بۇگىنگى تاڭدا پاتەر يەلەرى ءۇشىن ەنەرگيا ۇنەمدەۋ مەن زاماناۋي يننوۆاتسيالىق تەحنولوگيالاردى كۇندەلىكتى قولدانىسقا ەنگىزۋدىڭ ماڭىزى زور. ەكسپو-2017 كورمەسىن ەلىمىزدە وتكىزۋدەگى ماقساتتىڭ ءبىرى وسى ەكەنى بەلگىلى. ەلباسى باستاماسىمەن جۇزەگە اسىرىلىپ جاتقان «نۇرلى جول» ينفراقۇرىلىمدى دامىتۋ باعدارلاماسىندا ونى جۇزەگە اسىرۋ تەتىكتەرى جان-جاقتى كورسەتىلگەن.
وسىعان وراي, ۇلتتىق ەكونوميكا مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ باستاماسىمەن «تۇرعىن ءۇي-كوممۋنالدىق شارۋاشىلىعىن باسقارۋدىڭ ءتيىمدى ادىستەرىن قولدانۋ, يننوۆاتسيا مەن ەنەرگيا ۇنەمدەۋ تەحنولوگيالارىن ەنگىزۋ نەگىزىندە دامىتۋ» اتتى ايماقتىق كونفەرەنتسيالار وتپەك. قازان ايىنىڭ 28-ءى كۇنى استانادا, ال 4 قاراشادا اقتوبە قالاسىندا وتەتىن القالى جيىنعا قالا جانە وبلىس باسشىلارى, سونىمەن قاتار, تۇرعىن ءۇي ينسپەكتسيالارىنىڭ, پيك قاۋىمداستىقتارىنىڭ, حالىقارالىق جوبالاردىڭ, عىلىمي جانە ءبىلىم بەرۋ مەكەمەلەرىنىڭ جەتەكشىلەرى مەن ماماندارى قاتىسادى دەپ كۇتىلۋدە.
قاتىسۋشىلار وڭىرلەردى دامىتۋدىڭ 2020 جىلعا دەيىنگى باعدارلاماسى ورىندالۋىنىڭ بارىسى جايىندا, تۇرعىن ءۇي قاتىناستارىن دامىتۋ, كوپقاباتتى تۇرعىن ۇيلەرگە كۇردەلى جوندەۋ جۇمىستارىن جۇرگىزۋ مەن ۇيىمداستىرۋدى وڭتايلاندىرۋ, باسقارۋشى جانە قىزمەت كورسەتۋشى كومپانيالاردىڭ قىزمەتى تۋرالى بىرقاتار ماسەلەلەردى تالقىلاپ, پايىمدى پىكىرلەرىمەن بولىسەدى.
ايماقتىق كونفەرەنتسيالاردىڭ جۇمىسىنا قاتىسۋعا مۇددەلى كومپانيالار اتالعان شارانىڭ ۇيىمداستىرۋشىسى – تۇرعىن ءۇي-كوممۋنالدىق شارۋاشىلىعىن جاڭعىرتۋ مەن دامىتۋدىڭ قازاقستاندىق ورتالىعىنا حابارلاسا الادى.
نۇرلىبەك دوسىباي,
«ەگەمەن قازاقستان»