قازاق ۇلتتىق اگرارلىق ۋنيۆەرسيتەتىندە «ۆەتەريناريالىق ءبىلىم بويىنشا حالىقارالىق ەپيزووتيالىق بيۋرونىڭ جاھاندىق كونفەرەنتسياسى ۇسىنىستارىن ورتالىق ازيا اۋماعىندا جۇزەگە اسىرۋ تۋرالى» تاقىرىبىندا ءبىرىنشى ايماقتىق كەڭەس ءوتىپ, وعان ۆەتەرينارياعا باعىتتالعان جوعارى وقۋ ورىندارىنىڭ رەسمي وكىلدەرى جانە فرانتسيا اتىنان حالىقارالىق ەپيزووتيالىق بيۋرونىڭ دەلەگاتتارى, تمد-نىڭ 11 مەملەكەتىنەن (ارمەنيا, ازەربايجان, بەلارۋس, گرۋزيا, قازاقستان, قىرعىزستان, رەسەي, تاجىكستان, تۇرىكمەنستان, ۋكراينا, وزبەكستان) وكىلدەر قاتىستى.
جيىندى قازاق ۇلتتىق اگرارلىق ۋنيۆەرسيتەتىنىڭ رەكتورى, اكادەميك تىلەكتەس ەسپولوۆ اشىپ, ۆەتەريناريا سالاسىنداعى تۇيتكىلدى ماسەلەلەردى ورتاعا سالىپ, اتالعان باعىتتا ۋنيۆەرسيتەت تاراپىنان اتقارىلىپ جاتقان يننوۆاتسيالىق جوبالار جايىن بايانداپ, الداعى اتقارىلاتىن ءىس-شارالارعا توقتالدى. ول ءوز سوزىندە:
«بۇگىنگى تاڭدا ادامداردىڭ دەنساۋلىعى مەن ءومىرى ءۇشىن ۆەتەرينارلىق مەديتسينانىڭ ماڭىزدىلىعىن قايتا باعالاۋ وتە قيىن. سەبەبى, ادام مەن جانۋارلارعا ورتاق اۋرۋلار سانى جىل سايىن ارتىپ كەلەدى, قورشاعان ورتا فاكتورلارى مەن ءدارى-دارمەكتەردىڭ اسەرىنە ءتوزىمدى ۆيرۋستار مەن ميكروورگانيزمدەردىڭ جاڭا شتامدارى پايدا بولۋدا.
«مەديتسينا ادامدى ەمدەسە, ۆەتەريناريا ادامزاتتى ەمدەيدى!» دەگەن قاعيدا بار. سوندىقتان, ساپالى ۆەتەرينارلىق ءبىلىم بەرۋ مەن بىلىكتى مامان دايىنداۋدىڭ ماڭىزى وتە جوعارى. ۆەتەرينارلىق ءبىلىم بەرۋدى دامىتۋدىڭ يننوۆاتسيالىق ادىستەرىن تالقىلاۋ ءدال ءبىزدىڭ وقۋ ورنىمىزدا ءوتۋىنىڭ وزىندىك سەبەبى بار. ۆەتەريناريا سالاسىندا مامان دايىنداۋدى ۋنيۆەرسيتەت 1929 جىلدان بەرى جۇرگىزىپ كەلەدى. تەك تاۋەلسىزدىك العان جىلداردىڭ وزىندە ۋنيۆەرسيتەت قابىرعاسىنان التى مىڭنان استام ۆەتەرينار, ۆەتەرينار-سانيتار دارىگەرلەر, ماگيسترلەر مەن PhD دوكتورلار تۇلەپ ۇشتى.
ۋنيۆەرسيتەت ۆەتەرينارلىق مەديتسينا جانە ۆەتەرينارلىق سانيتاريا ماماندىقتارى بويىنشا ءۇش دەڭگەيدە ءبىلىم بەرۋ باعدارلاماسىن جۇزەگە اسىرادى.ۋنيۆەرسيتەتتەگى ۆەتەريناريا فاكۋلتەتى حالىقارالىق عىلىم-ءبىلىم بەرۋ كەڭىستىگىندە كوپتەگەن تابىستارعا جەتۋدە. قوس ديپلوم باعدارلاماسىن ءجۇزەگە اسىرۋ بويىنشا الەمنىڭ جەتەكشى جوعارى وقۋ ورىندارىمەن ارىپتەستىك بايلانىس دامۋدا. ولاردىڭ قاتارىندا شىعىس فينليانديا ۋنيۆەرسيتەتىنىڭ, ۆەتەرينارلىق مەديتسينانىڭ گاننوۆەر ۋنيۆەرسيتەتى, ىستانبۇل ۆەتەرينارلىق ۋنيۆەرسيتەتى, ۆاگەنينگەن ۋنيۆەرسيتەتى جانە ت.ب. بار», – دەگەن ول ءارى قاراي ويىن دامىتا كەلە, وقۋ ورنىنىڭ بازاسىندا اگروتەحنيكالىق حاب ءوز جۇمىسىن باستاعانىن ول مەملەكەتتىڭ جانە جەكەمەنشىك سەكتوردىڭ رەسۋرستارىن ءبىر ارناعا شوعىرلاندىرىپ, ونى ەل ءۇشىن پايدالى, پەرسپەكتيۆاسى
جوعارى جوبالارعا باعىتتايتىنىنا توقتالدى.
عىلىمي باسقوسۋدا كوپتەگەن ءماسەلەلەر قاراستىرىلدى. تمد ەلدەرىندە جانە ورتالىق ازيا اۋماعىندا ۆەتەريناريالىق ءبىلىم بەرۋدەگى جاعداي تالدانىپ, سونىمەن قاتار ۆەتەريناريالىق وقۋ ورىندارىن بىتىرۋشىلەرىنىڭ قۇزىرەتتىلىگىنە قويىلاتىن حالىقارالىق ەپيزووتيالىق بيۋروسىنىڭ ۇسىنىستارىن قاراستىرۋ جانە ۆەتەريناريالىق ءبىلىم ۆەتەريناريالىق بەرۋ بويىنشا حالىقارالىق ەپيزووتيالىق بيۋروسىنىڭ نەگىزگى كونتسەپتۋالدى باعدارلاماسىن ۇسىنۋ ماسەلەسى كوتەرىلدى, دەپ حابارلادى قازۇاۋ-ءدىڭ ءباسپاسوز قىزمەتى.