قازىرگى تاڭدا ۇكىمەتتىك ەمەس ۇيىمدارعا مەملەكەت تەڭ سەرىكتەسى رەتىندە قارايدى. ويتكەنى, سوڭعى جىلدارى مەملەكەتتىك ورگاندار مەن ۇكىمەتتىك ەمەس ۇيىمداردىڭ ىنتىماقتاستىعى جۇيەلى سيپاتقا يە بولىپ ۇلگەردى. مىنە, ەلدەگى ازاماتتىق قوعامنىڭ ءرولىن نىعايتۋ, زاڭنامانى جەتىلدىرۋ, ازاماتتىق سەكتوردى دامىتۋ جونىندەگى جاڭا تۇجىرىمدامالىق قۇجاتتاردى ازىرلەۋ اياسىندا جامبىل وبلىستىق ىشكى ساياسات باسقارماسى ۇيىمداستىرعان جەرگىلىكتى ۇكىمەتتىك ەمەس ۇيىمداردىڭ «تاۋەلسىزدىككە 25 جىل: دامۋ, جەتىستىك, كەلەشەك» اتتى فورۋمى ناعىز ۇنقاتىسۋ الاڭىنا اينالدى.
جالپى العاندا, بۇگىندە جامبىل وبلىسىندا 700-دەن استام كوممەرتسيالىق ەمەس ۇيىمدار مەن قوعامدىق قورلار ءوز قىزمەتتەرىن جۇزەگە اسىرۋدا, ولاردىڭ 200-دەن استامى بەلسەندى قىزمەت ەتۋدە. ۇكىمەتتىك ەمەس ۇيىمدار مەن بيلىكتىڭ ءوزارا ءىس-قيمىلىنىڭ ماڭىزدى بولىگى مەملەكەتتىك الەۋمەتتىك تاپسىرىستى ىسكە اسىرۋ بولىپ تابىلادى. بيىل الەۋمەتتىك جوبالاردى قارجىلاندىرۋ 465,0 ملن تەڭگەنى قۇرادى. ياعني, بۇل وتكەن جىلمەن سالىستىرعاندا 132,0 ملن تەڭگەگە كوپ.
– حالقىمىزدا «ازامات» دەگەن قاستەرلى ۇعىم بار, – دەيدى جامبىل وبلىسى اكىمىنىڭ ورىنباسارى ەرقانات مانجۋوۆ. – ازاماتتىقتىڭ ولشەمى تولقۇجاتپەن عانا انىقتالمايدى. جۇرەگىڭمەن, ىسىڭمەن وسى ۇعىمعا لايىق بولۋىڭ كەرەك. ال كەز كەلگەن ازاماتتىق قوعام ازاماتتىق ۇستانىمى بەرىك, دەموكراتيالىق قوعام قۇرۋدا جاۋاپكەرشىلىگى مەن بەلسەندىلىگى جوعارى ازاماتتاردىڭ باستامالارىنان قۇرالادى. بۇگىندە ۇكىمەتتىك ەمەس ۇيىمداردىڭ ىسكەرلىك جانە ساپالىق دەڭگەيى جاڭا بەلەستەرگە كوتەرىلدى. قوعامدىق ۇيىمداردىڭ ۇلكەن الەۋمەتتىك جانە ساياسي قوزعاۋشى كۇشكە اينالعانى اقيقات.
ءيا, شىنىندا تاۋەلسىزدىكتىڭ العاشقى جىلدارىنان باستاپ ەلباسى ن.نازارباەۆتىڭ باسشىلىعىمەن ەلىمىزدە جاڭا يدەيالار جۇزەگە اسىرىلىپ, دەموكراتيالىق رەفورمالارعا كەڭ ءورىس اشىلدى. مەملەكەت باسشىسى ازاماتتىق قوعام بەلسەندىلىگىن ارتتىرۋدا ۇلكەن مىندەتتەر جۇكتەپ, زور سەنىم ارتىپ كەلەدى. ەلىمىزدە جالپىعا ورتاق ەڭبەك قوعامىن قۇرۋدا مەملەكەت, بيزنەس جانە ۇكىمەتتىك ەمەس ۇيىمدار ايرىقشا ماڭىزعا يە بولىپ وتىر. ويتكەنى, مەملەكەتتىك ساياساتتىڭ نەگىزگى ماقساتى ازاماتتىق قوعام بەلسەندىلىگىن كوتەرۋگە باعىتتالعان. ناتيجەسىندە ۇكىمەتتىك ەمەس ۇيىمدار بۇگىندە ءوڭىردىڭ الەۋمەتتىك-ەكونوميكالىق, قوعامدىق-ساياسي جانە رۋحاني ءومىرىنىڭ دامۋىنا ۇلكەن ۇلەس قوسۋدا. جەرگىلىكتى اتقارۋشى ورگاندار اراسىنداعى ءوزارا بايلانىستى بۇدان دا نىعايتىپ, قوعامدىق بىرلەستىكتەردىڭ الەۋەتىن ۇتىمدى پايدالانۋ – وزەكتى ماسەلە.
