قوستانايدا «مەنىڭ ەلىم – ماڭگىلىك ەل!» رەسپۋبليكالىق اكتسياسى اياسىندا وبلىستىق پاتريوتتار فورۋمى ءوتتى. وعان جاستارمەن قاتار اعا ۇرپاق وكىلدەرى قاتىستى. ەلىمىز تاۋەلسىزدىگىنىڭ 25 جىلدىق تويىنا دەيىنگى 25 جۇلدىزدى كۇننىڭ باستالۋى قوستانايلىق جاس پاتريوتتار فورۋمى وتكەن كۇنگە تۇسپا-تۇس كەلدى.
بۇل مەرەكە ەل تاريحىنداعى ءىرى وقيعا. سونىمەن قاتار, ەلباسى نۇرسۇلتان نازارباەۆتىڭ باسشىلىعىمەن 25 جىلدا ەلىمىزدە بۇرىن-سوڭدى بولماعان جەتىستىكتەرگە قول جەتتى, تاريح دامۋىنىڭ ولشەمىمەن قاراعاندا, وسىنشا از ۋاقىتتا قازاقستان دەگەن ەلدى الەم تانىپ ۇلگەردى. ماڭگىلىك ەل يدەياسى دا تاۋەلسىزدىك تۇعىرىن بەكىتە ءتۇسۋدى مەڭزەيدى. وبلىستان وبلىسقا بەرىلىپ كەلە جاتقان «ماڭگىلىك ەل جاستارىنىڭ جەتىستىكتەرى كىتابىندا» تاۋەلسىزدىك جىلدارى جاستار اتقارعان ىستەر, ولاردىڭ ەلىمىز دامۋىنا ۇلەسى ايقىن كورىنىس تابادى. وسى فورۋمدا وبلىس اكىمى ارحيمەد مۇحامبەتوۆ فورۋمعا جينالعانداردى الدىمىزدا كەلە جاتقان ۇلىق مەرەكە – ەل تاۋەلسىزدىگىمەن قۇتتىقتادى.
– جەتىسۋدان باستالعان ەستافەتا قوستانايعا دا كەلىپ جەتتى. تاۋەلسىزدىك جىلدارى وبلىس جاستارىنىڭ قانداي جەتىستىككە جەتكەنى كىتاپقا تولتىرىلادى. ءبىزدىڭ وڭىردە تاماشا ءداستۇر قالىپتاسقان ەدى. «قوستاناي وبلىسى جاستارىنىڭ التىن كىتابىنا» وسى كۇنگە دەيىن ءومىردىڭ ءار سالاسىندا جەتىستىككە جەتكەن وبلىستاعى 72 جاستىڭ ەسىمى التىن ارىپپەن جازىلعان. ولاردىڭ وندىرىستە, بيزنەستە, ونەر مەن سپورتتا, الەۋمەتتىك سالادا جۇلدىزى جارقىرادى. ەلگە قىزمەت ەتۋدىڭ ۇلگىسىنە اينالدى. سونىمەن قاتار, تاۋەلسىزدىك جىلدارى مەملەكەت تاراپىنان جاستارعا جاسالعان قامقورلىق تا از بولعان جوق. «بولاشاق», «جۇمىسپەن قامتۋدىڭ جول كارتاسى-2020», «ديپلوممەن – اۋىلعا!» سياقتى كوپتەگەن باعدارلامالار ارقىلى جاستار ءوز ءمۇمكىندىكتەرىن كەڭەيتە ءتۇستى. بولاشاقتا ولار جەتكەن تابىستار ارقاسىندا قازاقستان مويىنى وزىق 30 ەلدىڭ قاتارىنان ورىن الاتىن بولادى, – دەدى ارحيمەد بەگەجان ۇلى. قازاقستان ءتاۋەلسىزدىگىنىڭ 25 جىلدىعى تاقىرىبىنا ارنالعان ۆيدەوروليكتەر وبلىستىق بايقاۋىنىڭ جەڭىمپازدارىنا وبلىس اكىمى جۇلدەلەر تابىس ەتتى.
فورۋمدا ارداگەر كەنجەبەك ۇكين, قازاقستان حالقى اسسامبلەياسى جاستار قاناتىنىڭ كوشباسشىسى ماكسيم سپوتكاي فورۋمعا قاتىسۋشىلاردى قۇتتىقتادى. كەنجەبەك ۇكى ۇلى تاۋەلسىزدىكتىڭ ارقاسىندا جاڭا ەلگە اينالعانىمىزدى, كوك تۋىمىزدىڭ بۇۇ تورىندە جەلبىرەپ تۇرعانىن تىلگە تيەك ەتتى. جالپى, ەلىمىز تاۋەلسىزدىگىنىڭ قولعا قونۋىنا جاستاردىڭ ۇلەسى از ەمەس ەكەنىن دە ايتىپ ءوتتى.
– كۇلتەگىن بابامىز VIII عاسىردا ماڭگىلىك ەل وسيەتىن تاسقا قاشاپ جازىپ كەتكەن ەدى, ونى ەلباسىمىزدىڭ باستاۋىمەن بۇگىنگى ۇرپاق قۇردى. جاستار ماڭگىلىك ەلدى العا اپارادى. ماڭگىلىك ەل بولۋ ءۇشىن الدىمەن بۇگىنگى ۇرپاق وتاندى, جەردى, ەلدى, ءداستۇر مەن ءتىلدى ءسۇيۋى كەرەك, – دەدى كەنجەبەك ۇكى ۇلى.
تاۋەلسىزدىك جىلى تۋعان ۇلاندار قازىر 25 جاسقا تولدى, ولار ءبىلىم الىپ, ءبىر-ءبىر ماماندىق يەسى اتانىپ, ەلگە قىزمەت ەتىپ ءجۇر. ساحناعا تاۋەلسىزدىكتىڭ قوستانايلىق قۇرداستارى شاقىرىلدى. سولاردىڭ ءبىرى «قوستاناي وبلىسى جاستارىنىڭ التىن كىتابىنىڭ» لاۋرەاتى ولجاس دۇيسەكوۆ فورۋمعا قاتىسۋشى جاستاردىڭ ەلباسىنا ۇندەۋىن وقىدى. قوستاناي جاستارىنىڭ تاۋەلسىزدىك جىلدارى جەتكەن جەتىستىكتەرى بايان ەتىلگەن مەرەيتويلىق كىتاپ پاۆلودار وبلىستىق «قوعامدىق كەلىسىم» مەملەكەتتىك مەكەمەسى باسشىسىنىڭ ورىنباسارى جاقيا قايراتقا سالتاناتتى تۇردە تابىس ەتىلدى.
ءنازيرا جارىمبەتوۆا,
«ەگەمەن قازاقستان»
قوستاناي