تالدىقورعان قالاسىنداعى نازارباەۆ زياتكەرلىك مەكتەبىنىڭ وقۋشىسى تالعات بەك ەلوردادا وتكەن « ۇلى دالا مۇراگەرلەرى» اتتى كورمەدە ءوز كومانداسىنىڭ جوباسىن تانىستىردى. بۇگىندە اتالعان جوباعا اقش عالىمدارى قىزىعۋشىلىق تانىتىپ وتىر, دەپ حابارلايدى قازاقپارات
تالعاتتىڭ ايتۋىنشا, وتكەن جىلى ول ءوز كومانداسىمەن بىرگە عارىشتا كۇل-قوقىستى جينايتىن اپپاراتتى ويلاپ تاپتى. اتالعان سپۋتنيك ارنايى زونت ارقىلى وربيتاداعى كۇل-قوقىستى جيناپ, عارىش اپپاراتتارىنىڭ قاۋىپسىزدىگىن قامتاماسىز ەتە الادى. «بۇگىندە جىل سايىن جەر وربيتاسىندا ميللياردتاعان بولشەكتەر اينالىپ جۇرەدى. ونداي كۇل-قوقىستار ساعاتىنا 27 مىڭ شاقىرىم جىلدامدىقپەن قوزعالادى. سوندىقتان ۇساق نارسەنىڭ ءوزى جەر سەرىكتەرىنە ۇلكەن زاقىم كەلتىرە الادى. ال ءبىز ويلاپ تاپقان اپپاراتتىڭ ارقاسىندا وربيتانى بارلىق كۇل-قوقىستان تازارتا الماساق تا, عارىش اپپاراتتارىنىڭ قاۋىپسىزدىگىن قامتاماسىز ەتۋگە بولادى. ول زونت ارقىلى ديامەترى 70 سانتيمەتر بولاتىن بولشەكتەردى اتموسفەراعا باعىتتايدى. سول جەردە كۇل-قوقىستار تولىعىمەن جانىپ كەتەدى», – دەدى ونەرتاپقىش.
ونىڭ ايتۋىنشا, وتكەن جىلى ءۇندىستاننىڭ نيۋ-دەلي قالاسىندا وتكەن روبوتوتەحنيكادان حالىقارالىق وليمپيادادا كوماندا وسى جوبامەن باس جۇلدەنى جەڭىپ العان. سول جەردە اقش-تىڭ عالىمدارى جاڭا اپپاراتقا قىزىعۋشىلىق ءبىلدىرىپ, تاعى ءبىر جوبانى ىسكە اسىرۋدى ۇسىندى.
نازارباەۆ زياتكەرلىك مەكتەپتەرىنىڭ جەتىستىكتەرىنە ارنالعان « ۇلى دالا مۇراگەرلەرى» اتتى كورمەدە ۇلتتىق قولونەر, كوركەمسۋرەت, گوبەلەن, پاننو جانە تاعى باسقا قولدانبالى ونەر سالاسىنداعى مەكتەپ وقۋشىلارىنىڭ ءوز قولىمەن جاساعان بۇيىمدارى, سونداي-اق روبوتوتەxنيكا, عارىش, مۇناي-گاز, ينفراقۇرىلىم جانە وڭدەۋ ونەركاسىبى بويىنشا ويلاپ تاپقان جوبالارى تانىستىرىلدى.
ماسەلەن, قىزىلوردا قالاسىنداعى نازارباەۆ زياتكەرلىك مەكتەبىنىڭ وقۋشىسى ۆلاديمير كورياك كوپدەڭگەيلى اۆتوتۇراق بەكەتىن قۇراستىرىپ شىقتى. «بۇل جوبانىڭ نەگىزگى يدەياسى, بەكەت اۆتوكولىكتەردى اۆتوماتتى تۇردە تۇراققا قويا الادى. جۇرگىزۋشى ءوز كولىگىن جىلجىمالى بەكەتتىڭ پلاتفورماسىنا قويادى دا, تۇراقتاعى ورىندى كورسەتەدى. اۆتوماتتى جۇيە كولىكتى ءوزى ءتيىستى بوكسقا جەتكىزەدى. وسى ىسپەتتى اۆتوتۇراقتىڭ تاعى ءبىر ارتىقشىلىعى, اۋدانى جاعىنان قاراپايىم اۆتوتۇراقپەن بىردەي بولسا دا, ودان دا كوپ كولىكتى سىيعىزدىرا الادى», – دەيدى ۆلاديمير.
