قازاقستان رەسپۋبليكاسىنىڭ قورعانىس مينيسترلىگىندە ۇلىبريتانيا بىرلەسكەن كورولدىگى مەن سولتۇستىك يرلانديا قورعانىس مينيسترلىگىنىڭ كەڭەيتىلگەن ەۋروپا جونىندەگى دەپارتامەنتىنىڭ باستىعى سايمون لونىڭ ساپارى شەڭبەرىندە قازاقستان مەن ۇلىبريتانيا قورعانىس ۆەدومستۆولارىنىڭ اسكەري-تەحنيكالىق ىنتىماقتاستىعى تۋرالى مەموراندۋمعا قول قويىلدى.
مەموراندۋمعا قول قويۋعا ءوزارا ءتيىمدى اسكەري-تەحنيكالىق ىنتىماقتاستىقتى جۇزەگە اسىرۋ ءۇشىن نەگىز قۇرۋداعى ەكى مەملەكەتتىڭ قورعانىس ۆەدومستۆولارىنىڭ نيەت ءبىلدىرۋى ارقاۋ بولدى.
قول جەتكىزىلگەن ۋاعدالاستىقتى ءىسكە اسىرۋ قازاقستاننىڭ قورعانىس-ونەركاسىبى كەشەنىن دامىتۋ ءجانە قارۋ-جاراق پەن اسكەري تەحنيكانى جاڭعىرتۋ ماقساتىندا ەكىجاقتى بايلانىستى كەڭەيتۋگە ىقپال ەتەدى.
ۇلىبريتانيا بىرلەسكەن كورولدىگى مەن سولتۇستىك يرلانديانىڭ قورعانىس مينيسترلىگىمەن اسكەري ىنتىماقتاستىق 1996 جىلدان باستاپ ەكىجاقتى اسكەري ىنتىماقتاستىقتىڭ جىل سايىنعى جوسپارى بويىنشا جۇرگىزىلىپ كەلە جاتقانىن ايتا كەتەيىك.
ىنتىماقتاستىقتىڭ نەگىزگى باعىتى «قازبريگ» اسكەري قىزمەتشىلەرىنە بريتانيا اسكەري كونسۋلتاتيۆتىك-جاتتىقتىرۋ توبى نۇسقاۋشىلارىنىڭ «دالا قىرانى» وقۋ-جاتتىعۋى مەن ترەنينگتەردىڭ وتكىزىلۋىن قامتيتىن بىتىمگەرشىلىك دايىندىق بولىپ تابىلادى.
ودان باسقا, ۇلىبريتانيانىڭ اسكەري وقۋ ورىندارىندا قازاقستاندىق كادرلاردى دايارلاۋ جانە اسكەري ءبىلىم بەرۋ سالاسىنداعى ءوزارا ءىس-قيمىل جۇزەگە اسىرىلۋدا.
«ەگەمەن-اقپارات»