تارلانبوز اقىن, قازاقستاننىڭ حالىق جازۋشىسى حاميت ەرعاليەۆتىڭ تۋعان جەرىندە كەۋدە ءمۇسىنى ورنادى
تاعدىردىڭ تالاي تاۋقىمەتىن وتكەرگەن حاميت ەرعاليەۆتىڭ شىعارماشىلىعى جاس كەزىنەن باستاۋ الدى. ون جاسىندا اكەسى ۇستالىپ كەتىپ, ەرتە ەسەيدى. ءبىلىم الۋعا ۇمتىلدى. «حالىق جاۋىنىڭ بالاسى» دەگەن جەلەۋ الدىنان كەسە-كولدەنەڭدەپ شىعا بەرگەنىنە نالىمادى. قايراتىنا ءمىندى. ومىردە دە, ءوزى تاڭداپ ولەڭ ورىندە دە جىگەرىن جاسىتپادى.
ءوزى ءومىر سۇرگەن ۋاقىتتىڭ اۋىرتپالىعىن, قازاقتىڭ باسىنا تۇسكەن قيىندىعىن «وزەگىم تولعان اق جالىن» دەپ شىعارماشىلىعىنا ارقاۋ ەتە ءبىلدى. جۇمىر جەردى جانارىنا سىيعىزىپ, ءداۋىردىڭ بيىگىنەن تەبىرەنە ءۇن قاتتى. ءبىر قاراعاندا, اقىن پوەزياسىندا ءوزىنىڭ ءومىرىن ولەڭگە اينالدىرعانى انىق اڭعارىلادى. جاقىندا ومىردە دە, ولەڭدە دە ەشكىمنەن تايسالماي, ءوز ءۇنىن تانىتا العان حالىق جازۋشىسى, مەملەكەتتىك سىيلىقتىڭ لاۋرەاتى حاميت ەرعاليەۆتىڭ تۋعانىنا ءبىر عاسىر تولدى. وسىعان وراي ونىڭ تۋعان جەرىندە بىرقاتار شارالار وتكىزىلدى.
اتىراۋداعى شارالار الدىمەن, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە ءوتكەن «جۇرەگىمدە جۇمىر جەر» تاقىرىبىمەن وتكەن جىر كەشىمەن شىمىلدىق ءتۇردى. وعان تەك ءوڭىردىڭ عانا ەمەس, ەلىمىزدىڭ ءار تۇكپىرىنەن اقىندار دا قاتىسىپ, عاسىرلىق بيىگىنەن تاۋەلسىز ەلىنىڭ كەلەشەگىنە مول مۇرا قالدىرعان الداسپان اقىنعا ارنالعان جىرلارىن وقىدى. اقىننىڭ ۇرپاقتارى مۇرات پەن التىن, بۇگىنگى جاس بۋىن قاتارىنداعى شوبەرەسى مۇستافا دا ەستەلىكتەرىمەن ءبولىستى.
– حاميت ەرعاليەۆ –اڭىزعا اينالعان ادام, قازاقتىڭ اياۋلى پەرزەنتى. بۇل توي – رۋح تويى, ءمادەنيەت تويى, قۇرمەتتى ازاماتتاردى ءاردايىم ۇلىقتاپ, ەسكە الىپ وتىرۋدى جۇزەگە اسىرۋدى قولعا الۋ كەرەك, –دەدى قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى, حالىقارالىق «الاش» سىيلىعىنىڭ يەگەرى عالىم جايلىباي.
ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى ابزال تالتەنوۆ تەڭىز تولقىنىنداي بۋىرقانىپ, كۇندەي كۇركىرەپ جىر جازعان حاميت ەرعاليەۆ اتىنداعى ستيپەنديا تاعايىنداپ, ونىڭ العاشقى قارجىسى 3-كۋرس ستۋدەنتى ايسۇلۋ جەكسەنوۆاعا بەرىلدى.
شارالار لەگى يساتاي اۋدانىندا جالعاستى. ويتكەنى, وسى ءدال اۋداندا حاميت اقىننىڭ كىندىك قانى تامعان. «ەرعالي كۇتىرى» اتالاتىن مەكەندە ارنايى تاقتا-بەلگى قويىلدى. ەكىنشىدەن, ەلىمىز تاۋەلسىزدىگىن العان تۇستا ح.ەرعاليەۆتىڭ اتىمەن اتالعان اۋىلداعى مەكتەپتىڭ الدىندا قازاق پوەزياسىنىڭ اق بوز پىراعىنداي بولعان حاميت ەرعاليەۆتىڭ كەۋدە ءمۇسىنى اشىلدى. اۋدان اكىمى تۇراربەك سۇلتانبەكوۆ بولاشاقتا دا حاميت اقىننىڭ مۇراسى تۋعان جەرىندە ناسيحاتتالا بەرەتىنىن توقتالدى.
وسى اۋداننىڭ ورتالىعى –اققىستاۋداعى اۋداندىق مادەنيەت ۇيىندە اقىننىڭ مۇراجاي بولمەسى دە جاساقتالىپتى. ونىڭ اشۋىلىندا حاميت ەرعاليەۆ تۋرالى دەرەكتى فيلم كورسەتىلدى. ەندى ءبىر ساتتە ەكراننان «وسىلايشا, اينالايىن, اقىندار, ۇشا الماساڭ ءۇنىڭدى كىم ماقۇلدار؟ جۇرتىمىزدىڭ جۇرەگى بوپ سوق دەۋگە, قاناتى بوپ سامعا دەۋگە حاقىم بار» دەگەن ءوزىنىڭ ولەڭ جولدارىن قىرانداي ساڭقىلداپ وقىپ وتىرعان حاميت ەرعاليەۆتىڭ بەينەسى كورىندى.
وسىنداي اقجولتاي شارالار اتىراۋداعى ماحامبەت اتىنداعى قازاق دراما تەاترىندا پوەزيا كەشىمەن جالعاستى. تەاتر ءارتىستەرى تەك حاميت اقىننىڭ عانا ەمەس, سونىمەن بىرگە, ونىڭ شىعارماشىلىعىنا ارقاۋ بولعان كەيىپكەرلەرىنىڭ بەينەسىن سومدادى.
جولداسبەك شوپەعۇل,
«ەگەمەن قازاقستان»
اتىراۋ وبلىسى