«KEGOC» ۇيىمداستىرعان حالىقارالىق جارىستا ايشىقتالدى
ماكينسك قالاسىندا تمد-عا قاتىسۋشى مەملەكەتتەردىڭ ەلەكتر ەنەرگەتيكاسى سالاسىنداعى پەرسونالدىڭ كاسىبي شەبەرلىگى ءحىىى حالىقارالىق جارىسىنىڭ تۋى كوتەرىلدى. مۇندا العاشقى ىرىكتەۋ سىناقتارىنان وتكەن كوماندالار «110 كۆ جانە ودان جوعارى كەرنەۋلى قوسالقى ستانسالاردىڭ جابدىقتارىن جوندەۋ مەن ولارعا قىزمەت كورسەتۋ» جونىندە ءتورت كۇن بويى ءوزارا باسەكە كورىگىن قىزدىراتىن بولادى.
سالتاناتتى شارانى تمد ەلەكتر ەنەرگەتيكالىق كەڭەسى اتقارۋ كوميتەتىنىڭ ءتوراعاسى, ۇيىمداستىرۋ كوميتەتىنىڭ ءتوراعاسى ەۆگەني ميشۋك اشىپ, رەسەي فەدەراتسياسى ەنەرگەتيكا ءمينيسترى الەكساندر نوۆاكتىڭ قۇتتىقتاۋىن وقىپ بەردى.
«KEGOC» اكتسيونەرلىك قوعامىنىڭ باسقارما توراعاسى باقىتجان قاجيەۆ ءوز سوزىندە ەنەرگەتيكانىڭ ەرەكشە سالا ەكەندىگىن, ەلەكتر قۋاتىنسىز ءومىر مەن تىرشىلىكتى ەلەستەتۋ مۇمكىن ەمەستىگىن اتاپ ءوتتى. بۇگىنگى كۇنى جەر ءجۇزى مەملەكەتتەرى يننوۆاتسيالىق جانە وزىق تەحنولوگيالاردى ەنگىزۋدە. ولاردىڭ قاتارىندا تمد ەلدەرى دە بار. قازاقستاندا, ءدال وسى وقۋ-جاتتىعۋ پوليگونىندا ەكىنشى رەت ءوتكىزىلىپ وتىرعان حالىقارالىق جارىستىڭ ماڭىزدىلىعى دا وسىدان كورىنەدى. بۇل بىرلىك پەن بىلىكتىلىكتىڭ ىنتىماقتى ءارى تالىمدىك بايلانىسىن نىعايتا تۇسەتىنى ايقىن. «سىزدەر جارىستا شىڭدالىپ, تاجىريبە الماسۋمەن قاتار قازاقستان تاۋەلسىزدىگىنىڭ 25 جىلدىق تابىستى بەلەسىنەن ماعلۇمات الاسىزدار, حالقىمىزدىڭ ونەگەلى سالت-داستۇرلەرىنە قانىعاسىزدار», – دەدى ول.
ءداستۇرلى جارىسقا قاتىسۋشى بەلارۋس, گرۋزيا, رەسەي, وزبەكستان, قازاقستان كوماندالارى مەن باقىلاۋشى رەتىندە كەلىپ وتىرعان قىرعىزستان, تاجىكستان, ۋكراينا مەملەكەتتەرى وكىلدەرىنىڭ شەرۋىنەن كەيىن قازاقستان رەسپۋبليكاسىنىڭ جانە تمد ەلەكتر-ەنەرگەتيكالىق كەڭەسىنىڭ تۋلارى كوتەرىلدى. ۇيىمداستىرۋ كوميتەتىنىڭ ءتوراعاسى ە.ميشۋككە پوليگون باسشىسى ەرجان عوسمانوۆتىڭ كوماندالاردىڭ تولىق دايىندىعى تۋرالى بايانداۋىنان كەيىن التى كەزەڭنەن تۇراتىن جارىس باستالىپ كەتتى. قۇرامىندا 17 تورەشى بار ارنايى توپقا قولدانىستاعى ەرەجەلەر مەن نۇسقاۋلىقتى ءبىلۋ, قۋات وتكىزۋ جابدىقتارعا باقىلاۋ جۇرگىزۋ داعدىسى, 110 كۆ جوعارى ۆولتتىق گەرمەتيكالىق ەندىرىمگە تەحنيكالىق قىزمەت كورسەتۋ, «كرۋن-10 كۆ» سىرتقى قوندىرعىنىڭ كەشەندى تاراتۋ قۇرىلعىلارىندا ءورتتى ءسوندىرۋ داعدىلارى, ەلەكتر توعىنان زارداپ شەگۋشىنى بوساتۋ جانە وعان كومەك كورسەتۋ (مانەكەن مەن رەانيماتسيالىق جاتتىقتىرعىش ارقىلى) شەبەرلىگى بويىنشا 1000 بالدىق ەسەپپەن باعالاۋ مىندەتى جۇكتەلگەن. تورەشىلەر قۇرامىنىڭ مولدىعى جانە ولاردىڭ ءتيىستى انت قابىلداۋى جارىسقا اسا زور ءمان بەرىلەتىنىن اڭعارتادى.
