قازاقستان قۇراماسى ەۋروپا چەمپيونى اتاندى

سودان كەيىن پەنالتي سەرياسىندا قازاقستان كومانداسى قارسىلاستارىنا قاراعاندا قاقپانى ءدال كوزدەپ, 6:5 ەسەبىمەن ۇتتى. ال كەزدەسۋدىڭ نەگىزگى ۋاقىتىندا احمەت ءشارىپوۆ دۋبل جاسادى. ءسويتىپ, ەلىمىز قۇراماسى العاش رەت شاعىن فۋتبولدان اۋەسقويلار اراسىنداعى ەۋروپانىڭ باستى دوداسىن جەڭىپ الدى. «قازاقستان اۋەسقوي فۋتبول ليگاسى» قوعامدىق بىرلەستىگىنىڭ توراعاسى ەرلان جارىلقاسىنوۆتىڭ ايتۋىنشا, بۇل سىنعا سايدىڭ تاسىنداي ىرىكتەلگەن 32 كوماندا قاتىستى. ولار 8 توپقا ءبولىنىپ, قارت قۇرلىقتىڭ جۇلدەسىن ساراپقا سالدى. قازاقستان س توبىندا بوسنيا جانە گەرتسوگوۆينا, اۆستريا جانە ليتۆا قۇرامالارىمەن كەزدەستى. ال پلەي-وفف كەزەڭىندە 1/16 فينالدا گەرمانيامەن ويناپ, 1:1 ەسەبىمەن اياقتالعان ماتچتا پەنالتي سەرياسىندا جەڭىسكە جەتتى. ودان كەيىن 1/8 فينالدا ماجارستاندى 5:1, شيرەك فينالدا بوسنيا جانە گەرتسوگوۆينانى 3:1 ەسەبىمەن ۇتسا, جارتىلاي فينالدا چەحيادان 3:0 ەسەبىمەن باسىم ءتۇستى. - ەۋروپا دوداسىنا ەلىمىزدىڭ اتىنان «ەسىل» كومانداسى قاتىستى. بۇل كلۋب استانا قالاسىنىڭ اۋەسقوي فۋتبولشىلار ليگاسىندا ونەر كورسەتەدى. ولار قالالىق ليگانى جەڭىپ العاننان كەيىن قازاقستان چەمپيونى اتانىپ, ەۋروپا دوداسىنا جولداما العان بولاتىن. قازاقستان 2012 جىلدان بەرى ەۋرودوداسىنا قاتىسىپ كەلەدى. بۇل سىنعا كارى قۇرلىقتىڭ اۋەسقويلار اراسىنداعى شاعىن فۋتبول فەدەراتسياسىنا مۇشە ەلدەر قاتىسا الادى. ال قازاقستان وعان 2012 جىلدان بەرى مۇشە. بۇعان دەيىن  ەلىمىزدىڭ اتىنان «سايران», «سەمەي» سياقتى كوماندالار جارىسقا قاتىسقان ەدى. ولار دا ەۋروپا چەمپيوناتىندا لايىقتى ونەر كورسەتتى. ءبىزدىڭ كوماندالار توپتان شىعىپ, 1/8 فينالعا, شيرەك فينالعا دەيىن جەتتى. ال بيىلعى دوداعا قازاقستاننىڭ كومانداسى وسىمەن بەسىنشى رەت قاتىستى. وندا «ەسىل» كلۋبى ەلىمىزدىڭ نامىسىن قورعاپ, كارى قۇرلىقتىڭ اسپانىندا كوك بايراعىمىزدى بيىكتە جەلبىرەتتى, ءانۇرانىمىزدى شىرقاتتى. بۇل جەڭىس «ەسىل» كلۋبىنىڭ عانا ەمەس, ول ەلىمىزدە اۋەسقوي فۋتبولدى دامىتۋعا اتسالىسىپ جاتقان ءبارىمىزدىڭ ورتاق جەڭىسىمىز. ء بىزدىڭ كوماندا جەڭىسكە جەتكەندە قۇتتىقتاۋشىلار وتە كوپ بولدى. ولار قازاقستاندا شاعىن فۋتبولدان اۋەسقويلار اراسىنداعى فۋتبولدىڭ جۇيەلى, جوسپارلى تۇردە دامىپ جاتقانىنا كوز جەتكىزدى. ءبىز شىنىندا دا ەلىمىزدە اۋەسقوي فۋتبولدى دامىتۋعا, ونى ناسيحاتتاۋعا بار كۇش-جىگەرىمىزدى سالىپ كەلەمىز. قازىر ەۋرو دوداسىنا اۋەسقوي فۋتبولشىلار ليگاسى كومانداسىنىڭ الماتىدان قاتىسىپ جاتىر دەگەن قاتە تۇسىنىك بار. بۇل دۇرىس ەمەس. قۇرلىقتىق چەمپيوناتقا قاتىسىپ جاتقان جاساقتار استانادا قۇرىلعان اۋەسقوي فۋتبولشىلار ليگاسىنىڭ كوماندالارى.  قازىرگى كەزدە ءبىزدىڭ ليگانىڭ ەلىمىزدىڭ كوپتەگەن وبلىستارىندا فيليالدارى جۇمىس ىستەيدى. مىسالى, ليگانىڭ الماتى, اقتاۋ, سەمەي, اقتوبە, اتىراۋ, پاۆلودار, پەتروپاۆلوۆسك, شىمكەنت قالالارىندا فيليالدارى بار, - دەيدى «قازاقستان اۋەسقوي فۋتبول ليگاسى» قوعامدىق بىرلەستىگىنىڭ توراعاسى ەرلان جارىلقاسىنوۆ. استانا قالالىق اۋەسقوي فۋتبولشىلار ليگاسىنا «ەگەمەن قازاقستان» گازەتىنىڭ كومانداسى دا قاتىسقان. گازەتتىڭ شاعىن فۋتبولدان جاساعى 2010-2015 جىلدار ارالىعىندا «ا» جانە «ۆ» ليگاسىندا ونەر كورسەتكەن. داستان كەنجالين