بۇگىن قر قورعانىس مينيسترلىگىنىڭ 91678 اسكەري ءبولىمىنىڭ اۋماعىندا جۋالى اۋدانىنداعى قار كوشكىنىنەن قازا تاپقان اسكەري قىزمەتشىلەرمەن قوشتاسۋ ءراسىمى ءوتتى, دەپ حابارلايدى قازاقپارات
جامبىل وبلىسى اكىمدىگىنىڭ ءباسپاسوز قىزمەتى حابارلاعانداي, قازا تاپقان اسكەريلەردىڭ ءمايىتى تۋىستارىنا جەتكىزىلەدى. جەرلەۋ ءراسىمىنىڭ ۋاقىتىن وتباسىلاردىڭ وزدەرى شەشەدى.
قازا بولعان تورتەۋىنىڭ جامبىل وبلىسى تۇرعىندارى ەكەنى بەلگىلى. 24 جاستاعى كەلىسىمشارت قىزمەتىندەگى قاتارداعى جاۋىنگەر – تىلەۋجان كەڭەسوۆ, 22 جاستاعى قاتارداعى جاۋىنگەر – ماقسات شاكەن, 26 جاستاعى ەفرەيتور – مۇحيت تۇرىسماعانبەتوۆ جۋالى اۋدانىنىڭ, ال 25 جاسار كىشى سەرجانت اۋەسباي ەرىسباەۆ تاراز قالاسىنىڭ تۋماسى.
اعا لەيتەنانت الىشەر موشاباەۆ پەن كىشى سەرجانت ماقسات قىدىرباەۆ الماتىلىقتار. ال 29 جاستاعى كىشى سەرجانت ءامىر ارالباەۆ وڭتۇستىك قازاقستان وبلىسىنىڭ تۇرعىنى بولعان.
ەسكە سالا كەتەيىك, جامبىل وبلىسىنداعى كوكساي شاتقالىندا ءوتىپ جاتقان 91678 اسكەري ءبولىمى اسكەري قىزمەتشىلەرىنىڭ جاۋىنگەرلىك دايىندىعى بويىنشا جوسپارلى ساباعى بارىسىندا كۇتپەگەن جەردەن قار كوشكىنى ورىن الدى. قورعانىس ءمينيسترى ساكەن جاسۇزاقوۆ باستاعان ۇكىمەت كوميسسياسى جۇما كۇنى جامبىل وبلىسىنا كەلدى. كوميسسيا مۇشەلەرى وقيعا ورنىندا توتەنشە جاعدايدىڭ سەبەبىن انىقتاپ, قازا تاپقانداردىڭ وتباسىنا كومەك كورسەتۋ جۇمىستارىن ۇيىمداستىرۋمەن اينالىسادى. قازا تاپقان اسكەريلەردىڭ وتباسىلارىنا وتەماقى بەرىلەدى. اسكەري قىزمەت جانە اسكەري قىزمەتشىلەردىڭ مارتەبەسى تۋرالى» قازاقستان رەسپۋبليكاسى زاڭىنىڭ 51 بابىنا سايكەس, اسكەري قىزمەتتىك مىندەتتەرىن ورىنداۋ كەزىندە قازا بولعان (قايتىس بولعان) جاعدايدا سوڭعى قايتىس بولار (قازا بولار) كۇنى اتقارعان لاۋازىمىنا سايكەس 5 جىلدىق اقشالاي ۇلەس كولەمىندە ءبىر رەتتىك وتەماقى تولەۋ قاراستىرىلعان.