رەسەيدىڭ ءىرى كورمە الاڭى – حالىق شارۋاشىلىعى جەتىستىكتەرى كورمەسىندە قازاقتىڭ ەتنواۋىلى اشىلدى. قازاق مادەنيەتى مەن سالت-داستۇرلەرىنىڭ ەكسپوزيتسياسى استانانىڭ ماسكەۋدەگى مادەنيەت كۇندەرى اياسىندا وتكىزىلىپ, بۇل حالىقارالىق مادەني شارا قازاقستان تاۋەلسىزدىگىنىڭ 25 جىلدىعىنا ارنالدى.
كۇندەردىڭ اشىلۋ سالتاناتى استانا قالاسىنىڭ اكىمى اسەت يسەكەشەۆتىڭ جانە ماسكەۋ قالاسى ۇكىمەتىنىڭ ءمينيسترى سەرگەي چەريوميننىڭ قاتىسۋىمەن ءوتتى.
– مادەنيەت كۇندەرىنە ۇلكەن جاۋاپكەرشىلىكپەن دايىندالدىق. مۇندا 400-دەن استام ادام كەلدى, سونىڭ ىشىندە ارتىستەر, بي انسامبلدەرى, سۋرەتشىلەر, بۇركىت باپتاۋشى قۇسبەگىلەر, ساندىك-قولدانبالى ونەر شەبەرلەرى بار. ءبىر سوزبەن ايتقاندا, ماسكەۋ تۇرعىندارى مەن قوناقتارىن قازاقستان مادەنيەتىمەن جان-جاقتى تانىستىرۋ ءۇشىن بار جاقسىمىزدى الا كەلدىك, – دەدى استانا قالاسى مادەنيەت باسقارماسىنىڭ باسشىسى بولات ماجاعۇلوۆ.
كورمە قوناقتارىنا قولونەرشىلەردەن باستاپ حاندارعا دەيىن ەجەلگى كوشپەلىلەردىڭ تۇرمىسىمەن تانىسۋعا مۇمكىندىك بەرەتىن ءارتۇرلى تاقىرىپتاردا بەزەندىرىلگەن ءبىرنەشە كيىز ءۇي تىگىلدى. حاننىڭ ەڭ ءۇلكەن جانە ادەمى جاساقتالعان ءۇيى – «اق وردا», مۇندا قوناقتارعا ۇلتتىق تاعامدار ۇسىنىلادى. ال «قولونەرشىلەر شەبەرحاناسىندا» قولدان كىلەم توقۋ ونەرىن تاماشالاۋعا بولادى. «اڭشىنىڭ ۇيىندە» قازىرگى قازاقتاردىڭ ارعى اتالارى اڭ اۋلاۋ ءۇشىن پايدالانعان كەرەك-جاراقتار كوپشىلىك نازارىنا ۇسىنىلسا, «شەبەرلەردىڭ كيىز ۇيىنە» كەلۋشىلەر ساز بالشىق پەن اسىل مەتالداردان بۇيىمدار جاساۋ جولدارىن كورىپ, ونى ەستەلىككە ساتىپ الا الادى.
كيىز ۇيلەردىڭ ءبىرى كەلەر جىلى قازاقستاندا وتەتىن ەكسپو-2017 حالىقارالىق مامانداندىرىلعان كورمەسىنە ارنالعان.
– استانا ونەرپازدارىنىڭ ءماسكەۋدە قويعان كونتسەرتتەرى ۇزاق ۋاقىتقا دەيىن ۇمىتىلمايدى دەپ ويلايمىن. وسى سياقتى ءمادەني شارالار ەكى مەملەكەتتىڭ قارىم-قاتىناستارىن ءارى قاراي دامىتۋعا وڭ ىقپال ەتەتىن بولادى. ماسكەۋلىكتەر دە ەكسپو-2017 – «بولاشاقتىڭ ەنەرگياسى» كورمەسىندە رەسەيلىك ەكسپوزيتسيالار قۇرامىندا استانادا مادەنيەت كۇندەرىن وتكىزۋدى جوسپارلاپ وتىر. ول دا وسى ماسكەۋدەگى شارا سەكىلدى ەستەن كەتپەس جارقىن وقيعالاردىڭ ءبىرى بولادى دەپ سانايمىن, – دەدى ماسكەۋ قالاسى ۇكىمەتىنىڭ ءمينيسترى سەرگەي چەريومين.
ايتا كەتەيىك, قازاقستان مەن رەسەي اراسىنداعى تىعىز ىنتىماقتاستىققا قاراماستان, ماسكەۋدە استانا كۇندەرى تەك 2002 جىلى مامىر ايىندا عانا وتكىزىلگەن. ال رەسەي استاناسى ءتول مادەنيەتى مەن ونەرىن استانادا ەكى رەت – 2001 جانە 2008 جىلدارى تانىستىرعان. ماسكەۋ تەك رەسەيدەگى عانا ەمەس, سونداي-اق, الەمدەگى دە ءىرى تاريحي-مادەني ورتالىق بولىپ تابىلادى. مۇندا كوپتەگەن اتاقتى ساۋلەت ەسكەرتكىشتەرى ورنالاسقان, قالادا 100-دەن استام تەاتر مەن 60 مۋزەي بار. سوندىقتان مادەنيەت پەن ونەر سالاسىنداعى ىنتىماقتاستىق قازاقستان ءۇشىن اسا ماڭىزدى. مۇنىمەن قوسا, قازاقتىڭ باي مۇراسىن ناسيحاتتاۋ شەتەلدىك ازاماتتاردى حالقىمىزدىڭ تاريحىمەن جانە مادەنيەتىمەن تانىستىرۋ ءۇشىن قاجەت. ماسكەۋدەگى ەتنواۋىلعا كەلۋشىلەر ناعىز باتىرلاردى كورىپ, ولاردىڭ كۇش-قۋاتىنا ءتانتى بولدى.
– مەن ۇلتتىق كيىم كيگەن قازاقتىڭ باتىرلارىن كورىپ, تاڭ قالدىم. وتە ادەمى. قازاقتار سونداي سۇڭعاق بويلى بولادى دەپ ويلاماپپىن. ەكسپوزيتسيالاردىڭ بارلىعى – قۇستار دا, كيىز ۇيلەر دە – ءبارى دە قىزىق, بىردەن قازاقستانعا بارىپ, كورگىڭ كەلىپ كەتەدى, – دەيدى ەتنواۋىل قوناقتارىنىڭ ءبىرى مارينا گروموۆا.
استانانىڭ ماسكەۋدەگى مادەنيەت كۇندەرى اياسىندا كەشە كەشكە ۇلكەن كرەمل سارايىندا قازاقستان ونەرپازدارىنىڭ قاتىسۋىمەن گالا-كونتسەرت ءوتتى. ساحنادا الىبەك دىنىشەۆ, روزا رىمباەۆا, مايرا مۇحامەدقىزى مەن سۇندەت بايعوجين ءان شىرقادى. سونىمەن قاتار, كونتسەرتكە ەسترادا انشىلەرى مەن رەسەيلىك ارتىستەر قاتىستى.
ساۋلەبەك ءبىرجان