– 2011 جىلى حالىقتى الەۋمەتتىك قورعاۋ سالاسىندا ارناۋلى الەۋمەتتىك قىزمەت كورسەتۋدىڭ جاڭا ستاندارتى قولدانىسقا ەنگىزىلدى, – دەيدى جامبىل وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ەرمەك بىقىباەۆ. – وسىعان بايلانىستى ارناۋلى الەۋمەتتىك قىزمەتتەر ۇكىمەتتىك ەمەس ۇيىمدار ارقىلى دا ۇسىنىلۋدا. ەگەر 2011 جىلى بيۋدجەتتەن بولىنگەن 9,7 ملن تەڭگەگە ەكى الەۋمەتتىك جوبا ارقىلى 330 ادام قامتىلسا, بيىلعى جىلى 14 الەۋمەتتىك جوباعا وبلىستىق جانە جەرگىلىكتى بيۋدجەتتەردەن 138,2 ملن تەڭگە ءبولىنىپ, 1713 مۇمكىندىگى شەكتەۋلى ازاماتتارعا جاردەم كورسەتىلدى. جالپى, 2011 جىلدان باستاپ بيۋدجەتتەردەن بولىنگەن 340,2 ملن تەڭگەگە 5334 ادام ارناۋلى الەۋمەتتىك قىزمەتىمەن قامتىلدى. ياعني, سوڭعى ءتورت جىلدا مۇگەدەكتەردىڭ ماسەلەلەرىن شەشۋگە ۇكىمەتتىك ەمەس ۇيىمدار بەلسەندى اتسالىسىپ كەلەدى. «اسار» زاڭدى تۇلعالار وداعى, «جاندانۋ», «امازونكا», «دوس تاراز», «نۇر پەريزات», «مۇمكىندىگى شەكتەۋلى ازاماتتاردىڭ قۇقىقتارى مەن مۇمكىندىكتەرى» بىرلەستىكتەرى مەن «اينالايىن» بالالار مەن جاسوسپىرىمدەر ورتالىعى «ءبارىمىز بىردەيمىز – كەمسىتۋدى بىلمەيمىز» رەسپۋبليكالىق فەستيۆالى اياسىندا وتكىزىلگەن «قازاقستاندا ىسكە اسىرىلاتىن ەڭ ۇزدىك الەۋمەتتىك جوبا» كورمەسىنە قاتىسىپ, ەكى جىل قاتارىنان باس جۇلدەگە يە بولدى.
بۇگىنگى كۇنى جامبىل وبلىسىندا 43 807 مۇگەدەك بار بولسا, ونىڭ 5587-ءسى بالا. ارناۋلى الەۋمەتتىك قىزمەتتەردىڭ كولەمى مەن ساپاسىن جاقسارتۋ ماقساتىندا سوڭعى ەكى جىلدىڭ ىشىندە جامبىل اۋدانىنداعى اسا اۋىلىندا 30 ورىندىق, شۋ اۋدانىنداعى تولە بي اۋىلىندا 25 ورىندىق جانە قورداي اۋدانىنداعى قورداي اۋىلىندا ورنالاسقان 25 ورىندىق مۇگەدەك بالالاردى وڭالتۋ ورتالىقتارى جانە ت.رىسقۇلوۆ اۋدانىنىڭ قۇلان اۋىلىندا 20 ورىندىق بالالارعا ارنالعان شاعىن ءۇي اشىلدى.
فورۋمدا «جامبىل وبلىسىنىڭ ازاماتتىق اليانسى» زاڭدى تۇلعالار بىرلەستىگىنىڭ توراعاسى ز.يۋلداشەۆ, «اقبۇلاق» قوعامدىق بىرلەستىگىنىڭ ءتورايىمى ن. راحىشەۆا, «جاڭارۋ» سجقجۇق رقب وبلىستىق فيليالىنىڭ توراعاسى ق.تولەنديەۆ, «جاستار اۆياتسيالىق ورتالىعى» قوعامدىق بىرلەستىگىنىڭ توراعاسى ا.كيسيل جانە باسقا دا قاتىسۋشىلار مەملەكەت پەن ازاماتتىق قوعامنىڭ ىنتىماقتاستىعى جونىندە پىكىرلەرىن ءبىلدىرىپ, ءوز ويلارىن ورتاعا سالدى.
جيىن سوڭىندا وڭىردەگى ازامات-تىق قوعامنىڭ دامۋى مەن وركەندەۋىنە قوسقان ۇلەسى ءۇشىن ءبىرقاتار ازامات وبلىس اكىمىنىڭ قۇرمەت گراموتاسىمەن ماراپاتتالدى.
ورالحان ءداۋىت,
«ەگەمەن قازاقستان»
جامبىل وبلىسى
سۋرەتتى تۇسىرگەن
اقادىل رىسماحان