تۇركيا پارلامەنتىنىڭ دەپۋتاتتارى كونستيتۋتسياعا پرەزيدەنتتىك باسقارۋ تۇرىنە اۋىسۋدى قاراستىراتىن وزگەرىستەر ەنگىزۋ تۋرالى زاڭ جوباسىن قولدادى, دەپ حابارلايدى تاسس.
بۇگىن وتكىزىلگەن داۋىس بەرۋ ناتيجەسىندە زاڭدى قابىلداۋعا 488 دەپۋتاتتىڭ 339-ى كەلىسىم بەرگەن.
بۇدان بۇرىن, 15 قاڭتاردا اتالعان زاڭ جوباسى پارلامەنتتىڭ ءبىرىنشى وقىلىمىندا ماقۇلدانعان. ەندى زاڭ رەفەرەندۋمعا جىبەرىلەدى.
«اتقارىلعان جۇمىس ءۇشىن دەپۋتاتتارعا العىس بىلدىرەمىن, ەندى حالىقتىڭ ويىن بىلگىمىز كەلەدى», دەپ مالىمدەدى تۇركيا پرەمەرى بينالي يىلدىرىم.
ايتا كەتەيىك, تۇركيا رەسپۋبليكاسى قۇرىلعالى بەرى ەلدە پارلامەنتتىك باسقارۋ جۇيەسى بولدى. ال ونىڭ ورنىنا پرەزيدەنتتىك باسقارۋ جۇيەسىن ەنگىزۋدى قاراستىراتىن نەگىزگى زاڭعا وزگەرىستەردى تۇركيانىڭ ادىلەت جانە دامۋ پارتياسى ەنگىزدى. زاڭ رەفەرەندۋمدا قابىلدانعان جاعدايدا, 2019 جىلدان باستاپ ەنگىزىلەتىن وزگەرىستەر پرەزيدەنتتىڭ قۇزىرىن كەڭەيتە تۇسپەك. اتاپ ايتقاندا, ول جارلىق شىعارىپ, مينيسترلەردى تاعايىنداۋ قۇقىعىنا يە بولادى.