2000
*13 ماۋسىمدا قازاقستان پرەزيدەنتى نۇرسۇلتان نازارباەۆ رەسمي ساپارمەن تاجىكستان رەسپۋبليكاسىنىڭ استاناسى دۋشانبەگە باردى. تاراپتار كەزدەسۋىندە حالىقارالىق جانە ايماقتىق قاۋىپسىزدىكتىڭ وزەكتى ماسەلەلەرى تالقىلاندى.*
*15 ماۋسىمدا كورنەكتى جازۋشىسى ءسابيت مۇقانوۆتىڭ عاسىرلىق تويى قالامگەردىڭ تۋعان جەرىندە تۇيىندەلدى. مەرەيتويعا پرەزيدەنت نۇرسۇلتان نازارباەۆ قاتىسىپ, ءسوز سويلەدى. بۇل تۋرالى «ەگەمەن قازاقستان» گازەتىنىڭ 17 ماۋسىم كۇنگى نومىرىندە «جاقسى جاننىڭ تويىندا نۇر جاۋادى» تاقىرىبىمەن ماقالا جاريالاندى.
*18-21 ماۋسىم ارالىعىندا قازاقستان پرەزيدەنتى ن.ءا.نازارباەۆتىڭ رەسەي فەدەراتسياسىنا رەسمي ساپارى ءوتتى. ۆ.پۋتين قازاقستان پرەزيدەنتىنىڭ ساپارىنا رەسەيدە زور ءمان بەرىلىپ وتىرعانىن ايتا كەلىپ, ءوزىنىڭ شاقىرۋىن قابىل العانى ءۇشىن نۇرسۇلتان نازارباەۆقا العىسىن جەتكىزدى. ەلباسى ساپار اياسىندا تمد ەلدەرى باسشىلارى مەملەكەتارالىق كەڭەسىنىڭ كەزەكتى ماجىلىسىنە قاتىستى.
*26 ماۋسىمدا قازاقستان پرەزيدەنتى نۇرسۇلتان نازارباەۆتىڭ بەلگياعا ساپارى باستالدى. بەلگيا كورولى البەرت II مەن ناتو-نىڭ باس حاتشىسى لورد دج. روبەرتسونمەن, بەلگيانىڭ پرەمەر-ءمينيسترى ج.-ل. دەانمەن, ەۋروپالىق كوميسسيانىڭ پرەزيدەنتى ر.پروديمەن كەزدەسۋلەردە ەكى جاقتى جانە حالىقارالىق قاتىناستاردىڭ كوپتەگەن كۇردەلى ماسەلەلەرى تالقىلاندى.
*28 ماۋسىمدا قازاقستان پرەزيدەنتىنىڭ فرانتسياعا رەسمي ساپارى باستالدى. فرانتسيا پرەزيدەنتى جاك شيراكپەن, ەلدىڭ پرەمەر-ءمينيسترى ليونەل جوسپەنمەن, فرانتسيا ۇلتتىق جينالىسىنىڭ توراعاسى ر.فورنيمەن كەزدەسۋلەر وتكىزىلدى.
*3 شىلدەدە قاراعاندى مەتاللۋرگيا كومبيناتىندا قازاقستاندىق تۇڭعىش شويىن بالقىتىلعانىنا 40 جىل تولدى. وعان سول كەزدەگى جاس مەتاللۋرگ نۇرسۇلتان نازارباەۆ تا قاتىسقان. وسى وقيعاعا وراي پرەزيدەنت ن.ءا.نازارباەۆ تەمىرتاۋدا بولدى.
*4 شىلدەدە پرەزيدەنت ن.ءا.نازارباەۆ استانادا ناتو-نىڭ باس حاتشىسى لورد دج.روبەرتسونمەن كەزدەستى. كەلىسسوزدەردە قازاقستان مەن ناتو اراسىنداعى ىنتىماقتاستىقتى ءارى قاراي دامىتۋ, «بەيبىتشىلىك ءۇشىن سەرىكتەستىك» باعدارلاماسىن ىسكە اسىرۋ جايتتارى قاراستىرىلدى. سونداي-اق, وسى كۇنى قازاقستاننىڭ الدىنان اسا جارقىن كوكجيەك اشىلدى: اتىراۋ وبلىسىنداعى شىعىس قاشاعاننان مۇنايدىڭ وراسان مول قورى تابىلدى. بۇل جاڭالىقتى ايداي الەمگە پرەزيدەنت نۇرسۇلتان نازارباەۆ جاريا ەتتى.
