قازانداعى «قامقورلىق» ايلىعى اياسىندا «قازاقستان ءاليۋمينيى» اق جۇمىسشىلارى 3 مىڭ زەينەتكەردى قۇتتىقتايدى
ەۋرازيالىق توپ (ERG) قۇرامىنا كىرەتىن «قازاقستان ءاليۋمينيى» اق-تا يگى ىستەر مارافونى باستالدى. كومپانيا ءوندىرىس ارداگەرلەرىنە قۇرمەت كورسەتۋدە. جىل سايىنعى ءداستۇرگە ساي, بيىل دا زەينەتكەر-اليۋمينيشىلەرگە سىيلىقتار تارتۋ ەتتى. زاۋىتتىڭ تسەحتارى مەن بولىمشەلەرىندە ەڭبەك ەتكەن قاريالار داستارقاندا باس قوسىپ, وتكەندى ەسكە الدى. ءان سالىپ, بي بيلەپ, ءتۇرلى سايىستارعا قاتىسىپ, كوڭىل كوتەردى. مىسالى, گيدرومەتاللۋرگيالىق تسەحتىڭ 150 زەينەتكەرى, ارداگەرلەر كەڭەسىنىڭ بەلسەندىلەرى بيىل ءوز قاتارلارىنا تاعى دا 6 زەينەتكەردى قابىلدادى.
– ءبىز ءاربىر ارداگەرگە ەرەكشە ىزەتپەن كوڭىل بولەمىز. كاسىپورىنداعى ءتۇرلى قيىنشىلىقتارعا قاراماستان, يگى ءداستۇرىمىز وسىلاي جالعاسا بەرەدى, – دەيدى «قازاقستان ءاليۋمينيى» اق پرەزيدەنتى ارمان ەسەنجولوۆ. – ءبىزدىڭ ارداگەرلەر – زاۋىت تاريحىنىڭ كۋاسى. ولار بولاشاق ءاليۋمينيشى جاستارعا ۇلگى-ونەگە.
كاسىپورىنداعى ارداگەرلەرگە دەگەن قامقورلىق قازان ايىنداعى ءىس-شارالارمەن عانا شەكتەلمەيدى. كاسىپورىندا اعا بۋىن وكىلدەرىن قولداۋ ماقساتىنداعى كەشەندى باعدارلاما جۇزەگە اسىرىلادى. ەندى ولارعا ۇنەمى ماتەريالدىق كومەك كورسەتىلىپ, زاماناۋي قۇرالدارمەن جابدىقتالعان مەديتسينالىق ورتالىق ءوز قىزمەتتەرىن ۇسىنادى. ماسەلەن, ۇيلەرىنە جوندەۋ جۇمىستارىن جۇرگىزۋ, كومىر مەن ءدارى-دارمەك جەتكىزىپ بەرۋ سەكىلدى كومەكتەردەن بولەك, كومپانيا ەكى ءاليۋمينيشى – سوعىس ارداگەرى ەۆگەني لوبزيۋك, تىل ەڭبەككەرى مارگاريتا گولوۆنەۆانىڭ كوزىنە جاسالاتىن قىمبات وتا قارجىسىن تولەيدى.
سونىمەن قاتار, قالىپتاسقان جىلداعى ءداستۇر بويىنشا جاز ايلارىندا 246 زەينەتكەر باياناۋىل ۇلتتىق پاركىندەگى «كريستالل» جانە «فاكەل» دەمالىس ۇيلەرىندە دەمالىپ قايتتى. ال 130 زەينەتكەر استانانى ارالاپ, ەرەكشە كوڭىل كۇيگە بولەندى. ءوندىرىس ورنى الەۋمەتتىك جاۋاپكەرشىلىك تۇرعىسىنان جوعارى كورپوراتيۆتىك ستاندارتتارعا سۇيەنەدى. وڭىردەگى باستى كاسىپوداق كوميتەتى رەتىندە قازىر زاۋىتتا «ارداگەرلەر ۇيىمى» قۇرىلدى.
فاريدا بىقاي,
«ەگەمەن قازاقستان»
پاۆلودار