ءجۇزۋ سپورتىنان قازاقستان رەسپۋبليكاسى كۋبوگى جولىنداعى جارىستىڭ سالتاناتتى اشىلۋىنا ءوڭىر باسشىسى بەردىبەك ساپارباەۆ, ريو-دە جانەيرودا وتكەن وليمپيادا جانە پاراليمپيادا ويىندارىندا ءجۇزۋ سپورتىنان التىننان القا تاققان دميتري بالاندين مەن زۋلفيا عابيدۋللينا قاتىستى.
-سىزدەردىڭ جەڭىستەرىڭىز جاس ۇرپاقتى سپورتتىڭ وسى تۇرىمەن اينالىسۋعا جەتەلەي تۇسەدى. سوندىقتان جاستارىمىزعا مۇنداي بيىكتەردى باعىندىرۋ ءۇشىن تالاپ پەن ەڭبەك كەرەك دەر ەدىم. مۇنىڭ ءوزى تالاپتانسا, جىگەرلەنسە, الىنبايتىن قامال جوق ەكەنىنىڭ تاعى ءبىر ايقىن دالەلى بولماق. ال تالاپتى جاستى قولداۋعا ارقاشان ءازىرمىز,-دەدى بەردىبەك ماشبەك ۇلى.
جارىسقا الماتى جانە استانا قالالارىنان, ەلىمىزدىڭ بارلىق ايماقتارىنان 220 جانە رەسەيدەن بەس سپورتشى قاتىسۋدا.
ساتىبالدى ءساۋىرباي,«ەگەمەن قازاقستان», اقتوبە وبلىسى.
فوتو: حايرەدەن راۋشانوۆ.