كورمەدە تانىستىرىلعان تاعى ءبىر جاڭالىق – بۇگىنگى زىمىرانتاسىعىشتاردىڭ جانار-جاعار مايىن ۇنەمدەۋگە مۇمكىندىك بەرەتىن جوبا. ونى تاراز قالاسىنداعى نازارباەۆ زياتكەرلىك مەكتەبى ۇسىندى.
ال اقتاۋ قالاسىنداعى نازارباەۆ زياتكەرلىك مەكتەبىنىڭ وقۋشىسى ادىلبەك ابىلايحان «Smart home», ياعني «اقىلدى ءۇي» جوباسىن تانىستىردى. ول بۇگىنگى تەحنولوگيالاردىڭ نەگىزىندە ۇيدەگى تەمپەراتۋرانى رەتتەپ, سوندىرمەي كەتكەن جارىقتى ۇيالى تەلەفوننىڭ كومەگىمەن وشىرۋگە مۇمكىندىك بەرەدى. «اسىرەسە, مۇمكىندىگى شەكتەۋلى ازاماتتار ءۇشىن ونداي قىزمەتتەردىڭ بولعانى اسا قاجەت. مىنە, مەن ۇيالى تەلەفوننان سيگنال جىبەردىم. قازىر نەگىزگى كومپيۋتەر ونى قابىلداپ, Bluetooth ارقىلى جارىقتى وشىرەدى. تۋرا وسى جولمەن جارىقتى سوندىرۋگە بولادى. قازىرگى كەزدە كوز قيمىلىمەن دە ءبىراز نارسەنى ىستەۋگە بولادى», – دەيدى ادىلبەك.
اقتوبە قالاسىنداعى نازارباەۆ زياتكەرلىك مەكتەبىنىڭ وقۋشىسى اقنۇر باعلانوۆا بولسا, ءوز ارىپتەستەرىمەن مۇناي سالاسىنا اسا قاجەتتى ءموبيلدى قوسىمشانى جاساپ شىعاردى. «بۇگىندە تسيستەرناداعى مۇنايدىڭ كولەمىن ولشەۋ مەن ەسەپتەۋدى قولمەن جۇرگىزىپ وتىرادى. ونداي جۇمىستار ۋاقىتتى ۇنەمدەۋگە مۇمكىندىك بەرمەيدى. ال ءبىزدىڭ ءموبيلدى قوسىمشامىز ارقىلى بارلىق ولشەۋ مەن ەسەپتەۋدى اۆتوماتتى تۇردە جۇرگىزۋگە بولادى», – دەدى اقنۇر.
كورمەدە وسىمدىك مايلارىن تازالاۋ تەحنولوگياسى دا تانىستىرىلدى. ونى پاۆلودار قالاسىنداعى نازارباەۆ زياتكەرلىك مەكتەبىنىڭ وقۋشىسى ادەليا ماقاشەۆا ازىرلەگەن. «الدىمەن تابيعي سازدى قىشقىلمەن موديفيكاتسيالايدى. سوسىن مەن ونى ءبىر جۋىپ شىعامىن دا, ءسىلتى ارقىلى وتكىزەمىن. ودان كەيىن بالشىقتى تاعى جۋامىن. ءسويتىپ, موديفيكاتسيالانعان تازا بالشىقتى الامىن. ول ارقىلى وسىمدىك مايلارىن تازارتۋعا بولادى», – دەيدى ادەليا.
ايتا كەتەيىك, استانادا وتكەن « ۇلى دالا مۇراگەرلەرى» كورمەسى اياسىندا مۇعالىمدەرگە ارنالعان شەبەرلىك ساباقتارى دا ۇيىمداستىرىلدى.
ودان بولەك, وقۋشىلار قولدانىسقا ەنگىزگەن تەحنيكالارىمەن دە تانىستىردى. ماسەلەن, اتىراۋ قالاسىنداعى نازارباەۆ زياتكەرلىك مەكتەبىنىڭ تاعى ءبىر وقۋشىسى ساتتىعالي جولداسباي ءوز اتاسىنا «اقىلدى تاقيانى» جاساپ بەردى. سەمەيدەگى نازارباەۆ زياتكەرلىك مەكتەبىنىڭ وقۋشىسى ءادىل ورداەۆ ءوزىنىڭ روبوتتارىن «قارا جورعا» بيلەتكىزىپ قويسا, نازارباەۆ زياتكەرلىك مەكتەبىنىڭ تاعى ءبىر وقۋشىسى اباي لوران المۇحامبەتوۆ وتتى دىبىسپەن وشىرەتىن قۇرىلعىنى قۇراستىرعان.