*5 شىلدەدە دۋشانبەدە «شانحاي بەستىگىنە» قاتىسۋشى مەملەكەتتەر باسشىلارىنىڭ كەزەكتى ءسامميتى ءوتتى.
*6 شىلدەدە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ الپىس جاستىڭ اسقارىنا كوتەرىلدى. مەرەيتوي قارساڭىندا ەلباسىنىڭ اتىنا ەل ازاماتتارىنان, كوپتەگەن ەلدەردىڭ باسشىلارىنان, مادەنيەت پەن ونەر قايراتكەرلەرىنەن قۇتتىقتاۋلار كەلىپ ءتۇستى.
*18 تامىزدا يالتادا تمد ەلدەرى باسشىلارىنىڭ كەزەكتى كەزدەسۋى بولىپ ءوتتى. سامميت قاتىسۋشىلارى ورتالىق ازياداعى جانە تاجىكستاننىڭ تاۋلى شەكارالارىنداعى جاعدايدى تالقىلادى.
*20 تامىزدا بىشكەكتە ورتالىق ازيا مەملەكەتتەرىنىڭ باسشىلارى مەن رەسەي پرەزيدەنتىنىڭ كەزدەسۋى بولدى.
*23 تامىزدا پرەزيدەنت ن.ءا.نازارباەۆ «قازاقستان رەسپۋبليكاسىنىڭ ۇلتتىق قورىن قۇرۋ تۋرالى» جارلىققا قول قويدى.
*4 قىركۇيەكتە قازاقستان پرەزيدەنتى لوندونعا ساپار جاساپ, ەۋروپالىق قايتا قۇرۋ جانە دامۋ بانكىنىڭ پرەزيدەنتى ج.لەمەرمەن, «BAE Systems» اەروعارىش كومپانياسىنىڭ ديرەكتورى دج.ۆەستونمەن جانە ۇلىبريتانيانىڭ ەكس-پرەمەرى م.تەتچەرمەن كەزدەستى.
*6 قىركۇيەكتە نيۋ-يوركتە بۇۇ باس اسسامبلەياسىنىڭ 55-ءشى سەسسياسى شەڭبەرىندە مىڭجىلدىق ءسامميتى اشىلىپ, وندا ەلباسى «قاۋىپسىزدىك جانە ىنتىماقتاستىق – عالامدىق جانە ايماقتىق اسپەكتىلەر» تاقىرىبىندا بايانداماسىن جاسادى.
*9 قازاندا رەسەي پرەزيدەنتى ۆلاديمير پۋتين رەسمي ساپارمەن قازاقستانعا كەلدى. ەكەۋارا سۇحباتتا ەل باسشىلارى ەكونوميكالىق ىنتىماقتاستىق سالاسىندا وڭ ۇردىستەر ەكى جاقتىڭ ءوزارا ءتيىمدى ارىپتەستىككە ۇمتىلىسىنىڭ ناتيجەسىندە مۇمكىن بولىپ وتىرعانىن اتاپ ءوتتى. كەلىسسوزدەر كاسپي تەڭىزىنىڭ قۇقىقتىق مارتەبەسىنە بايلانىستى رەسەي مەن قازاقستاننىڭ كوزقاراسى ورتاق ەكەندىگىن كورسەتتى. اتالعان ساپار شەڭبەرىندە ەكىجاقتى ىنتىماقتاستىق ماسەلەلەرى دە تالقىلانىپ, قازاقستاننىڭ استراحاندا كونسۋلدىعىن جانە رەسەي فەدەراتسياسىنىڭ ورالدا كونسۋلدىعىن اشۋ تۋرالى كەلىسىمگە قول قويىلدى.