جارىستىڭ ءبىرىنشى كۇنى 5 كوماندا جەرەبەلىك كەستە بويىنشا 6 كەزەڭدىك سايىستى ءوز كەزەگىمەن اتقاردى. ءبىزدىڭ بايقاۋىمىزشا, جارىس جولىنا شىققان ەنەرگەتيكا سالاسىنىڭ ماماندارى كاسىبي دايىندىعى جونىنەن جوعارى كورسەتكىشكە قول جەتكىزدى.
باس تورەشىنىڭ ورىنباسارى نۇربول اپپاقوۆپەن تىلدەسكەنىمىزدە تومەندەگىدەي پىكىرلەرىمەن ءبولىستى.
– بۇگىن بەلارۋس كومانداسى كومپيۋتەرلىك كلاستا تەوريالىق ءبىلىم, قازاقستان تەپلوۆيزورلىق (جابدىقتاردىڭ جۇمىس بارىسىندا قىزۋى) دياگنوستيكا, گرۋزيا جوعارى كەرنەۋلى ايىرعىشتار, رەسەي جوعارى كەرنەۋلى كىرىس جانە وزبەكستان ءوندىرىستىك جاعدايدا ءورت ءسوندىرۋ ماشىقتارىن كورسەتتى. قازىرشە تولىق قورىتىندى جاساۋ ەرتەرەك. ايتكەنمەن, قازاقستاندىق جەتەكشى ينجەنەر قايرات قۇلماعامبەتوۆتىڭ, «وزبەكەنەرگو» اق ەلەكتر سلەسارى اسكادحون ءمۋمينوۆتىڭ, «مينسكەنەرگو» قوسالقى ستانسا قىزمەتىنىڭ شەبەرى الەكساندر ءجيبۋلدىڭ, گرۋزيالىق «تەلاسي» اق مونتەرى الەكسي شۋرگانيانىڭ كاسىبي بىلىكتىلىگىنىڭ جوعارى ەكەندىگى كورىنىپ تۇردى, – دەدى ول.
قىرعىز ەلىنەن كەلگەن باقىلاۋشى الەكسەي بورودين دە جارىستىڭ تالاپقا ساي ءوتىپ جاتقاندىعىن, حالىقارالىق دەڭگەيدەگى بىلىكتىلىك سايىسىنىڭ جوعارى دەڭگەيدە ۇيىمداستىرىلعانىن اتاپ ءوتتى.
شارا بارىسىندا حالىقارالىق حولدينگ قۇرامىنداعى رۋدنىي قالاسىندا ورنالاسقان «قازاق ەلەكتر-ارماتۋرا زاۋىتى» جشس, الەمگە اتى تانىمال «كارابەللي» جانە «سيمەنس», KEGOC كومپانيالارىنىڭ يننوۆاتسيالىق جابدىقتارىنىڭ تانىستىرىلىم كورمەسى ۇيىمداستىرىلدى. سونداي-اق مەرەكەلىك سيپاتتاعى جارىس ارالىعىندا وعان قاتىسۋشىلار اقمولا وبلىستىق فيلارمونياسى مەن كەنجەبەك كۇمىسبەكوۆ اتىنداعى قازاق حالىق اسپاپتارى وركەسترىنىڭ كونتسەرتىنە كۋا بولىپ, ەتنو اۋىلدىڭ ۇلتتىق جابدىقتارىن تاماشالادى جانە قوناقجاي داستارقاننان ءدام تاتتى. اتشاپتىرىم القاپتا سايگ ۇلىكتەر جارىسى ۇيىمداستىرىلىپ, قىز قۋ, تەڭگە الۋ سياقتى ۇلتتىق ونەرىمىز كورسەتىلدى.
باقبەرگەن امالبەك,
«ەگەمەن قازاقستان»
اقمولا وبلىسى