20-21 قازان كۇندەرى ءماجىلىس دەپۋتاتتارىنىڭ ءبىر توبى جۇمىس بارىسىنداعى ساپارمەن پاۆلودار وبلىسىندا بولىپ قايتتى.
ماجىلىسمەندەر قىلمىستىق-اتقارۋ جۇيەسىن جەتىلدىرۋ ماسەلەسى جونىندە 5 ينستيتۋتتىق رەفورمانى جۇزەگە اسىرۋعا ارنالعان «100 ناقتى قادام» ۇلت جوسپارىن ورىنداۋ اياسىندا وبلىستىق سوت, پروكۋراتۋرا قىزمەتكەرلەرىمەن, «دوستىق» ۇيىندە قوعام وكىلدەرىمەن كەزدەسۋلەر وتكىزدى. وبلىستىق ىشكى ىستەر دەپارتامەنتىندە دەپۋتاتتار اسىلبەك سماعۇلوۆ, ارمان قوجاحمەتوۆ, ەۆگەني كوزلوۆ, قانات مۋسين, ۆاسيلي ولەينيك پوليتسيا قىزمەتكەرلەرىمەن كەزدەسۋدە ەلىمىزدىڭ زاڭنامالارىنداعى قىلمىستىق, قىلمىستىق-اتقارۋ جۇيەسىندەگى جاڭاشىلدىقتار جايىن ءسوز ەتتى. كەزدەسۋدە ۋاقىت تالاپتارىنا سايكەس كەيبىر زاڭ نورمالارىنا وزگەرتۋلەر ەنگىزۋ قاجەتتىلىگى تۋىپ وتىرعانى دا ايتىلدى.
وبلىس ورتالىعىنداعى «دوستىق» ۇيىندە دە «100 ناقتى قادام» ۇلت جوسپارىن جۇزەگە اسىرۋداعى «قوعامدىق كەلىسىم كەڭەسىنىڭ جانە مەدياتسيا ورتالىقتارىنىڭ اتقاراتىن ءرولى» دەگەن تاقىرىپتا دوڭگەلەك ۇستەل وتىرىسى ءوتتى. وتىرىسقا پارلامەنت ءماجىلىسىنىڭ دەپۋتاتتارى نارينە ميكاەليان, باقىتجان ءابدىرايىم, نۇرلان دۋلاتبەكوۆ, بەرىك دۇيسەنبينوۆ, سنەجاننا يماشەۆا, بالايىم كەسەباەۆا, ماگەررام ماگەرراموۆ, ماڭسۇرحان ماحامبەتوۆ, اسىلبەك سماعۇلوۆ قاتىسىپ, ەلىمىزدە قابىلدانعان «100 ناقتى قادام» ۇلت جوسپارىنىڭ 4-ءشى باعىتى اياسىندا اسسامبلەيا جانىنان قۇرىلعان «قوعامدىق كەلىسىم كەڭەسى» مەن مەدياتسيا ورتالىقتارىنىڭ بۇگىنگى جۇمىسى جايلى ءسوز قوزعادى. پىكىرتالاسقا وبلىستىق ەتنومادەني بىرلەستىكتەرىنىڭ جەتەكشىلەرى, «قوعامدىق كەلىسىم كەڭەسىنىڭ» مۇشەلەرى, مەدياتورلار قاتىستى.
«سلاۆيان مادەني ورتالىعى» قوعامدىق بىرلەستىگىنىڭ ءتورايىمى, «قوعامدىق كەلىسىم كەڭەسىنىڭ» مۇشەسى تاتيانا كۋزينانىڭ ايتۋىنشا, «100 ناقتى قادام» ۇلت جوسپارىن جۇزەگە اسىرۋداعى وبلىستىق «قوعامدىق كەلىسىم كەڭەسىنىڭ» اتقاراتىن ءرولى ايقىن. بۇگىنگى تاڭدا قازاقستاندىق قوعامدا ۇلتتىق بىرلىككە ۇمتىلىس ارتۋدا. ءبىز ەتنوسارالىق كەلىسىمدى ساقتاۋىمىز كەرەك. ءبىزدىڭ الدىمىزدا كوپتەگەن ماقساتتار مەن مىندەتتەر تۇر, ونىڭ ورىندالۋىنا ءاربىر قازاقستاندىق ءوز ۇلەسىن قوسۋى قاجەت. سونىمەن قاتار, ت.كۋزينا ءماجىلىس دەپۋتاتتارىنا مەملەكەتتىك ساتىپ الۋ جۇيەسى زاڭنامالارىن جەڭىلدەتۋدى ۇسىندى.
وبلىستاعى مەدياتسيا ورتالىعىنىڭ باسشىسى ولگا نيكولاشينانىڭ ايتۋىنشا, «دوستىق» ۇيىندە اشىلعان «مەدياتسيا كابينەتى» مەن «مەدياتسيا ورتالىعىنىڭ» حالىققا ءتيىمدى قىزمەت كورسەتۋ بارىسىندا «تاتۋلاستىرۋ راسىمدەرىنىڭ اقپاراتتىق بۇرىشىن» جاساۋ شارالارى جۇرگىزىلۋدە.
جالپى, دوڭگەلەك ۇستەل باسىندا ءسوز العان ءماجىلىس دەپۋتاتتارىنىڭ ايتۋلارىنشا, مەدياتسيا – قازاقستاندىق قوعامنىڭ سىندارلى بولاشاعى. سوندىقتان, مەدياتسيا ينستيتۋتى تۋرالى اقپاراتتاردى كوپتەپ تاراتۋ كەرەك. قحا «قوعامدىق كەلىسىم كەڭەسىنىڭ» جۇمىسىن دۇرىس باعىتتا جۇرگىزۋ قاجەت. سول كەزدە كەڭەس ەلىمىزدەگى ەڭبەك ۇجىمدارىندا تۋىندايتىن داۋلاردى شەشۋدە مەدياتور بولا الادى. ۋاقىت وتە كەلە ءبىز بۇل جۇمىستاردى دۇرىس جولعا قويا الساق, وندا اسسامبلەيا ينستيتۋتى, تولىقتاي العاندا, «قوعامدىق كەلىسىم كەڭەسى» بۇل ماسەلەدە مەدياتور ءرولىن اتقارادى.
ساپار بارىسىندا ءماجىلىس دەپۋتاتتارى وبلىس ورتالىعىندا «كوندومينيۋم وبەكتىلەرىن باسقارۋ جانە تۇرعىنداردىڭ ءومىر ءسۇرۋ جاعدايلارىن قامتاماسىز ەتۋ» تۋرالى وتكەن قوعامدىق كەڭەسكە قاتىستى. تۇرعىن ءۇي, كوممۋنالدىق سالادا ورىن الىپ جاتقان قيىندىقتاردان جان-جاقتى حاباردار بولدى. كەڭەس مۇشەلەرى «تۇرعىن ءۇي قاتىناستارى تۋرالى» زاڭعا بىرقاتار وزگەرىستەر مەن تولىقتىرۋلار ەنگىزۋدى سۇرادى.
فاريدا بىقاي,
«ەگەمەن قازاقستان»
پاۆلودار وبلىسى