بۇگىن ۇكىمەت ۇيىندە پرەمەر-مينيستر باقىتجان ساعىنتاەۆ مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىندا مالىمدەلگەن تاپسىرمالارىن ورىنداۋ ماقساتىندا ساتىپ الۋلار جۇيەسىن جەتىلدىرۋ ماسەلەلەرى بويىنشا كەڭەس وتكىزدى. بۇل تۋرالى ۇكىمەت باسشىسىنىڭ رەسمي سايتى حابارلادى.
كەڭەس بارىسىندا قىزمەتتى ورتالىقتاندىرۋ قاعيداسى بويىنشا ساتىپ الۋلاردىڭ بىرىڭعاي جۇيەسىن ەنگىزۋ ماسەلەلەرى تالقىلاندى. سونداي-اق, كۆازيمەملەكەتتىك سەكتوردا, تابيعي مونوپوليالار مەن جەر قويناۋىن پايدالانۋ سالالارىندا ساتىپ الۋ جۇمىستارىن جۇرگىزۋدىڭ جاڭا تاسىلدەرى قارالدى. پرەزيدەنتتىڭ اتالعان تاپسىرمالارىن ورىنداۋ ساتىپ الۋلار ۇدەرىستەرىن جۇرگىزۋدىڭ ايقىندىلىعىمەن قامتاماسىز ەتۋگە مۇمكىندىك بەرەدى.
كەڭەس قورىتىندىسى بويىنشا پرەمەر-مينيستر ۋاكىلەتتى مەملەكەتتىك ورگاندارعا ساراپشىلار قاۋىمداستىعىمەن بىرلەسىپ ساتىپ الۋلار ۇلگىسىنىڭ جوباسىن تالقىلاپ, ۇكىمەتكە ەنگىزۋدى تاپسىردى.