2008 جىلى وتكەن جازعى وليمپيادا ويىندارىندا ءۇش قارعىپ سەكىرۋ بويىنشا سايىسقا تۇسكەن گرەكيالىق جەڭىل اتلەت حريسوپيا دەۆەتتسي وليمپيادا جۇلدەسىن حوك-قا قايتارادى. حالىقارالىق جەڭىل اتلەتيكا فەدەراتسياسى شىعارعان شەشىمدى بۇگىن, 28 قىركۇيەكتە Inside The Games باسىلىمى مالىمدەدى.
بەيجيىڭ وليمپياداسىندا حريسوپيا دەۆەتتسي ءۇش قارعىپ سەكىرۋ بويىنشا قولا جۇلدەگە يە بولعان ەدى. اتالمىش سىندا قازاقستاندىق جەڭىل اتلەت ولگا رىپاكوۆا ءتورتىنشى ورىنعا تابان تىرەگەن بولاتىن. حريسوپيا دەۆەتتسي وليمپيادا جۇلدەسىن قايتارعان جاعدايدا, وليمپيادانىڭ قولا مەدالى ولگا رىپاكوۆاعا بەرىلەدى. ولگا رىپاكوۆا بەيجىڭ وليمپياداسىنىڭ قولا جۇلدەسىن يەمدەنسە, ءوزى قاتىسقان ءۇش وليمپيادانىڭ جۇلدەگەرى اتانادى.
قايتا تەكسەرىس بارىسىندا دەۆەتتسيدىڭ 2007 جىلعى تالداماسىنان انابيولوگيالىق ستەرويد تابىلعاندىعى انىقتالدى. 2009 جىلى حريسوپيا دەۆەتتسي دوپينگ تەكسەرىسكە قارسىلىق تانىتىپ, سپورتتاعى كارەراسىن اياقتاعان.
حالىقارالىق جەڭىل اتلەتيكا فەدەراتسياسى 40 جاستاعى حريسوپيا دەۆەتتسيدى 2019 جىلعا دەيىن بارلىق جارىستان شەتتەتتى. سونىمەن قاتار, حريسوپيا دەۆەتتسيدىڭ 2007 جىلدىڭ 31 تامىزى مەن 2009 جىلدىڭ 30 تامىزى ارالىعىندا قاتىسقان بارلىق جارىستارىنداعى ناتيجەلەرى جوققا شىعارىلادى.
حالىقارالىق دوپينگكە قارسى اگەنتتىكتىڭ جاڭا ەرەجەسى بويىنشا سپورتشىلاردىڭ سىنامالارى جارىستان كەيىن 10 جىل كولەمىندە ساقتالادى. حالىقارالىق وليمپيادا كوميتەتى وسىعان دەيىن حريسوپيا دەۆەتتسيدەن بولەك, بەيجىڭ وليمپياداسىنىڭ ءۇش جۇلدەگەرىنەن مەدالدارىن قايتارىپ العان بولاتىن.
ايگەرىم توقسانبەك