*10 قازاندا استانادا كەدەندىك وداققا قاتىسۋشى ەلدەر – بەلارۋس, قازاقستان, قىرعىزستان, رەسەي جانە تاجىكستان باسشىلارى مەملەكەتارالىق كەڭەسىنىڭ كەزەكتى ءماجىلىسى بولدى. ءماجىلىس جۇمىسىنا مەملەكەت باسشىلارى ا.لۋكاشەنكو, ن.نازارباەۆ, ا.اقاەۆ, ۆ.پۋتين جانە ە.راحمونوۆ كاتىستى. مەملەكەت باسشىلارى ەۋرازيالىق ەكونوميكالىق قاۋىمداستىقتى (ەۋرازەق) قۇرۋ تۋرالى شارتقا قول قويدى.
*11 قازاندا ۇجىمدىق قاۋىپسىزدىك تۋرالى كەلىسىمگە (ۇقك) مۇشە ەلدەردىڭ باسشىلارى بىشكەكتە باس قوستى. ۇجىمدىق قاۋىپسىزدىكتىڭ ايماقتىق كۇشتەرىن قۇرۋ تۋرالى شەشىم قابىلداندى.
*16 قازاندا سەمەيدە ەرتىستىڭ ۇستىنەن تارتىلعان كوپىردى اشۋ سالتاناتى بولدى. لەنتاسىن پرەزيدەنت نۇرسۇلتان نازارباەۆتىڭ ءوزى قيعان بۇل عالامات كوپىردىڭ ۇزىندىعى – 250, بيىكتىگى – 90, ال ەنى – 35 مەتر. كوپىر ۇستىندەگى التى قاتار جولدىڭ ارقايسىسىنىڭ ەنى 4 مەترگە جۋىق.
*19 قازاندا تۇرىك رەسپۋبليكاسىنىڭ پرەزيدەنتى احمەت نەجدەت سەزەر رەسمي ساپارمەن قازاقستانعا كەلدى. كەزدەسۋ بارىسىندا ساۋدا-ەكونوميكالىق ءوزارا ءىس-قيمىل ماسەلەلەرى تالقىلاندى.
*20 قازاندا تۇركىستاننىڭ 1500 جىلدىق تورقالى تويى باستالدى. العاشقى كۇنگى عىلىمي-پراكتيكالىق كونفەرەنتسيادا پرەزيدەنت نۇرسۇلتان نازارباەۆ ءسوز سويلەدى. «جاڭا عاسىر, جاڭا مىڭجىلدىقتى بەرەكە كوبەيتەر بىرلىكپەن, ىرىس كوبەيتەر ىنتىماقپەن باستاعانىمىز لازىم. ءدال وسىناۋ كيەلى تۇركىستان تورىندە, اۋليە ازىرەت سۇلتاننىڭ ىرگەسىندە ءوتىپ جاتقان ۇلى دۋمان سونداي جالپىۇلتتىق جاراستىقتىڭ, جاپپاي ارىلۋ مەن تازارۋدىڭ جيىنىنا اينالىپ, جاقسى باستامانىڭ باسى بولعاي. بۇگىنگى دۋماندا بار بولمىسىمەن جارقىراي كورىنگەن تاتۋ-ءتاتتى كورشىلەستىگىمىز, تۋىسقاندىق بىرلىگىمىز, ىزگى نيەتتى ىقپالداستىعىمىز بەن ىنتىماعىمىز باياندى بولعاي. ويلاعانىمىز وڭىنان ورالىپ, كوزدەگەنىمىز كوكەيدەن شىعا بەرگەي!», دەدى پرەزيدەنت. بۇل تۋرالى
«ەگەمەن قازاقستان» گازەتىنىڭ 21 قازان كۇنگى نومىرىندە «توتىدايىن تارانعان تۇركىستان بارشا تۇركىنىڭ رۋحىن جاڭعىرتۋدا» تاقىرىبىمەن ماقالا جاريالاندى.