بۇدان شيرەك عاسىر بۇرىن ىرگەتاسى قالانىپ, اشىلۋىنا مەملەكەت باسشىسى نۇرسۇلتان نازارباەۆ قاتىسقان №7 قالالىق كلينيكالىق اۋرۋحانا تەك الماتى قالاسىندا عانا ەمەس, ەلىمىزدەگى اسا ءىرى كوپبەيىندى ەمدەۋ ورنى. ەل ەكونوميكاسىنىڭ ەڭ اۋىر كەزەڭىندە دەنساۋلىق كۇزەتىندە حالىق يگىلىگىنە قىزمەت كورسەتىپ, تاۋەلسىزدىگىمىزدىڭ تۇعىرلى, باياندى بولۋىنا ات سالىسىپ كەلە جاتقان بۇل كلينيكا قيىن جىلداردى دا ەڭسەردى, قانشاما تولاعاي تابىستارعا دا قول جەتكىزدى. سونىڭ نەگىزىندە 25 جىلدا الىپ شاھاردا بىلىكتى ماماندار شوعىرلانعان اۋرۋحانا مەديتسينالىق كومەككە مۇقتاج, جانىنا شيپا ىزدەگەن جاندارعا كۇندىز-ءتۇنى كومەك كورسەتتى. جۋىردا اتالمىش اۋرۋحانا قوس مەرەيتويدى الاتاۋ شيپاجايىندا سالتاناتتى جاعدايدا اتاپ ءوتتى.
ءيا, بۇگىندە حالىق اۋزىندا «جەتىنشى اۋرۋحانا» دەپ اتالىپ كەتكەن بۇل ەمدەۋ ورنى 1000 توسەك-ورىنعا ەسەپتەلىپ سالىنعان ەدى. قىزمەتكەرلەر جاعىنان دا, كەلۋشى پاتسيەنتتەردىڭ سانى جاعىنان دا ەلىمىزدەگى اسا ءىرى مەديتسينالىق ورتالىق سانالادى. قازىرگى تاڭدا ەمدەۋ ورنىندا 1359 قىزمەتكەر, ونىڭ 255-ءى دارىگەر, ولاردىڭ 4-ءى مەديتسينا عىلىمىنىڭ دوكتورى, 14-ءى عىلىم كانديداتى, ەڭبەك ەتەدى, سونىمەن بىرگە, مىڭعا تارتا ورتا بۋىن مەديتسينا قىزمەتكەرلەرى كۇن-ءتۇن دەمەي قاجىماي, تالماي قالا مەن رەسپۋبليكا ايماقتارىنان كەلگەن ەمدەلۋشىلەرگە ارنايى جانە جوعارى مامانداندىرىلعان مەديتسينالىق قىزمەت كورسەتەدى. جىلىنا 70 مىڭنان استام ناۋقاس قارالىپ, ونىڭ 20 مىڭنان استامى ستاتسيوناردا ەمدەلىپ, كۇردەلىلىگى ءارتۇرلى دەڭگەيدەگى 11 مىڭنان استام وتا جاسالادى.
سالتاناتتى جيىندى الماتى قالاسى دەنساۋلىق ساقتاۋ باسقارماسى باسشىسىنىڭ ورىنباسارى باعداگۇل ءابدىراسىلوۆا اشىپ, الدىمەن دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆانىڭ, قالا اكىمى باۋىرجان بايبەكتىڭ قۇتتىقتاۋلارىن جەتكىزىپ, كلينيكا ۇجىمىنىڭ قالامىزدا عانا ەمەس, رەسپۋبليكا دەڭگەيىندە تانىلىپ, كاسىبي بىلىكتىلىگى جاعىنان كوش باستاپ كەلە جاتقانىن ماقتانىشپەن ەكپىن تۇسىرە ايتتى.
– ەگەر ءبىزدىڭ اۋرۋحانانى ادام جاسىمەن ەسەپتەر بولساق, وندا بۇل قوس مەرەيتويعا كلينيكامىز قالىپتاسقان تۇلعا رەتىندە كەلىپ وتىر, – دەدى ودان كەيىن ءسوز العان اتالعان مەكەمەنىڭ باس دارىگەرى ءانۋار امانوۆ.
كلينيكا ەڭ سوڭعى زاماناۋي تەحنولوگيالارمەن جاراقتانعان. ارينە, بارلىق ءىستىڭ باستاماشىسى بىلىكتى كاسىبي مامان. كلينيكا ماماندارى جوعارى كاسىبيلىگىمەن ەرەكشەلەنىپ, بىلىمدەرىن تۇراقتى جەتىلدىرۋدىڭ ناتيجەسىندە جاڭا ەم تۇرلەرىن, سونداي-اق جوعارى تەحنولوگيالى ەمدەۋ ادىستەرىن ەنگىزىپ وتىرادى. ماسەلەن, جوعارى تەحنولوگيالىق قوندىرعىمەن جابدىقتالعان كەڭەستىك-دياگنوستيكالىق ورتالىقتا 300-دەن استام تالداۋ جۇرگىزىلەدى. قاتارداعى قالالىق كلينيكا بولا تۇرا 2012 جىلدان اعزالاردى اۋىستىرۋدى قولعا الدى. اعزالار ترانسپلانتاتسياسى جانە گەپاتوپانكرەاتوبيليارلىق حيرۋرگيا ورتالىعىنىڭ ماماندارى ءاربىر ناۋقاسقا ومىرگە دەگەن قۇشتارلىق پەن ءۇمىت سىيلاۋدا. نەيروينسۋلت, بەس بولىمشەدەن تۇراتىن نەيروحيرۋرگيا ورتالىقتارى مەن بيىل جاڭادان اشىلعان ورتوحيرۋرگيا جانە تراۆماتولوگيا, ەندوۆاسكۋليارلىق جانە ينتەرۆەنتسيالىق حيرۋرگيا بولىمشەلەرىندە زاماناۋي ەمدەۋ تاسىلدەرى جۇرگىزىلەدى. ال جاڭا «جاساندى بۇيرەك» اپپاراتى – گەمودياليزدىك ەم-شارا حالىقارالىق گەمودياليز ستاندارتىنا سايكەس كەلەدى. وندا پاتسيەنتتىڭ احۋالى ىجداعاتتى باقىلانادى. قاننىڭ پارامەترلەرىنە ءدال مونيتورينگ جۇرگىزىلىپ, ماتەريالداردى ارالاستىرۋ ەلەكترونيكا مەن اپپارات ىشىندەگى ناقتى باقىلاۋىمەن جۇزەگە اسىرىلادى. سونداي-اق, ەندوكرينولوگيا, گەماتولوگيا, نەفرولوگيا بولىمشەلەرى دە وڭتۇستىك استانا ءۇشىن بىرەگەي بولىمشەلەر بولىپ سانالسا, نەۆروپاتولوگيا, ۋرولوگيا مەن گينەكولوگيا بولىمشەلەرىندە كۇردەلى دەڭگەيدەگى وتالار جاسالادى. مامانداردىڭ ءبىلىم دەڭگەيىن, كاسىبي بىلىكتىلىگىن ارتتىرۋ كلينيكا باسشىلىعىنىڭ ۇنەمى باقىلاۋىندا.
سۋرەتتە: باعداگۇل ءابدىراسىلوۆا بىلىكتى مامانداردى ماراپاتتاۋدا