بۇگىن الماتى قالاسىندا قازاقستاندىق كاسىپقوي بوكسشى قانات يسلام مەن گانالىق پاتريك اللوتەي اراسىنداعى جەكپە-جەككە ارنايى ءباسپاسوز-ءماسليحاتى ءوتتى.
ءبىرىنشى بولىپ تىلشىلەردىڭ سۇراقتارىنا پاتريك اللوتەي جاۋاپ بەردى.
- بارلىقتارىڭىزعا راحمەت. الماتىنى ارالاپ ۇلگەرمەدىم ءالى. مۇندا مەن تەك جەڭىس ءۇشىن كەلدىم. قارسىلاسىمدى قۇرمەتتەيمىن. الايدا ول مەن سياقتى مىقتى بوكسشىمەن ءالى جۇدىرىقتاسقان جوق. ارينە, قاناتتىڭ تالاي كەزدەسۋلەرىن زەرتتەدىم. ونىڭ وليمپياداعا قاتىسقانىن بىلەمىن. يسلام – مىقتى بوكسشى. بىراق ونىڭ بۇرىنعى كەزدەسۋلەرى ماعان ماڭىزدى ەمەس, سەبەبى مەن - باسقا قارسىلاسپىن.
كەيىن بۇل كەزدەسۋدىڭ باس ۇيىمداستىرۋشىسى باۋىرجان وسپانوۆ يسلام – اللوتەي جەكپە-جەگىنە قاتىستى ءوز پىكىرىن ايتتى.
- ايتا كەتەر جايت, بۇل كەزدەسۋدە امەريكالىق قازىلار قىزمەت ەتەدى. سونداي-اق, «رينگ-انونسشى» دا امەريكالىق بولادى. ەندى جەكپە-جەككە قاتىستى ايتاتىن بولسام, اللوتەي وزىنە سەنىمدى جىگىت. ول الماتىعا جەڭىلۋ ءۇشىن كەلگەن جوق. قانات بولسا كاسىپقوي نە اۋەسقوي بوكس بولسىن, بىردە-ءبىر رەت نوكداۋندا بولماعان. قازىرگى تاڭدا, يسلام-اللوتەي جەكپە-جەگىنە 8000 مىڭ بيلەت ساتىلدى. جالپى «الماتى ارەنا» 14 مىڭ جانكۇيەر سىيادى. سوندىقتان, بيلەت الۋلارىڭىز ءالى دە مۇمكىن. قاناتتىڭ سۇراۋى بويىنشا بيلەت باعاسىن قولجەتىمدى ەتتىك, شامامەن 1000-10000 تەڭگە ارالىعىندا.
ارتىنشا, قانات يسلام ءوزىنىڭ قارسىلاسى تۋرالى پىكىرىن ءبىلدىردى.
- پاتريك – وتە مىقتى بوكسشى. مەن ونى قۇرمەتتەيمىن. ونىڭ نوكاۋتپەن جەڭىستەرى مەنىڭ جالپى كاسىپقوي بوكستا وتكىزگەن كەزدەسۋلەرىمنەن كوپ. نە بولسا دا, كىم مىقتى ەكەنىن شارشى الاڭ شەشەدى. بىرنەشە اي بويى وسى جەكپە-جەككە دايىندالدىم. ءوز جانكۇيەرلەر الدىمدا بار كۇشىمدى سالامىن. بوكستا ءبىر سوققى ماتچ تاعدىرىن شەشۋى مۇمكىن, سوندىقتان وتە ساق بولۋ قاجەت. بۇل كەزدەسۋ مەن ءۇشىن ۇلكەن سىناق, ۇلكەن جاۋاپكەرشىلىك. اللاعا شۇكىر, اللوتەيگە قارسى جەكپە-جەككە دايىندىعىم جاقسى ءوتتى.
ارى قاراي قاناتتىڭ باس باپكەرى نەلسون لوپەسكە ءسوز بەرىلدى.
- نەگىزى, يسلامنىڭ كەلەسى جەكپە-جەگى اقش-تا ءوتۋى كەرەك بولعان, بىراق ءبىز كوپ ويلانىپ, بۇل كەزدەسۋ ونىڭ تۋعان جەرىندە, الماتى قالاسىندا وتكىزۋدى ءجون كوردىك. اللوتەيگە قارسى كەزدەسۋگە وتە مۇقيات دايىندالدىق. ول وتە قاۋىپتى بوكسشى. ونىڭ ءبىرتالاي كەزدەسۋلەرىن تاماشالادىق. قانات ەگەردە الداعى كەزدەسۋىندە جەڭىسكە جەتسە, وعان ۇلكەن مۇمكىندىكتەر اشىلادى. قانات قازىرگى تاڭدا WBC تۇجىرىمى بويىنشا رەيتينگتە 4-ءشى ورىندا تۇر, ياعني ول جەڭىسكە جەتسە, چەمپيوندىققا تالاسۋى ابدەن مۇمكىن. قاناتتىڭ چەمپيوندىق جەكپە-جەگىن امەريكالىق «Showtime» ارناسى كورسەتۋگە دايىن.
ەستەرىڭىزگە سالا كەتسەك, يسلام مەن اللوتەي قاراسىنداعى جەكپە-جەك قازاننىڭ 29-ى, «الماتى ارەنا» سپورت كەشەنىندە وتەدى.