قىتايدىڭ Hunan TV ارناسىنداعى «I am a Singer» بايقاۋىنا قاتىسىپ جاتقان قازاقستاندىق ءانشى ديماش قۇدايبەرگەن جەرگىلىكتى سىچۋان ولكەسىندەگى پاندالار باعىنا باردى. بۇل تۋرالى ول ءوزىنىڭ Instagram جەلىسىندەگى پاراقشاسىندا جازدى.
«الەمدىك جانۋارلاردى قورعاۋ ۇيىمىنىڭ لوگوتيپىنەن پاندانىڭ سۋرەتىن كورگەندە, نە سەبەپتى ءدال وسى جانۋار قىزىل كىتاپقا ەنگەن مىڭداعان تىرشىلىك يەسىنەن ءبىرىنشى ورىندا, ۇلكەن نازارعا يە, دەپ ويلايتىن بولارسىزدار؟! بۇل جانۋاردىڭ الەم بويىنشا 2000-عا جۋىعى عانا قالىپتى. ءومىر سۇرۋلەرى ەرەكشە! مىنەزدەرى ادامعا ۇقساس. رەنجىپ قالادى, ەركەلەيدى!... مەن كەشە ولارمەن كەزدەستىم... قىتايدىڭ سىچۋان ولكەسى جەر جۇزىندەگى بارلىق پاندانىڭ وتانى! چاندۋ قالاسىنا ارنايى ۇشىپ بارىپ, وسىناۋ سۇيكىمدى جانۋارلارمەن جاقىناراق تانىستىم. الەم بويىنشا تۇڭعىش رەت "I'm in China" جوباسى اياسىندا پاندالارمەن جۇزدەسكەن رەسمي 1-ءشى ەلشى اتاندىم! اقىل-ساناسى جەتىك ءار ادام بالاسى اللانىڭ جاراتقان ءار تىرشىلىك يەسىنە مەيىرىممەن قاراۋى ءتيىس!», – دەپ جازدى جاس ءانشى ءوزىنىڭ Instagram-داعى پاراقشاسىندا.
سونىمەن قاتار ءانشىنىڭ PR-مەنەدجەرى ءارى دوسى الپامىس شاريموۆتىڭ ايتۋىنشا, ديماش قىتايدىڭ چاندۋ قالاسىندا تۇرعىندارىمەن كەزدەسىپ, تىلدەستى. جەرگىلىكتى تۇرعىندار ديماشقا دەگەن ءوز ءىلتيپاتتارىن ءبىلدىردى. ول سىچۋان پروۆينتسياسىنىڭ چاندۋ قالاسىندا سول جەرگىلىكتى تۇرعىنداردىڭ ەجەلگى داستۇرىمەن تانىسىپ, اتاقتى ءشاي دەمدەۋ ءراسىمىن ۇيرەنگەن. سونداي-اق ديماش وسى ساياحات بارىسىندا سىچۋان وپەراسىن تاماشالادى.