Netflix ارناسى باراك وبامانىڭ جاستىق شاعى تۋرالى فيلم كورسەتەدى. "بارري" ("Barry") دەپ اتالاتىن درامانىڭ پرەمەراسى 2016 جىلعى 16 جەلتوقسانعا جوسپارلانعان, دەپ حابارلايدى kinostan.kz.
سيۋجەتتەگى وقيعا 1981 جىلى بولادى. 20 جاسار باراك وباما نيۋ-يوركقا كەلىپ, كولۋمبيا ۋنيۆەرسيتەتىنە وقۋعا تۇسەدى. دوستارىنىڭ اراسىندا "بارري" اتانىپ كەتكەن بولاشاق پرەزيدەنتتىڭ جاس كەزىندە قانداي ماسەلەلەرمەن بەتپە-بەت كەلۋگە ءماجبۇر بولعانى, ساياسي كوزقاراسىن قالىپتاستىرۋعا نە سەبەپ بولعانى كورسەتىلەدى.
جاس باراك وبامانى دەۆون تەررەلل ەسىمدى اكتەر وينايدى. بۇل ونىڭ كينوداعى دەبيۋتى بولماق.
"بارري" - امەريكانىڭ 44 پرەزيدەنتى تۋرالى ءبىرىنشى فيلم ەمەس. 2016 جىلدىڭ باسىندا "ساۋتسايد سەنىمەن بىرگە" ("Southside with You") رومانتيكالىق كينوكارتيناسى جارىق كورگەن ەدى. وندا باراك وباما مەن ونىڭ جارى ميشەل روبينسوننىڭ العاش تانىسۋى باياندالادى.