋ ءىس-شارالارىنا ازاماتتىق قورعاۋ قىزمەتىنىڭ قاتىسۋى مەن دايىندىق جوسپارى جاسالىپ, بەكىتىلگەن.
قۇتقارۋشىلار وبلىستاعى 1500 تۇرعىن ءۇيى بار 95 ەلدى مەكەندە سۋ باسۋ قاۋپى بار ەكەنىن ايتىپ وتىر.
پوليتسيا قىزمەتكەرلەرى جولداردىڭ جاعدايىن باقىلاۋدا. قاۋىپسىزدىكتى جانە اۆتوكولىكتەردىڭ ۇزدىكسىز قوزعالىسىن, جولداردىڭ اشىق بولۋىن قامتاماسىز ەتۋ ماقساتىندا سۋ باسۋ قاۋپى بار 291 ۋچاسكە باقىلاۋعا الىندى. رەسپۋبليكالىق ماڭىزى بار بارلىق 1468 شاقىرىمدىق جولدى تاۋلىك بويى ءىىد جول-پاترۋلدىك پوليتسيا باتالونىنىڭ 15 ەكيپاجى كۇزەتۋدە.
سقو توتەنشە جاعدايلار دەپارتامەنتىنىڭ باستىعى پاۆەل فيليپپوۆ جول-پاترۋلدىك پوليتسيا قىزمەتكەرلەرىنە تاس جولدارداعى سۋ وتكىزەتىن قۇبىرلاردىڭ جاعدايىن قاتاڭ باقىلاۋدا ۇستاۋ كەرەكتىگىن نىقتاپ ايتتى.
جينالىس سوڭىندا سقو ءىىد باستىعى بەرىك ءبىلالوۆ تاسقىنعا قارسى شارالارعا بايلانىستى اۋداندارداعى اۋماقتىق بولىمشەلەر باسشىلارىنىڭ جەكە جاۋاپكەرشىلىگى تۋرالى ەسكەرتتى.